KPL
ໃນໄລຍະ 6 ເດືອນຕົ້ນປີຜ່ານມາ, ແຂວງໄຊສົມບູນ ໄດ້ເອົາໃຈໃສ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຕິດພັນກັບດໍາລັດ 414/ລບ ແລະ 2 ວາລະແຫ່ງຊາດຢ່າງແຂງແຮງ ເຮັດໃຫ້ເສດຖະກິດມະຫາພາກຂອງແຂວງ ສືບຕໍ່ຂະຫຍາຍຕົວຢ່າງຕໍ່ເນື່ອງ.
*ໃນໄລຍະ 6 ເດືອນຕົ້ນປີຜ່ານມາ, ແຂວງໄຊສົມບູນ ໄດ້ເອົາໃຈໃສ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຕິດພັນກັບດໍາລັດ 414/ລບ ແລະ 2 ວາລະແຫ່ງຊາດຢ່າງແຂງແຮງ ເຮັດໃຫ້ເສດຖະກິດມະຫາພາກຂອງແຂວງ ສືບຕໍ່ຂະຫຍາຍຕົວຢ່າງຕໍ່ເນື່ອງ ຕາມທິດຫັນເປັນທັນສະໄໝ ໝັ້ນທ່ຽງ ສະເລ່ຍ 8% ລວມຍອດ ຈີດີພີ ມີມູນຄ່າ 2.860,33 ຕື້ກີບ, ສະເລ່ຍໃສ່ຫົວຄົນບັນລຸໄດ້ 27 ລ້ານກວ່າກີບ.
ທ່ານ ອຸດອນ ສິງດາລາ ຫົວໜ້າຫ້ອງວ່າການ ແຂວງໄຊສົມບູນ ໄດ້ລາຍງານການຈັດຕັ້ງປະຕິບັດວຽກງານທີ່ພົ້ນເດັ່ນ ຂອງອົງການປົກຄອງແຂວງປະຈໍາ 6 ເດືອນ ຕົ້ນປີ ແລະ ທິດທາງແຜນການ 6 ເດືອນທ້າຍປີ 2025 ໃນກອງປະຊຸມອົງການປົກຄອງເປີດກວ້າງເມື່ອບໍ່ດົນມານີ້ວ່າ: ໃນໄລຍະຜ່ານມາ ອົງການປົກຄອງແຂວງໄຊສົມບູນ ໄດ້ເອົາໃຈໃສ່ສຶກສາອົບຮົມການເມືອງ-ນໍາພາແນວຄິດຢ່າງທົ່ວເຖິງເລິກເຊິ່ງ ແລະ ເຮັດເປັນປົກກະຕິ ອັນພົ້ນເດັ່ນແມ່ນໄດ້ສຳເລັດກອງປະຊຸມສະຫລຸບຕີລາຄາ ການຈັດຕ້ັງປະຕິບັດດຳລັດ 414/ລບ (2019-2024) ແລະ ທິດທາງແຜນການ 2025-2029, ສໍາເລັດການຈັດຕັ້ງເຜີຍແຜ່ເຊື່ອມຊຶມນິຕິກຳການໂຮມບາງຂະແໜງການຂັ້ນແຂວງ-ຂັ້ນເມືອງ ແລະ ສຳເລັດການປະກາດບັນດາຂະແໜງການຂອງແຂວງ ແລະ ບັນດາ 5 ເມືອງ ແຮກສ່ຽວກັບບັນດາບ້ານໃນທົ່ວແຂວງ.
ພ້ອມນີ້, ກໍໄດ້ຫັນພະນັກງານລົງກໍ່ສ້າງຮາກຖານການເມືອງ ຕາມ 4 ເນື້ອໃນ 4 ຄາດໝາຍ ຢູ່ 13 ບ້ານຈຸດສຸມ ຄຽງຄູ່ກັບການຈັດຕັ້ງເຜີຍແຜ່ເຊື່ອມຊຶມບັນດານິຕິກຳສໍາຄັນຕ່າງໆ ທີ່ຕິດພັນກັບວຽກງານປ້ອງກັນຊາດ- ປ້ອງກັນຄວາມສະຫງົບ, ການຈັດ ຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໃນນ້ີ, ສາມາດມ້າງເປ້ົາໝາຍຄ້າ- ຂາຍຢາເສບຕິດໄດ້ 19 ລາຍ, ກັກຕົວຜູ້ຖືກຫາໄດ້ 71 ຄົນ, ສ້າງຄອບຄົວ ແລະ ບ້ານປ້ອງກັນຄວາມສະຫງົບດີ ໄດ້ 11 ບ້ານ, ຂຶ້ນທະບຽນສໍາມະໂນຄົວໃໝ່, ປ່ຽນປຶ້ມສຳມໂນຄົວໃໝ່, ແຍກປຶ້ມສຳມະໂນຄົວ ແລະ ພິມສໍາມະໂນຄົວລະບົບທັນສະໄໝ ໄດ້ 400 ກວ່າຄອບຄົວ. ນອກຈາກນີ້, ຍັງມີໂຄງການລົງທຶນຂອງລັດ 170 ໂຄງການ ມູນຄ່າ 177 ກວ່າຕື້ກີບ, ສູນກາງອະນຸມັດ 54 ໂຄງການສາມາດຈັດເກັບລາຍຮັບເຂົ້າງົບປະມານ ໄດ້ 1.200 ກວ່າຕື້ກີບ, ສາມາດຄຸ້ມຄອງລາຍຈ່າຍໄດ້ 190 ກວ່າຕື້ກີບ ສ່ວນວຽກງານດ້ານອື່ນໆກໍໄດ້ມີການຈັດຕັ້ງປະຕິບັດເຊັ່ນດຽວກັນ.
ໂດຍ: ພຸດທະສອນ ເວດສະວົງ
KPL
