KPL
ໃນວັນທີ 3 ກັນຍາ 2026, ທີ່ນະຄອນຫຼວງອັດສະຕານາ, ສາທາລະນະລັດ ກາຊັກສະຖານ, ໃນໂອກາດການຢ້ຽມຢາມທາງລັດຖະກິດຂອງ ທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດ ແຫ່ງ ສປປ ລາວ, ໄດ້ມີພິທີລົງນາມບົດບັນທຶກຄວາມເຂົ້າໃຈ ລະຫວ່າງ ອົງການໄອຍະການປະຊາຊົນສູງສຸດ ແຫ່ງ ສປປ ລາວ ແລະ ອົງການໄອຍະການສູງສຸດ ແຫ່ງ ສາທາລະນະລັດ ກາຊັກສະຖານ ເພື່ອວາງຂອບ ແລະ ສ້າງພື້ນຖານ ໃຫ້ແກ່ການຮ່ວມມືວຽກງານໄອຍະການ ລະຫວ່າງສອງອົງການ ໃນຕໍ່ໜ້າຢ່າງມີປະສິດທິຜົນ.
ຕາງໜ້າຝ່າຍລາວ ລົງນາມໂດຍ ທ່ານ ນາງ ລີວົງ ລາວລີ ກຳມະການສູນກາງພັກ, ຫົວໜ້າອົງການໄອຍະການປະຊາຊົນສູງສຸດ ແຫ່ງ ສປປ ລາວ ແລະ ຝ່າຍກາຊັກສະຖານ ລົງນາມໂດຍ ທ່ານ ເບຣິກ ອາຊີລອຟ ຫົວໜ້າອົງການໄອຍະການສູງສຸດ ແຫ່ງ ສາທາລະນະລັດ ກາຊັກສະຖານ. ການລົງນາມດັ່ງກ່າວສະແດງໃຫ້ເຫັນເຈດຕະນາລົມຢ່າງແທ້ຈິງຂອງສອງຝ່າຍ ໃນການເສີມສ້າງຄວາມເຂົ້າໃຈ, ຄວາມໄວ້ວາງໃຈ ແລະ ການພົວພັນອັນດີ ລະຫວ່າງ ສອງອົງການ.
ບົນພື້ນຖານດັ່ງກ່າວ, ສອງຝ່າຍຈະສົ່ງເສີມການຮ່ວມມື ຕາມຂອບເຂດສິດອຳນາດ ແລະ ກົດໝາຍຂອງແຕ່ລະປະເທດ ໂດຍສຸມໃສ່ການແລກປ່ຽນຄະນະຜູ້ແທນ, ບົດຮຽນ, ປະສົບການ ແລະ ພຶດຕິກຳທີ່ດີໃນວຽກງານໄອຍະການ, ການສົ່ງເສີມການຮ່ວມມືທາງອາຍາ, ການສົ່ງຜູ້ຮ້າຍຂ້າມແດນ, ການຈັດກອງປະຊຸມ, ການປຶກສາຫາລື ແລະ ການສຳມະນາ, ການສຶກສາ, ຝຶກອົບຮົມ ແລະ ພັດທະນາບຸກຄະລາກອນ, ການແລກປ່ຽນເອກະສານ, ສິ່ງພິມ ແລະ ຂໍ້ມູນທາງວິຊາການ, ລວມທັງຮູບແບບການຮ່ວມມືອື່ນຕາມທີ່ສອງຝ່າຍເຫັນດີຮ່ວມກັນ. ບົດບັນທຶກຄວາມເຂົ້າໃຈສະບັບນີ້, ເປັນກົນໄກໜຶ່ງ ໃນການຊ່ວຍໃຫ້ສອງອົງການໄດ້ປຶກສາຫາລື, ແລກປ່ຽນ ແລະ ຂະຫຍາຍການຮ່ວມມືໃນຂົງເຂດ ທີ່ສອງຝ່າຍມີຄວາມສົນໃຈ, ພົວພັນ, ຮ່ວມມືກັນ ບົນພື້ນຖານຂອງຄວາມເຄົາລົບເຊິ່ງກັນ ແລະ ກັນ, ຄວາມສະໝັກໃຈ, ຄວາມເໝາະສົມ ແລະ ຄຳນຶງເຖິງເງື່ອນໄຂຕົວຈິງຂອງແຕ່ລະຝ່າຍ ເພື່ອໃຫ້ການຮ່ວມມື ມີເນື້ອໃນ ແລະ ນຳມາຊຶ່ງຜົນປະໂຫຍດຮ່ວມກັນ ຂອງທັງສອງອົງການ ຢ່າງແທ້ຈິງ.
ການລົງນາມຄັ້ງນີ້, ເປັນຂີດໝາຍບາດກ້າວສຳຄັນ ໃນການພົວພັນ, ຮ່ວມມື ລະຫວ່າງ ອົງການໄອຍະການຂອງສອງປະເທດ, ເປັນພື້ນຖານໃຫ້ສອງຝ່າຍ ສ້າງຄວາມເຂົ້າໃຈ ແລະ ແລກປ່ຽນບົດຮຽນ, ສົ່ງເສີມການຮ່ວມມື, ສ້າງຄວາມເຂັ້ມແຂງຂອງອົງການໄອຍະການຂອງສອງປະເທດ, ປະກອບສ່ວນອັນສຳຄັນເຂົ້າໃນການສືບຕໍ່ເສີມຂະຫຍາຍ ສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສປປ ລາວ ແລະ ສາທາລະນະລັດ ກາຊັກສະຖານ ໃຫ້ນັບມື້ແໜ້ນແຟ້ນ, ມີເນື້ອໃນ ແລະ ພັດທະນາຢ່າງໝັ້ນຄົງໃນຕໍ່ໜ້າ ຢ່າງບໍ່ຢຸດຢັ້ງ.
KPL
