KPL
ຂປລ. ວັນທີ 5 ກໍລະກົດ 2024 ຜ່ານມາ, ທີ່ສຳນັກງານປະທານາທິບໍດີ ສ ແຊັກບີ, ນະຄອນຫລວງເບນກຣາດ (Belgrade), ປະເທດ ສ ແຊັກບີ, ທ່ານ ຄໍາພອນ ວົງສັນຕິ ເອກອັກຄະລັດຖະທູດ ວິສາມັນ ຜູ້ມີອຳນາດເຕັມ ແຫ່ງ ສປປ ລາວ ໄດ້ຍື່ນສານຕາຕັ້ງຕໍ່ ທ່ານ ອາເລັກຊານດາ ວູຊິກ (H.E. Mr. Aleksandar Vučić) ປະທານາທິບໍດີແຫ່ງ ສາທາລະນະລັດ ແຊັກບີເພື່ອດຳລົງຕຳແໜ່ງ ເປັນເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຄົນໃໝ່ ປະຈຳ ສ ແຊັກບີ ເຊິ່ງມີສຳນັກງານຕັ້ງຢູ່ ນະຄອນຫລວງ ບູດາແປສ, ປະເທດ ຮົງກາຣີ.
ຂປລ. ວັນທີ 5 ກໍລະກົດ 2024 ຜ່ານມາ, ທີ່ສຳນັກງານປະທານາທິບໍດີ ສ ແຊັກບີ, ນະຄອນຫລວງເບນກຣາດ (Belgrade), ປະເທດ ສ ແຊັກບີ, ທ່ານ ຄໍາພອນ ວົງສັນຕິ ເອກອັກຄະລັດຖະທູດ ວິສາມັນ ຜູ້ມີອຳນາດເຕັມ ແຫ່ງ ສປປ ລາວ ໄດ້ຍື່ນສານຕາຕັ້ງຕໍ່ ທ່ານ ອາເລັກຊານດາ ວູຊິກ (H.E. Mr. Aleksandar Vučić) ປະທານາທິບໍດີແຫ່ງ ສາທາລະນະລັດ ແຊັກບີເພື່ອດຳລົງຕຳແໜ່ງ ເປັນເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຄົນໃໝ່ ປະຈຳ ສ ແຊັກບີ ເຊິ່ງມີສຳນັກງານຕັ້ງຢູ່ ນະຄອນຫລວງ ບູດາແປສ, ປະເທດ ຮົງກາຣີ.
ການເຂົ້າຮ່ວມພິທີດັ່ງກ່າວ, ປະກອບມີບັນດາທ່ານເອກອັກຄະລັດຖະທູດ ທີ່ບໍ່ມີສຳນັກງານສະຖານທູດ ຕັ້ງຢູ່ ສ ແຊັກບີ ເຂົ້າຮ່ວມທັງໝົດ 14 ປະເທດ ຄື: ສາທາລະນະລັດເຊຍຣາເລ ອອນ (Sierra Leone), ໄທ, ນາມີເບຍ, ອາຟຣິກາໃຕ້, ຊອກດານີ(Jordan), ບຸຣຸນດີ (Burundi), ຊໍາບີ (Zambia), ກາເມີຣຸນ(Cameroon), ຕັງຊານີ(Tanzania), ເປຣູ, ລິດຕົວນີ, ກົວເຕມາລາ, ລຸກຊໍາບວກ ແລະ ສປປ ລາວ.
ພາຍຫລັງສຳເລັດພິທີ, ທ່ານເອກອັກຄະລັດຖະທູດລາວຄົນໃໝ່ ໄດ້ພົບປະໂອ້ລົມ ກັບ ທ່ານປະທານາທິບໍດີ ໂດຍໄດ້ຕີລາຄາສູງຕໍ່ ການພົວພັນທີ່ດີລະຫວ່າງ ສປປ ລາວ ແລະ ສ ແຊັກບີທີ່ມີມາແຕ່ດົນນານ ນັບຕັ້ງແຕ່ສອງປະເທດ ໄດ້ສ້າງຕັ້ງສາຍພົວພັນການທູດນຳກັນ ໃນວັນທີ 25ກັນຍາ 1962 ເປັນຕົ້ນມາ ເຊິ່ງສອງຝ່າຍໄດ້ມີຄວາມພະຍາຍາມ ເສີມຂະຫຍາຍສາຍພົວພັນ ແລະການຮ່ວມມືຢູ່ໃນເວທີພາກພື້ນ ແລະ ສາກົນ ລວມທັງການພົວພັນສອງຝ່າຍ ໂດຍສະເພາະວຽກງານການສຶກສາ, ການທ່ອງທ່ຽວ ແລະ ເສດຖະກິດໃຫ້ຂະຫຍາຍຕົວເພີ່ມຂຶ້ນ. ພ້ອມກັນນີ້, ທ່ານເອກອັກຄະລັດຖະທູດ ກໍໄດ້ນຳເອົາຄວາມຢື້ຢາມຖາມຂ່າວອັນອົບອຸ່ນ ພ້ອມດ້ວຍພອນໄຊອັນປະເສີດຈາກ ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ສົ່ງເຖິງ ທ່ານ ອາເລັກຊານດາ ວູຊິກ ແລະ ຜ່ານທ່ານໄປຍັງລັດຖະບານ ແລະ ປະຊາຊົນແຊັກບີ ທຸກທົ່ວໜ້າ. ນອກຈາກນັ້ນ, ທ່ານເອກອັກຄະລັດຖະທູດ ຍັງໄດ້ນໍາເອົາຄໍາເຊື້ອເຊີນຈາກ ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ເຖິງ ທ່ານ ປະທານາທິບໍດີ ສ ແຊັກບີ ເພື່ອໄປຢ້ຽມຢາມ ສປປ ລາວຢ່າງເປັນທາງການ ໃນໂອກາດທີ່ເໝາະສົມ.
ໃນໂອກາດດັ່ງກ່າວ, ທ່ານ ອາເລັກຊານດາ ວູຊິກ ກໍໄດ້ສະແດງຄວາມຍິນດີ ແລະ ຊົມ ເຊີຍ ທ່ານ ຄໍາພອນ ວົງສັນຕິ ໃນການດໍາລົງຕໍາແໜ່ງເປັນ ເອກອັກຄະລັດຖະທູດ ສປປ ລາວ ຄົນໃໝ່ປະຈຳ ສ ແຊັກບີ ແລະ ໄດ້ສະແດງຄວາມຂອບໃຈຕໍ່ຄໍາອວຍພອນ ແລະ ການເຊື້ອເຊີນຈາກປະທານປະເທດ ແຫ່ງ ສປປ ລາວ, ພ້ອມທັງສົ່ງຄຳຢື້ຢາມຖາມຂ່າວອັນອົບອຸ່ນ ແລະອວຍ ພອນໄຊອັນປະເສີດມາຍັງ ທ່ານ ທອງລຸນ ສີສຸລິດ ປະທານປະເທດ, ລັດຖະບານ ແລະ ປະຊາຊົນລາວທຸກທົ່ວໜ້າ ແລະ ອວຍພອນໃຫ້ທ່ານເອກອັກຄະລັດຖະທູດ ແຫ່ງ ສປປ ລາວ ຄົນໃໝ່ ປະຕິບັດໜ້າທີ່ການທູດຂອງຕົນ ດ້ວຍຜົນສຳເລັດໃນການສົ່ງເສີມສາຍພົວພັນມິດຕະພາບ ແລະການຮ່ວມມືລະຫວ່າງ ສອງປະເທດໃຫ້ຂະຫຍາຍຕົວໃນຕໍ່ໜ້າ.
KPL
