ຂປລ. ພິທີເຊັນບົດບັນທຶກຄວາມເຂົ້າໃຈ (MOU) ລະຫວ່າງ ລັດວິສາຫະກິດ ໄຟຟ້າລາວ ແລະ ບໍລິສັດ ສະຕາ ໂທລະຄົມ ຈໍາກັດ (ຢູນີເທວ) ເພື່ອສຶກສາຄວາມເປັນໄປໄດ້ ໃນໃນການຮ່ວມມື ດ້ານທຸລະກິດໂທລະຄົມມະນາຄົມ ແລະ ເຕັກໂນໂລຊີ ຂໍ້ມູນຂ່າວສານ ຈັດຂຶ້ນໃນວັນທີ 3 ຕຸລາ 2024 ຜ່ານມາ ໂດຍການລົງນາມ ລະຫວ່າງ ທ່ານ ເຈີ່ນ ຈຸງ ຮືງ ຜູ້ອໍານວຍການໃຫຍ່ ບໍລິສັດ ສະຕາໂທລະຄົມ  ແລະ ທ່ານ ວົງສະກຸນ ຍິ່ງຍົງ ຜູ້ອໍານວຍການໃຫຍ່ ລັດວິສາຫະກິດ ໄຟຟ້າລາວ ໂດຍມີ ທ່ານ ພົນໂທ ວົງຄໍາ ພົມມະກອນ ຮອງລັດຖະມົນຕີ ກະຊວງປ້ອງກັນປະເທດ, ປະທານສະພາບໍລິຫານ ບໍລິສັດ ສະຕາ ໂທລະຄົມ ຈໍາກັດ ແລະ ທ່ານ ທອງພັດ ອິນທະວົງ ຮອງລັດຖະມົນຕີ ກະຊວງພະລັງງານ ແລະ ບໍ່ແຮ່, ປະທານສະພາບໍລິຫານ ລັດວິດສາຫະກິດ ໄຟຟ້າລາວ ແລະ ພາກສ່ວນກ່ຽວຂ້ອງ ເຂົ້າຮ່ວມເປັນສັກຂີພິຍານ.  

ການຮ່ວມມືໃນຄັ້ງນີ້, ເພື່ອສຶກສາຄວາມເປັນໄປໄດ້ ທາງດ້ານເສດຖະກິດ-ເຕັກນິກ ກ່ຽວກັບ ການດໍາເນີນທຸລະກິດທາງດ້ານໂທລະຄົມ ຮ່ວມກັນລະຫວ່າງ ລັດວິສາຫະກິດໄຟຟ້າລາວ ແລະ ບໍລິສັດ ສະຕາ ໂທລະຄົມ ຈໍາກັດ ພາຍໃຕ້ໃບອະນຸຍາດດໍາເນີນທຸລະກິດສື່ສານ, ສະໜອງເຕັກໂນໂລຊີ ຂໍ້ມູນຂ່າວສານ ແລະ ການຊໍາລະຜ່ານເອເລັກໂຕຣນິກ ຂອງ ບໍລິສັດ ສະຕາໂທລະຄົມ ຈໍາກັດ ທີ່ໄດ້ອະນຸຍາດຈາກລັດຖະບານ ເຊິ່ງຈະບໍລິການລູກຄ້າ ທັງພາຍໃນ ແລະ ຕ່າງປະເທດ. ພ້ອມກັນນັ້ນ, ທັງ 2 ຝ່າຍເຫັນດີເປັນເອກະພາບກັນ ໃນການສ້າງລາຍຮັບຮ່ວມກັນ. ພ້ອມນີ້, ຍັງຈະໄດ້ສຶກສາຄວາມເປັນໄປໄດ້ ໃນການຮ່ວມກັນສ້າງຕັ້ງ ບໍລິສັດຮ່ວມທຶນ ໃຫ້ບໍລິການໃນການຕິດຕັ້ງສ້ອມແປງໄຟຟ້າ ຂະໜາດນ້ອຍ-ກາງ, ບໍລິການຕິດຕັ້ງອິນເຕີເນັດມີສາຍ ໃຫ້ແກ່ບັນດາບໍລິສັດໂທລະຄົມ, ຄຸ້ມຄອງຈັດການບໍລິຫານວຽກງານການຈົດ ແລະ ເກັບຄ່າກະແສໄຟຟ້າໃຫ້ແກ່ ລັດວິສາຫະກິດ ໄຟຟ້າລາວ ໃນຂອບເຂດທົ່ວປະເທດ.

ໂອກາດນີ້, ທ່ານ ພົນໂທ ວົງຄໍາ ພົມມະກອນ ໄດ້ມີຄໍາເຫັນວ່າ: ການຮ່ວມມືຂອງທັງສອງຝ່າຍໃນຄັ້ງນີ້ ແມ່ນຂີດໝາຍສໍາຄັນຂອງການຮ່ວມມື ວິສາຫະກິດຂະໜາດໃຫຍ່ ຂອງ ສປປ ລາວ ແນໃສ່ວຽກງານການຮ່ວມມື ສຶກສາຄົ້ນຄວ້າການຫັນເປັນດີຈິຕອນ ນຳໃຊ້ເຕັກໂນໂລຊີທັນສະໄໝເຂົ້າໃນວຽກງານການຄຸ້ມຄອງ, ການສະໜອງບໍລິການໃຫ້ແກ່ລູກຄ້າ ທັງພາຍໃນ ແລະ ຕ່າງປະເທດ ໃນຍຸກປະຕິວັດອຸດສະຫະກໍາ 4.0 ເພື່ອເປັນການຊຸກຍູ້ສົ່ງເສີມການຄຸ້ມຄອງ, ການບໍລິຫານ ລວມທັງການບໍລິການໃຫ້ແກ່ລັດຖະບານ ແລະ ສັງຄົມ ຕອບສະໜອງໄດ້ກັບຄວາມຕ້ອງການ ດ້ວຍລະບົບເຕັກໂນໂລຊີ ທີ່ທັນສະໄໝຕາມນະໂຍບາຍ ແລະ ແຜນພັດທະນາຂອງລັດຖະບານ, ບຸກຄະລາກອນ ຮັບປະກັນສິດຜົນ ປະໂຫຍດ ທັງສອງຝ່າຍຕາມຈຸດປະສົງ ຂອງໂຄງການຮ່ວມມື. ພ້ອມນີ້, ຍັງໄດ້ຮຽກຮ້ອງມາຍັງພາກ ສ່ວນກ່ຽວຂ້ອງ ແລະ ຜູ້ຈັດຕັ້ງປະຕິບັດ, ຄຸ້ມຄອງຕົວຈິງ ໃນການດໍາເນີນທຸລະກິດ ເປັນຕົ້ນ ໃຫ້ພ້ອມກັນຄົ້ນຄວ້າ ແລະ ສຶກສາຜັນຂະຫຍາຍ My EDL ເຂົ້າໃນວຽກງານການຈົດກະແສໄຟຟ້າ; ພ້ອມກັນຄົ້ນຄວ້າ ແລະ ສຶກສາການຊໍາລະຄ່າກະແສໄຟຜ່ານແອັບ U-money ໃນຂອບເຂດທົ່ວປະເທດ; ພ້ອມກັນຄົ້ນຄວ້າ ແລະ ສຶກສາການຈັດຕັ້ງບໍລິສັດຮ່ວມທຶນເພື່ອບໍລິຫານລາຍຮັບ ແລະ ໃຫ້ບໍລິການຕິດຕັ້ງສ້ອມແປງ ດ້ານໂທລະຄົມມະນາຄົມ, ຂະແໜ່ງການພະລັງງານໄຟຟ້າ. ພ້ອມທັງ ໃຫ້ເອົາໃຈໃສ່ໃນການຄົ້ນຄວ້າ, ປຶກສາ, ເຈລະຈາ ເພື່ອເຮັດໃຫ້ການຮ່ວມດໍາເນີນທຸລະກິດ ມີການປະນີປະນອມ ເຊິ່ງກັນ ແລະ ກັນ ບົນພື້ນຖານຫລັກການ, ຕ່າງຝ່າຍຕ່າງມີຜົນປະໂຫຍດຮ່ວມກັນ ແລະ ຊ່ວຍເຫລືອສັງຄົມຢ່າງຈິງໃຈ. ການຮ່ວມດໍາເນີນທຸລະກິດ ຕ້ອງຢູ່ບົນພື້ນຖານລະບຽບຫລັກການ, ແນວທາງນະໂຍບາຍຂອງພັກ-ລັດ, ມີຄວາມໂປ່ງໃສ, ຍຸຕິທໍາ, ກໍານົດລະບຽບການຄຸ້ມຄອງຢ່າງຮັດກຸມ ແລະ ສອດຄອງຕາມລະ ບຽບກົດໝາຍ ວ່າດ້ວຍການດໍາເນີນທຸລະກິດ ແຫ່ງ ສປປ ລາວ.

ທ່ານ ທອງພັດ ອິນທະວົງ ໄດ້ມີຄຳເຫັນວ່າ: ການເຊັນບົດບັນທຶກຄວາມເຂົ້າໃຈ ໃນວຽກງານດັ່ງກ່າວ, ເປັນນິມິດໝາຍອັນດີ ເຮັດໃຫ້ວຽກງານ ລະຫວ່າງສອງຂະແໜງການ ມີຄວາມວ່ອງໄວ, ທັນສະໄໝ ແລະ ໄດ້ຮັບການພັດທະນາ ຂຶ້ນໄປເລື້ອຍໆ. ພ້ອມທັງ ສະເໜີໃຫ້ມີການແຕ່ງຕັ້ງຄະນະເຮັດວຽກຮ່ວມກັນເພືີ່ອຊຸກຍູ້ບັນດາໜ້າວຽກການສຶກສາ ໃຫ້ດໍາເນີນໄປຢ່າງມີປະສິດທິພາບ ແລະ ປະສິດທິຜົນສູງສຸດ ໂດຍເປັນໄປຕາມກອບບົດບັນທຶກຄວາມເຂົ້າໃຈ ຂອງສອງຝ່າຍ.

ພາບ: ອ່າຍຄຳ

KPL