KPL
ນັບແຕ່ ວັນທີ 5 ມັງກອນປີ 2025 ເປັນຕົ້ນໄປ, ທາງລົດໄຟ ທົ່ວປະເທດຈີນ ຈະປະຕິບັດ ແຜນການແລ່ນລົດ ສະບັບໃໝ່ ເຊິ່ງຈະມີຂະບວນລົດໄຟ ໂດຍສານ 13.028 ຂະບວນ, ເພີ່ມຂຶ້ນຫລາຍກວ່າ ແຜນການ ປັດຈຸບັນ 230 ຂະບວນ
ຂປລ.ຕາມຂ່າວຈາກ CGTN,ບໍລິສັດ ທາງລົດໄຟຈີນ ໃຫ້ຮູ້ວ່າ: ນັບແຕ່ ວັນທີ 5 ມັງກອນປີ 2025 ເປັນຕົ້ນໄປ, ທາງລົດໄຟ ທົ່ວປະເທດຈີນ ຈະປະຕິບັດ ແຜນການແລ່ນລົດ ສະບັບໃໝ່ ເຊິ່ງຈະມີຂະບວນລົດໄຟ ໂດຍສານ 13.028 ຂະບວນ, ເພີ່ມຂຶ້ນຫລາຍກວ່າ ແຜນການ ປັດຈຸບັນ 230 ຂະບວນ; ຈະມີຂະບວນລົດໄຟ ຂົນສົ່ງສິນຄ້າ 22.859 ຂະບວນ, ເພີ່ມຂຶ້ນ 91 ຂະບວນ, ເນື່ອງຈາກນັ້ນ, ຄວາມສາມາດ ດ້ານການຮັບສົ່ງ ຜູ້ໂດຍສານ ແລະ ຂົນສົ່ງສິນຄ້າ, ຄຸນນະພາບ ດ້ານການບໍລິການ ແລະ ປະສິດທິຜົນ ດ້ານການແລ່ນລົດ ຂອງທາງລົດໄຟຈີນ ຈະຍົກສູງຂຶ້ນ ຕື່ມອີກ.ພາກສ່ວນ ທາງລົດໄຟຈີນ ແຈ້ງໃຫ້ຮູ້ຕື່ມວ່າ: ປີ້ລົດໄຟ ຕາມແຜນການ ສະບັບໃໝ່ ຈະເລີ່ມຂາຍ ແຕ່ວັນທີ 22 ທັນວານີ້ ເປັນຕົ້ນໄປ, ນັກທ່ອງທ່ຽວ ທັງພາຍໃນ ແລະ ຕ່າງປະເທດ ສາມາດຊອກຮູ້ ຂໍ້ມູນການແລ່ນລົດ ແລະ ການບໍລິການ ຂອງຂະບວນລົດໄຟຜ່ານທາງເວັບໄຊ, APP ແລະ ວິແຊັດ 12306 ແລະ 95306 ຂອງທາງລົດໄຟຈີນ ເພື່ອວາງແຜນການ ເດີນທາງ ແລະການຂົນສົ່ງສິນຄ້າ ຢ່າງເໝາະສົມ./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
