ການຢ້ຽມຢາມເກີດຂຶ້ນໃນບັນຍາກາດທີ່ພິເສດ: ທັງສອງຝ່າຍພວມສືບຕໍ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ພັກ ຄັ້ງທີ XII (ລາວ) ແລະ ຄັ້ງທີ XIV (ຫວຽດນາມ) ເຂົ້າສູ່ປີທຳອິດແຫ່ງການປະຕິບັດ. ພ້ອມນີ້, ສປປ ລາວ ຫາກໍສຳເລັດການເລືອກຕັ້ງປະທານສະພາແຫ່ງຊາດ ແລະ ນາຍົກລັດຖະມົນຕີ ແຫ່ງ ສປປ ລາວ ຄົນໃໝ່ ໃນກອງປະຊຸມສະພາແຫ່ງຊາດ ຊຸດທີ X ສະໄໝສາມັນເທື່ອທີ 2 (5-21 ຕຸລາ 2026), ໃນຂະນະທີ່ ສສ ຫວຽດນາມ ກຳລັງດຳເນີນກອງປະຊຸມສູນກາງສະໄໝສາມັນເທື່ອທີ 4 ແລະ ກະກຽມກອງປະຊຸມສະພາແຫ່ງຊາດ ຊຸດທີ XVI. ຈັງຫວະດັ່ງກ່າວຈຶ່ງເຮັດໃຫ້ການຢ້ຽມຢາມມີຄວາມໝາຍຍິ່ງຕໍ່ການສານຕໍ່ເຈດຈຳນົງລວມ ແລະ ຍົກລະດັບການພົວພັນສອງຝ່າຍສູ່ລະດັບໃໝ່. ພາຍຫຼັງການພົບປະສອງຝ່າຍຢ່າງເປັນທາງການ, ຄາດວ່າຈະມີການແລກປ່ຽນ ແລະ ລົງນາມໃນເອກະສານຮ່ວມມືຈະມີຫຼາຍກວ່າ 10 ສະບັບ ຊຶ່ງກວມເອົາຫຼາຍຂົງເຂດວຽກງານທີ່ສຳຄັນແຕ່ສູນກາງເຖິງທ້ອງຖິ່ນ. ເອກະສານທັງໝົດເຫຼົ່ານີ້ຈະເປັນພື້ນຖານອັນສຳຄັນໃຫ້ແກ່ການຈັດຕັ້ງປະຕິບັດແຜນງານຕົວຈິງລະຫວ່າງກະຊວງ, ຂະແໜງການ ແລະ ທ້ອງຖິ່ນຕ່າງໆຂອງສອງປະເທດ, ພ້ອມທັງເປັນການກະກຽມເນື້ອໃນສຳຄັນໃຫ້ແກ່ກອງປະຊຸມຄະນະກຳມະການຮ່ວມມື ລາວ-ຫວຽດນາມ ຄັ້ງທີ 49 ທີ່ຈະຈັດຂຶ້ນໃນຕົ້ນປີ 2027. ນອກຈາກນີ້, ໃນລະຫວ່າງການຢ້ຽມຢາມຍັງຈະມີກອງປະຊຸມສົ່ງເສີມການລົງທຶນ ລາວ-ຫວຽດນາມ ທີ່ມີຜູ້ເຂົ້າຮ່ວມປະມານ 1.000 ຄົນ ຈາກພາກລັດ ແລະ ພາກທຸລະກິດ ຊຶ່ງຈະເປັນເວທີເຊື່ອມຕໍ່ຄວາມຕ້ອງການ ແລະ ຄວາມສາມາດຂອງສອງປະເທດໃຫ້ກາຍເປັນການຮ່ວມມືຕົວຈິງ.

ສໍາລັບທິດທາງການຮ່ວມມືຍຸດທະສາດ 3 ເສົາຄໍ້າຫຼັກ: ຝ່າຍລາວມີຄວາມມຸ່ງຫວັງວ່າຜົນສຳເລັດຈາກການຢ້ຽມຢາມຄັ້ງນີ້, ຈະເປັນບາດກ້າວບຸກທະລຸທີ່ສຳຄັນໃນການຍົກລະດັບການຮ່ວມມືດ້ານເສດຖະກິດ ໃຫ້ສົມຄູ່ກັບລະດັບການພົວພັນການເມືອງພິເສດທີ່ມີມາແຕ່ດົນນານ ໂດຍເນັ້ນໜັກ 3 ດ້ານຕົ້ນຕໍ ຄື: ເສົາຄໍ້າ 1: ການເຊື່ອມຈອດພື້ນຖານໂຄງລ່າງ ແລະ ຄົມມະນາຄົມຂົນສົ່ງ. ພວກເຮົາ ມຸ່ງໝັ້ນຊຸກຍູ້ໃຫ້ບັນດາໂຄງການຍຸດທະສາດດ້ານເສັ້ນທາງ, ທາງລົດໄຟ, ລະບົບສະໜອງພະລັງງານ ແລະ ນ້ຳມັນໃຫ້ເປັນຮູບປະທຳໄວຂຶ້ນ. ເປົ້າໝາຍສຳຄັນແມ່ນການຫັນປ່ຽນ ສປປ ລາວ ຈາກປະເທດທີ່ບໍ່ມີຊາຍແດນຕິດທະເລໃຫ້ກາຍເປັນ “ສູນກາງເຊື່ອມຈອດໃນພາກພື້ນ” ຊຶ່ງຈະຊ່ວຍຫຼຸດຕົ້ນທຶນການຜະລິດ ແລະ ການຂົນສົ່ງ, ເພີ່ມຄວາມສາມາດແຂ່ງຂັນຂອງສິນຄ້າ ແລະ ເຊື່ອມໂຍງເສດຖະກິດສອງປະເທດເຂົ້າກັນຢ່າງແໜ້ນແຟ້ນ. ເສົາຄໍ້າ 2: ການຊຸກຍູ້ການຄ້າ ແລະ ການລົງທຶນສອງສົ້ນ. ພວກເຮົາຄາດຫວັງວ່າຈະສ້າງກົນໄກອຳນວຍຄວາມສະດວກ ແລະ ດຶງດູດນັກລົງທຶນຫວຽດນາມ ເຂົ້າມາລົງທຶນຢູ່ລາວຫຼາຍຂຶ້ນ ໂດຍສະເພາະໃນຂົງເຂດພະລັງງານສະອາດ, ກະສິກຳເຕັກໂນໂລຊີສູງ, ບໍ່ແຮ່ ແລະ ການປຸງແຕ່ງສິນຄ້າພາຍໃນ, ຈະສືບຕໍ່ແກ້ໄຂອຸປະສັກຕ່າງໆໃນການຄ້າຂາຍຂ້າມຊາຍແດນ ເພື່ອໃຫ້ຍອດມູນຄ່າການຄ້າສອງສົ້ນບັນລຸຕາມເປົ້າໝາຍທີ່ການນຳຂັ້ນສູງຂອງສອງປະເທດ ໄດ້ຕົກລົງກັນໄວ້. ເສົາຄໍ້າ 3: ການຮ່ວມມືຮອບດ້ານດ້ານພະລັງງານ, ການສຶກສາ ແລະ ການທ່ອງທ່ຽວ. ສອງປະເທດມີທ່າແຮງບົ່ມຊ້ອນຫຼາຍດ້ານ; ພວກເຮົາຈະສົ່ງເສີມການແລກປ່ຽນ ແລະ ການຄ້າພະລັງງານໃຫ້ເລິກເຊິ່ງ, ສືບຕໍ່ກໍ່ສ້າງສະຖາບັນການສຶກສາຮ່ວມກັນ ແລະ ຮ່ວມສົ່ງເສີມການທ່ອງທ່ຽວໃນຮູບແບບ “ໜຶ່ງຈຸດໝາຍສອງປະເທດ” ເພື່ອດຶງດູດນັກທ່ອງທ່ຽວຈາກພາຍນອກ ແລະ ສ້າງລາຍຮັບໃຫ້ແກ່ປະຊາຊົນສອງຊາດ.

ສ່ວນຄວາມມຸ່ງມາດປາຖະໜາສູງສຸດ: ສິ່ງທີ່ຝ່າຍລາວມຸ່ງຫວັງຢາກຊຸກຍູ້ໃຫ້ມີການຫັນປ່ຽນຢ່າງແຂງແຮງ ແລະ ເປັນຮູບປະທຳຫຼາຍທີ່ສຸດຄື: ການຍົກລະດັບການຮ່ວມມືດ້ານເສດຖະກິດ, ການຄ້າ ແລະ ການລົງທຶນໃຫ້ມີລັກສະນະບຸກທະລຸ ແລະ ສົມຄູ່ກັບຄວາມໝາຍອັນຍິ່ງໃຫຍ່ຂອງສາຍພົວພັນການເມືອງພິເສດລະຫວ່າງສອງປະເທດ. ເພື່ອບັນລຸເປົ້າໝາຍດັ່ງກ່າວ, ຈະເນັ້ນ 3 ທິດທາງປະຕິບັດ ຄື: ເລັ່ງລັດການເຊື່ອມຈອດເສດຖະກິດມະຫາພາກ ແລະ ພື້ນຖານໂຄງລ່າງຍຸດທະສາດ: ໃຫ້ບັນດາໂຄງການເຊື່ອມຕໍ່ຄົມມະນາຄົມ, ພະລັງງານ ແລະ ລະບົບຂົນສົ່ງສິນຄ້າກ້າວໜ້າໄວຂຶ້ນ, ສ້າງເປັນ “ກະດູກສັນຫຼັງ” ແຫ່ງການຮ່ວມມືທີ່ໝັ້ນຄົງ ແລະ ຍືນຍົງ; ປະຕິບັດທຸກວຽກງານດ້ວຍ: ວ່ອງໄວ, ແທດເຖິງ, ມີປະສິດທິຜົນ, ປະຕິບັດໄດ້ຈິງ. ທຸກຂະແໜງການ ແລະ ທ້ອງຖິ່ນຕ້ອງຫັນປ່ຽນວິທີເຮັດວຽກໃຫ້ຄ່ອງຕົວ, ແກ້ໄຂບັນຫາຕິດຂັດຢ່າງທັນການ ເພື່ອໃຫ້ນັກລົງທຶນທັງສອງຝ່າຍສາມາດດຳເນີນທຸລະກິດໄດ້ຢ່າງສະດວກ, ວ່ອງໄວ ແລະ ໝັ້ນໃຈ; ຮັດແໜ້ນຄວາມຜູກພັນຜ່ານຄົນຮຸ່ນໜຸ່ມ: ຄຽງຄູ່ກັບການຮ່ວມມືດ້ານເສດຖະກິດ, ພວກເຮົາຈະສົ່ງເສີມການແລກປ່ຽນຊາວໜຸ່ມ, ການສຶກສາ ແລະ ວັດທະນະທຳ ເພື່ອປູກຝັງຈິດສຳນຶກມູນເຊື້ອແຫ່ງຄວາມສາມັກຄີພິເສດໃຫ້ເລິກເຊິ່ງໃນຄົນຮຸ່ນຕໍ່ໄປ, ເນື່ອງຈາກພວກເຂົາຄື “ຜູ້ສືບທອດ” ທີ່ຈະຖະນຸຖະໜອມ ແລະ ສືບຕໍ່ສ້າງສາຍພົວພັນອັນຫາຍາກນີ້ໃຫ້ໝັ້ນຄົງຂະໜົງແກ່ນຢູ່ຄຽງຄູ່ສອງປະເທດຕະຫຼອດໄປ.

ທ້າຍສຸດນີ້, ທ່ານໄດ້ແຈ້ງໃຫ້ຊາບວ່າ: ໃນທ້າຍປີ 2026, ສປປ ລາວ ຈະຫຼຸດພົ້ນອອກຈາກສະຖານະພາບດ້ອຍພັດທະນາຢ່າງເປັນທາງການ ໂດຍຈະມີໄລຍະຂ້າມຜ່ານ 3 ປີ (2026-2029), ພ້ອມທັງກໍາລັງຈັດຕັ້ງປະຕິບັດນະໂຍບາຍເສດຖະກິດເອກະລາດເປັນເຈົ້າຕົນເອງ (ສອຈ) ຈຶ່ງຂໍຮຽກຮ້ອງມາຍັງບັນດາປະເທດເພື່ອນມິດວົງຄະນະຍາດສາກົນ ສືບຕໍ່ໃຫ້ການຮ່ວມມື ແລະ ສະໜັບສະໜູນ ສປປ ລາວ ໃຫ້ສາມາດຫຼຸດພົ້ນອອກຈາກສະຖານະພາບປະເທດດ້ອຍພັດທະນາຢ່າງໂລ່ງລ່ຽນ ແລະ ຍຶນຍົງ. ຂໍຖືໂອກາດນີ້ ສະເໜີມາຍັງສະຫາຍຫວຽດນາມອ້າຍນ້ອງສືບຕໍ່ໃຫ້ການຮ່ວມມື ແລະ ສະໜັບສະໜູນ ສປປ ລາວ ພາຍໃຕ້ຂອບການຮ່ວມມືຕ່າງໆທີ່ການນຳຂັ້ນສູງຂອງສອງພັກ-ສອງລັດ ໄດ້ຕົກລົງຮ່ວມກັນໃຫ້ເກີດຜົນເປັນຈິງ. ອີກປະການໜຶ່ງ, ຂ້າພະເຈົ້າຕີລາຄາສູງວ່າຜົນການຢ້ຽມຢາມ ສປປ ລາວ ຢ່າງເປັນທາງການຂອງສະຫາຍ ເລ ມິງ ຮຶງ ໃນຄັ້ງນີ້, ຍັງຈະປະກອບສ່ວນສຳຄັນເຂົ້າໃນຂະບວນການສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ ໃນປີ 2027 ກໍຄື ສະເຫຼີມສະຫຼອງວັນສ້າງຕັ້ງສາຍພົວພັນການທູດ ຄົບຮອບ 65 ປີ (05/09/1962) ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 50 ປີ (18/07/1977), ພ້ອມທັງເປັນການຜັນຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານ ແລະ ຫຸ້ນສ່ວນຍຸດທະສາດໃຫ້ແຕກດອກອອກຜົນ ເພື່ອນໍາເອົາຜົນປະໂຫຍດຕົວຈິງມາສູງປະຊາຊົນສອງຊາດ ລາວ-ຫວຽດນາມ.

ພາບ: ເກດສະໜາ

KPL