*ງານບຸນກິນເຂົ້າໃໝ່ ປະເພນີເຜົ່າແຢະ ບ້ານ ວັງຕັດໃຫຍ່ ຕິດພັນກັບການເປີດປີທ່ອງທ່ຽວ 2024 ທີ່ ເມືອງຊານໄຊ ແຂວງ ອັດຕະປື ໄດ້ຈັດຂຶ້ນໃນມື້ວັນທີ 13  ທັນວາ 2024  ໂດຍມີ ທ່ານ ສູວັນສີ ແກ້ວວີເສີດ ເຈົ້າເມືອງຊານໄຊ, ທ່ານ ບຸນປອນ ອ່ອນໄຊວຽງ ຫົວໜ້າພະແນກ ຖວທ ແຂວງ, ມີຄະນະນຳຕ່າງໜ້າຈາກຫ້ອງວ່າການແຂວງ, ຄະນະນຳຈາກບາງເມືອງຂອງ ສສ ຫວຽດນາມ, ຄະນະນຳຂອງແຂວງ, ອຳນາດການປົກຄອງເມືອງ, ອຳນາດການປົກຄອງບ້ານ ພ້ອມດ້ວຍພໍ່ແມ່ປະຊາຊົນບ້ານໃກ້ຄຽງເຂົ້າຮ່ວມຢ່າງຫລວງຫລາຍ.

     ທ່ານ ບົວລາ ພັນມີໄຊ ຮອງເຈົ້າເມືອງ ຊານໄຊ ໄດ້ກ່າວໃນພິທີເປີດງານບຸນກິນເຂົ້າໃໝ່ຂອງເຜົ່າແຢ້ະ ຕິດພັນກັບການເປີດປີທ່ອງທ່ຽວຂອງເມືອງ ໂດຍຍົກໃຫ້ເຫັນເຖິງບຸນກິນເຂົ້າໃໝ່ ຂອງເຜົ່າແຢະ ແມ່ນພິທີກໍາໜຶ່ງທີ່ນອນຢູ່ໃນລະບົບພິທີກໍາການຜະລິດກະສິກຳ ເຊິ່ງພິທີກໍານີ້ ບໍ່ພຽງແຕ່ມີຄຸນຄ່າດ້ານວັດທະນະທໍາທີ່ເປັນເອກະລັກສະເພາະກ່ຽວກັບຄວາມເຫລື້ອມໃສສັດທາ ແລະ ຈິດວິນຍານເທົ່ານັ້ນ, ຫາກຍັງສະແດງໃຫ້ເຫັນເຖິງການເຊີດຊູຕົ້ນເຂົ້າ ເຊິ່ງແມ່ນປະເພດຕົ້ນກຳເນີດຂອງການຜະລິດກະສິກຳ ທີ່ສໍາຄັນທີ່ສຸດໃນການຜະລິດ ແລະ ດໍາລົງຊີວິດຂອງຄົນ ສະນັ້ນ ອຳນາດການປົກຄອງທີ່ຕ່າງໜ້າໃຫ້ປະຊາຊົນເຜົ່າແຢະ ໄດ້ຖືເອົາມື້ສັນວັນດີພາຍຫຼັງສຳເລັດລະດູເກັບກ່ຽວຜົນ​ຜະລິດ ເປັນມື້ຈັດບຸນກິນເຂົ້າໃໝ່ ເພື່ອຊົມເຊີຍການເກັບກ່ຽວຜົນຜະລິດ ຖະຫວາຍໝາກຜົນຂອງການອອກແຮງງານອັນດີງາມທີ່ສຸດໃຫ້ບັນພະບູລຸດ, ໃຫ້ດິນຟ້າອາກາດເອື້ອອໍານວຍໃຫ້ແກ່ການຜະລິດ, ຄຸ້ມຄອງລູກຫລານໃຫ້ຢູ່ດີກິນດີ ແລະ ສະແດງຄວາມເຄົາລົບນັບຖືຕໍ່ບັນພະບູລຸດຜູ້ລ່ວງລັບໄປ. ສະນັ້ນ, ທຸກໆປີເຜົ່າແຢະ ບ້ານວັງຕັດໃຫຍ່ ເມືອງຊານໄຊ ຈະຕ້ອງໄດ້ຈັດພິທີບູຊາເຂົ້າ ຫລື ເທດສະຢການບຸນເຂົ້າໃໝ່ສືບສານກັນມາ.

    ມາຮອດປັດຈຸບັນ ຊາວແຂວງ ອັດຕະປື ກຳລັງຫ້າງຫາກະກຽມສະເຫຼີມສະຫຼອງເປີດປີທ່ອງທ່ຽວ  ເວົ້າສະເພາະແລ້ວ ເມືອງ ຊານໄຊ ໄດ້ມີຜົນສຳເລັດ ແລະ ມີຄວາມພ້ອມໃນການຫ້າງຫາກະກຽມ ເພື່ອຕ້ອນຮັບນັກທ່ອງທ່ຽວທີ່ມາຈາກພາຍໃນ ແລະ ຕ່າງປະເທດ ພ້ອມທັງຖືເອົາໂອກາດການເປີດປີທ່ອງທ່ຽວ ລາວ 2024 ເປັນການເປີດກວ້າງເຊື່ອມໂຍງຂອງທຸກຂະແໜງການໃນທົ່ວແຂວງ ກໍ່ຄື ຢູ່ໃນເມືອງ ຊານໄຊ ໂອກາດດຽວກັນຄະນະນຳທີ່ເຂົ້າຮ່ວມຂັ້ນເມືອງ ແລະ ຂັ້ນແຂວງ ກໍ່ໄດ້ໃຫ້ກຽດຂຶ້ນເປີດປ້າຍ, ລັ່ນຄ້ອງ 9 ບາດ ເພື່ອຢັ້ງຢືນໃຫ້ແກການເປີດປີທ່ອງທ່ຽວໃນງານບຸນກິນເຂົ້າໃໝ່ ເຜົ່າແຢະ ແລະ ເປີດການທ່ອງທ່ຽວ ຢູ່ເມືອງ ຊານໄຊ ຢ່າງເປັນທາງການ.

    ໃນງານເທດສະການບຸນເຂົ້າໃໝ່ ປະເພນີເຜົ່າແຢະ ເມືອງຊານໄຊ ໄດ້ຈັດໃຫ້ມີຫຼາຍກິດຈະກຳ ເຊັ່ນ: ມີລາຍການແຫ່ຂະບວນກ້ອນກຳລັງຈາກ 5 ບ້ານເຂົ້າຮ່ວມ, ການຮັບຊົມລະການສະແດງສີລະປະ-ວັນນະຄະດີ, ໃນງານມີການມອບໃບຍ້ອງຍໍເຈົ້າເມືອງສັນລະເສີນໃຫ້ແກ່ບໍລິສັດ ວັງຕັດຂຸດຄົ້ນບໍ່ແຮ່ ທີ່ມີຜົນງານປະກອບສ່ວນວັດຖຸປັດໃຈເຂົ່າໃນງານຄັ້ງນີ້ຢ່າງສົມກຽດ..., ໃນງານຍັງມີກິດຈະກຳບູຊາໄຟ, ກິດຈະກຳຮ່ອນຄຳ, ກິດຈະກຳເຜົາຖ່ານຕີເຫຼັກ ແລະ ຕອນຄ້ຳຍັງມີລາຍການເດີນແບບສາວອາພອນເຜົ່າຈາກ 5 ເຜົ່າ ເຊິ່ງບັນຍາກາດ ໄດ້ມີເອກກະລັກ ເເລະ ມົນສະເນ່ສວຍງາມ, ແຕ່ລະລາຍການຂອງກິດຈະກຳຕ່າງໆ ໄດ້ມີຄວາມສາມັກຄີທີ່ໄດ້ທຸ້ມເທເຮື່ອເເຮງທັງກາຍ ເເລະ ຄວາມມຸ່ງໝັ້ນຕັ້ງໃຈເສຍສະລະ ຂອງພີ່ນ້ອງຊາວບ້ານເຮັດໃຫ້ຜົນງານ ບຸນປະເພນີກິນເຂົ້າໃໝ່ ໄດ້ການປະກອບສ່ວນຂອງທຸກພາກສ່ວນ ອັນເຕັມໄປດ້ວຍບັນຍາກາດ ມີຄວາມສະງົບ ເປັນລະບຽບຮຽບຮ້ອຍ ດ້ວຍມົນສະເນ່ ສິນລະປະສີສັນ ທີ່ສວຍສົດງົດງາມ ເປັນໜ້າເປັນຕາໃຫ້ຊາວພີ່ນ້ອງເຜົ່າແຢະ  ເເລະ ສ້າງຄວາມປິຕິຊົມຊື່ນ ເເກ່ເເຂກບ້ານເເຂກເມືອງ ທີ່ມາທ່ຽວຊົມເມືອງຊານໄຊຢ່າງເບິກບານມ່ວນຊື່ນ