*ຫວ່າງບໍ່ດົນມານີ້,  ທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງ ໄດ້ມີຄຳເຫັນຊີ້ນໍາໃນກອງປະຊຸມປຶກສາຫາລື ເພື່ອປ້ອງກັນຄວາມປອດໄພຂອງນັກທ່ອງທ່ຽວວ່າ: ໃຫ້ພະແນກ ຖວທ ສືບຕໍ່ເອົາໃຈໃສ່ຄຸ້ມຄອງຕິດຕາມ, ກວດກາຕາມພາລະບົດບາດ ເພື່ອໃຫ້ຜູ້ປະກອບການທຸລະກິດການທ່ອງທ່ຽວ ເຄື່ອນໄຫວຖືກຕ້ອງຕາມລະບຽບກົດໝາຍ ເຊັ່ນ: ການບໍລິການລົດ, ເຮືອນໍາທ່ຽວທີ່ສົ່ງສຽງເນືອງນັນ, ຮ້ານບັນເທີງເປີດບໍລິການກາຍໂມງ, ຕ້ອງເປັນເຈົ້າການປະສານພາກສ່ວນທີ່ກ່ຽວຂ້ອງເພື່ອແກ້ໄຂບັນຫາ.

    ນອກຈາກນີ້, ໃຫ້ເອົາໃຈໃສ່ກວດກາຮ້ານບັນເທີງທີ່ເປີດບໍລິການກາຍໂມງ, ມົ້ວສຸມຢາເສບຕິດ, ໂສເພນີ ໂດຍສົມທົບເຈົ້າໜ້າທີ່ ພ້ອມທັງມີມາດຕະການຕໍ່ຜູ້ລະເມີດຕາມແຕ່ລະຂັ້ນ; ຄົ້ນຄວ້າອອກແຈ້ງການໃຫ້ພາກທຸລະກິດກຳນົດລະບຽບການສະເພາະໃຫ້ຜູ້ປະກອບການປະຕິບັດໂມງເວລາ, ເກນອາຍຸ, ການບໍລິການດ້ານອື່ນໆທີ່ບໍ່ສອດຄ່ອງກັບກົດໝາຍ; ສືບຕໍ່ກວດກາບັນດາຮ້ານທີ່ໄດ້ຮັບອະນຸຍາດ ແລະ ບໍ່ໄດ້ຮັບອະນຸຍາດໃຫ້ລະອຽດ, ຮ້ານທີ່ມີໃບອະນຸຍາດຄວນມີການຊຸກຍູ້ສົ່ງເສີມທຸລະກິດ ດ້ວຍການຈັດຝຶກອົບຮົມໃຫ້ພະນັກງານບໍລິການໃຫ້ມີຄຸນນະພາບ; ສໍາລັບຮ້ານທີ່ບໍ່ມີໃບອະນຸຍາດກໍ່ໃຫ້ສືບຕໍ່ແນະນໍາຜູ້ປະກອບການປະຕິບັດຕາມລະບຽບ, ອັນໃດບໍ່ໄດ້ມາດຖານກໍ່ໃຫ້ປັບປຸງໃຫ້ເຂົ້າສູ່ລະບຽບກົດໝາຍ,

    ສືບຕໍ່ປະຕິບັດຕາມພາລະບົດບາດຂອງຕົນໃນການຕິດຕາມ, ກວດກາຄົນຕ່າງປະເທດທີ່ມາເຄື່ອນໄຫວເຮັດທຸລະກິດຢູ່ພາຍໃນແຂວງ ແລະ ມາໃນນາມນັກທ່ອງທ່ຽວແຕ່ລັກລອບເຄື່ອນໄຫວ ເຮັດທຸລະກິດທີ່ບໍ່ສອດຄ່ອງກັບລະບຽບ, ກວດກາປະກົດການຫຍໍ້ທໍ້ຕ່າງໆທີ່ເກີດຂຶ້ນ ເຊັ່ນ: ການຄ້າມະນຸດ, ຢາເສບຕິດ, ໂສເພນີ, ການປະຕິບັດມາດຕະການໃຫ້ເບິ່ງຕາມກໍລະນີໂດຍການສຶກສາອົບຮົມກວດກາຫ້າງ ຮ້ານທີ່ຢູ່ແຄມທາງຄືນໃໝ່ ເພື່ອຄວາມເປັນລະບຽບຮຽບຮ້ອຍ, ເອົາໃຈໃສ່ລົງກວດກາຮ້ານອາຫານ, ຮ້ານກິ່ນດື່ມ, ຮ້ານບັນເທີງ, ກວດກາຮ້ານອາຫານໃຫ້ມີຄວາມສະອາດປອດໄພ ພ້ອມທັງແນະນຳຜູ້ປະກອບການໃນການປ້ອງກັນຄວາມສະອາດ;  ທຸກພາກສ່ວນຕ້ອງເປັນເຈົ້າການຮ່ວມກັນໃນການປະຕິບັດລະບຽບກົດໝາຍ ແລະ ແນະນໍາມາດຕະການຄວາມປອດໄພໃຫ້ແກ່ນັກທ່ອງທ່ຽວ