KPL
ທ່ານ ນາງ ມຸກດາວັນ ສີສຸລິດ ຫົວໜ້າກົມອົງການຈັດຕັ້ງສາກົນ, ກະຊວງການຕ່າງປະເທດ, ຫົວໜ້າກອງເລຂາ ຄຊກລ ໄດ້ໃຫ້ສໍາພາດຕໍ່ສຶ່ມວນຊົນ ໂດຍໄດ້ຢືນຢັນຢ່າງໜັກແໜ້ນວ່າ: ສປປ ລາວ ມີຄວາມພ້ອມຢ່າງເຕັມສ່ວນ ໃນການປະຕິບັດພາລະບົດບາດປະທານກອງປະຊຸມທົບທວນຮອບວຽນທີ 3 ສົນທິສັນຍາ ວ່າດ້ວຍການເກືອດຫ້າມລະເບີດລູກຫວ່ານ (3RC CCM) ໂດຍໄດ້ມີການກະກຽມຄວາມພ້ອມຢ່າງຮອບດ້ານ ແລະ ຢ່າງລະອຽດຖີ່ຖ້ວນ.
ຂປລ. ນັບແຕ່ຕົ້ນປີ 2026 ເປັນຕົ້ນມາ, ພາກສ່ວນທີ່ກ່ຽວຂ້ອງຂອງ ສປປ ລາວ ໄດ້ຮ່ວມກັນເຮັດວຽກຢ່າງໃກ້ຊິດກັບກອງເລຂາສົນທິສັນຍາ (ISU-CCM) ແລະ ອົງການສະຫະປະຊາຊາດຢ່າງຕໍ່ເນື່ອງ ໃນທຸກຂັ້ນຕອນນັບແຕ່ດ້ານເນື້ອໃນວິຊາການ, ດ້ານພະລາທິການ, ຈົນຮອດດ້ານການຕ້ອນຮັບ ແລະ ການຮັກສາຄວາມປອດໄພ. ລັດຖະບານໄດ້ຕົກລົງເຫັນດີສ້າງຕັ້ງຄະນະຊີ້ນຳລະດັບຊາດ ທີ່ປະກອບດ້ວຍຄະນະຮັບຜິດຊອບວຽກງານສະເພາະດ້ານຂຶ້ນມາ ເພື່ອຮັບປະກັນໃຫ້ທຸກຂະແໜງການທີ່ກ່ຽວຂ້ອງມີການ ປະສານສົມທົບກັນຢ່າງລະອຽດໃນການກະກຽມວຽກງານທັງທາງດ້ານເນ້ືຶອໃນ ແລະ ພາລາທິການ, ພ້ອມກັບໃຫ້ມີການຕິດຕາມກວດກາຄວາມຄືບໜ້າຢ່າງເປັນປົກກະຕິ ແລະ ເປັນລະບົບ.
ໃນດ້ານເນື້ອໃນແມ່ນມີຄວາມຄືບໜ້າຕາມກຳນົດ, ສັນຍາການເປັນເຈົ້າພາບ ລະຫວ່າງ ສປປ ລາວ ກັບອົງການສະຫະປະຊາຊາດ ໄດ້ສຳເລັດການເຊັນຮ່ວມກັນເປັນທີ່ຮຽບຮ້ອຍແລ້ວ. ພ້ອມກັນນັ້ນ, ບັນດາເອກະສານສຳຄັນ ເປັນຕົ້ນເເມ່ນແຜນປະຕິບັດງານນະຄອນຫລວງວຽງຈັນ ສະບັບໃໝ່ (VCAP 2027- 2031) ແລະ ຖະແຫລງການການເມືອງ ກໍກໍາລັງຢູ່ໃນຂັ້ນຕອນສຸດທ້າຍຂອງການເຈລະຈາ ເພື່ອກຽມນໍາສະເໜີໃຫ້ບັນດາປະເທດພາຄີພິຈາລະນາ ແລະ ຮັບຮອງເອົາຢ່າງເປັນທາງການ ໃນໄລຍະກອງປະຊຸມ 14-18 ກັນຍາ 2026 ນີ້.
ມາຮອດປັດຈຸບັນ, ແມ່ນຄາດວ່າຈະມີຄະນະຜູ້ແທນລະດັບສູງ ຈາກທົ່ວທຸກມູມໂລກເດີນທາງເຂົ້າຮ່ວມກອງປະຊຸມເປັນຈຳນວນຫລວງຫລາຍ ຊຶ່ງໜັງສືເຊື້ອເຊີນ ພ້ອມທັງເອກະສານທີ່ຈຳເປັນໄດ້ຖືກສົ່ງໄປໃຫ້ບັນດາປະເທດສະມາຊິກ ແລະ ອົງການຈັດຕັ້ງສາກົນທີ່ກ່ຽວຂ້ອງຢ່າງທົ່ວເຖິງແລ້ວ. ດ້ານສະຖານທ່ີຈັດກອງປະຊຸມ ແລະ ການອຳນວຍຄວາມສະດວກຕ່າງໆ ກໍແມ່ນຢູ່ໃນຂັ້ນຕອນສຸດທ້າຍຂອງການກະກຽມເຊັ່ນກັນ ໂດຍໄດ້ຮັບການຮ່ວມມືຈາກທຸກພາກສ່ວນທັງພາກລັດ ແລະ ພາກເອກະຊົນຢ່າງພ້ອມພຽງ.
ທ່ານ ນາງ ມຸກດາວັນ ສີສຸລິດ ໄດ້ກ່າວອີກວ່າ: ຂ້າພະເຈົ້າມີຄວາມໝັ້ນໃຈຢ່າງສູງດ້ວຍພື້ນຖານປະສົບການທີ່ ສປປ ລາວ ເຄີຍໄດ້ຮັບກຽດເປັນເຈົ້າພາບຈັດກອງປະຊຸມສາກົນໃນລັກສະນະດຽວກັນນີ້ມາກ່ອນ, ປະກອບກັບຄວາມຮ່ວມມືອັນແໜ້ນແຟ້ນຈາກທຸກພາກສ່ວນທັງພາຍໃນປະເທດ ແລະ ບັນດາປະເທດຄູ່ຮ່ວມພັດທະນາສາກົນ, ຂ້າພະເຈົ້າມີຄວາມເຊື່ອໝັ້ນວ່າ ສປປ ລາວ ຈະສາມາດປະຕິບັດພາລະບົດບາດເປັນປະທານ ແລະ ເຈົ້າພາບກອງປະຊຸມທົບທວນສົນທິສັນຍາ CCM ຮອບວຽນທີ 3 ນີ້ໄດ້ຢ່າງມີປະສິດທິຜົນ ແລະ ເປັນທີ່ຍອມຮັບຂອງວົງຄະນະຍາດສາກົນ.
KPL
