ຂປລ. ສານປະຊາຊົນສູງສຸດ (ສປສສ) ຮ່ວມກັບ ກຳມາທິການຍຸຕິທຳ ສະພາແຫ່ງຊາດ (ສພຊ) ຈັດກອງປະຊຸມຕິດຕາມ ກວດກາ ການປະຕິບັດກົດໝາຍຂອງສະພາແຫ່ງຊາດ ໃນວັນທີ 12 ພຶດສະພາ 2025 ໂດຍການເປັນປະທານຂອງ ທ່ານ ນາງ ທຸມມະລີ ວົງພະຈັນ ປະທານກຳມາທິການຍຸຕິທຳ ສະ ພາແຫ່ງຊາດ, ທ່ານ ບຸນຂວາງ ທະວີສັກ ຮອງເລຂາຄະນະບໍລິຫານງານພັກ, ຮອງປະທານສານປະຊາ ຊົນສູງສຸດ, ມີຫົວໜ້າຄະນະສານ, ຫົວໜ້າກົມ ​ແລະ ຜູ້ພິພາກສາ ເຂົ້າຮ່ວມ.

ກອງປະຊຸມຄັ້ງນີ້, ໄດ້ຮັບຟັງການລາຍງານການຈັດຕັ້ງປະຕິບັດ ກ່ຽວກັບການຕິດຕາມກວດກາ ການເຄົາລົບ ແລະ ປະຕິບັດກົດໝາຍ ເປັນຕົ້ນ ການປະຕິບັດຫລັກການໂຕ້ແຍ່ງ-ໂຕ້ຖຽງ, ການປະຕິ ບັດມະຕິກອງປະຊຸມແຫ່ງຊາດ ກ່ຽວກັບການເຄື່ອນໄຫວວຽກງານ ປະຈຳປີ 2024 ແລະ ທິດທາງແຜນ ການ ປະຈຳປີ 2025  ສະບັບເລກທີ 141/ສພຊ, ລົງວັນທີ 11 ທັນວາ 2024.

ເພື່ອຈັດຕັ້ງປະຕິບັດວຽກງານດັ່ງກ່າວ ໃຫ້ມີຜົນສຳເລັດ, ປະທານສານປະຊາຊົນສູງສຸດ ໄດ້ອອກຂໍ້ຕົກລົງ ວ່າດ້ວຍການແຕ່ງຕັ້ງຄະນະຮັບຜິດຊອບ ລົງຕິດຕາມຊຸກຍູ້ ການໂຕ້ແຍ່ງ-ໂຕ້ຖຽງ ໃນທີ່ປະຊຸມສານ. ຜ່ານການຈັດຕັ້ງປະຕິບັດຕົວຈິງ ຄະນະຮັບຜິດຊອບໄດ້ລົງຕິດຕາມ ຊຸກຍູ້ການໂຕ້ແຍ່ງ-ໂຕ້ຖຽງ ໃນທີ່ປະຊຸມສານ ໄດ້ 7 ແຂວງ ແລະ 19 ເຂດ ໂດຍໄດ້ເຊີນເອົາສະມາຊິກສະພາແຫ່ງຊາດ, ສະ ມາຊິກສະພາປະຊາຊົນ ປະຈຳເຂດເລືອກຕັ້ງແຂວງ, ນະຄອນຫລວງວຽງຈັນ ແລະ ປະຈຳເມືອງ ເຂົ້າຮ່ວມຕິດຕາມນຳ ເພື່ອລົງຕິດຕາມຊຸກຍູ້ໃຫ້ເຫັນຂັ້ນຕອນ, ວິທີການດຳເນີນຄະດີ ຢູ່ສານປະຊາຊົນແຂວງ, ສານປະຊາຊົນເຂດ ໃນການຈັດຕັ້ງປະຕິບັດຕາມກົດໝາຍກຳນົດ ໂດຍສະເພາະ ການໃຫ້ສິດ ແກ່ໂຈດ, ຈຳເລີຍ, ບຸກຄົນທີສາມ ໄດ້ມີການປະກອບຂໍ້ມູນຫລັກຖານ ນຳມາໂຕ້ແຍ່ງ-ໂຕ້ຖຽງ ຕໍ່ເຫດ ການ, ຂໍ້ສະເໜີ ຫລື ຂໍ້ມູນຫລັກຖານ ທີ່ຖືເປັນປະເດັນ ຂອງແຕ່ລະຝ່າຍທີ່ສະເໜີມານັ້ນ ຢ່າງເລິກເຊິ່ງ, ຄົບຖ້ວນ ແລະ ໝົດຈິດໝົດໃຈຂອງທັງສອງຝ່າຍ, ຖືເອົາຜົນຂອງການໂຕ້ແຍ່ງ-ໂຕ້ຖຽງ ເປັນບ່ອນອີງໃນການພິຈາລະນາຕັດສິນ ແລະ ພິພາກສາ ໃຫ້ລະອຽດ, ຈະແຈ້ງ ແລະ ຖືກຕ້ອງ ໂດຍສະເພາະຢູ່ຂັ້ນຕົ້ນ ແລະ ຂັ້ນອຸທອນ, ຮັບປະກັນໃຫ້ຜູ້ພິພາກສາ ໄດ້ນຳໃຊ້ທຸກຂັ້ນຕອນ, ວິທີການພິຈາລະນາແກ້ໄຂຄະດີ ໃຫ້ມີຄວາມແຈ້ງຂາວ, ຕັດສິນ ແລະ ພິພາກສາ ຢ່າງຖືກຕ້ອງ, ເປັນທຳ ແລະ ນຳໄປຈັດຕັ້ງປະຕິ ບັດໄດ້.

ຂໍ້ມູນ-ພາບ: ໜັງສືິພິມປະຊາຊົນ

KPL