ຂປລ. ກອງປະຊຸມວິຊາການ ດ້ານຊັບພະຍາກອນມະນຸດ ສາທາລະນະສຸກ ອາຊີ-ປາຊີຟີກ ຄັ້ງທີ 13 ຈັດ​ຂຶ້ນ​ໃນໃນວັນທີ 29-30 ຕຸລາ 2024 ຢູ່ນະຄອນຫລວງວຽງຈັນ ພາຍໃຕ້ການເປັນປະທານຂອງ ທ່ານ ດຣ ມາຍຟອງ ມາຍຊາຍ ຮອງອະທິການບໍດີມະຫາວິທະຍາໄລ ວິທະຍາສາດ ສຸຂະພາບ, ປະທານພັນທະມິດຊັບພະຍາກອນມະນຸດ ໃນຂົງເຂດ ອາຊີ-ປາຊີຟິກ ​ໂດຍ​ມີ​ໂດຍ​ມີ ທ່ານ ສະໜອງ ທອງຊະນະ ຮອງລັດຖະມົນຕີ ກະຊວງສາທາລະນະສຸກ, ທ່ານເອກອັກຄະລັດຖະທູດຝຣັ່ງ ປະຈໍາ ສປປ ລາວ ແລະ ປະເທດສະມາຊິກ 26 ປະເທດ, ພ້ອມທັງແຂກ ພາຍໃນປະເທດ ທີ່ມາຈາກພະແນກສາທາ ລະນະສຸກແຂວງ, ໂຮງໝໍແຂວງ, ສະຖານການສຶກສາສາທາລະນະສຸກ, ຄູ່ຮ່ວມພັດທະນາ, ອົງການຈັດ ຕັ້ງສາກົນ ແລະ ກົມກອງອ້ອມຂ້າງກະຊວງສາທາລະນະສຸກ ເຂົ້າຮ່ວມ.

ກອງປະຊຸມຈັດ​ຂຶ້ນ, ເພື່ອສ້າງຄວາມສາມາດໃນການກະກຽມ ແລະ ການຕອບໂຕ້ ຂອງພະນັກ ງານສາທາລະນະສຸກ ແລະ ລະບົບສາທາລະນະສຸກ ເພື່ອການຮັບມືກັບ ເຫດການສຸກເສີນ ດ້ານສາທາລະນະສຸກ ໃນອະນາຄົດຢ່າງມີປະສິດທິພາບ, ພ້ອມດຽວກັນກໍຮັກສາການເຮັດໜ້າທີ່ ບໍລິການທີ່ຈໍາເປັນຢ່າງເປັນປົກກະຕິ; ມອບລາງວັນ ແລະ ຍ້ອງຍໍ ການມີສ່ວນຮ່ວມ ແລະ ຄວາມຄິດລິເລີ່ມທີ່ເປັນແບບຢ່າງ ໃນການກະກຽມຄວາມພ້ອມຕໍ່ເຫດການສຸກເສີນ ສາທາລະນະສຸກ; ເສີມສ້າງຂີດຄວາມສາມາດ ຂອງເຄືອຂ່າຍພັນທະມິດ ຊັບພະຍາກອນມະນຸດ ໃນຂົງເຂດ ອາຊີ-ປາຊີຟິກ (AAAH), ອໍານວຍຄວາມສະ ດວກໃນການຮ່ວມມື, ສັງລວມບັນດາຜົນສໍາເລັດຂອງແຕ່ລະປະເທດ ແລ້ວຈັດບູລິມະສິດໃນການຈັດ ຕັ້ງປະຕິບັດຂອງຂົງເຂດ ເພື່ອສ້າງພະນັກງານສາທາລະນະສຸກ ທີ່ສາມາດປັບຕົວໄດ້ຕໍ່ເຫດການສຸກເສີນ ທາງດ້ານສາທາລະນະສຸກ.

ກອງປະຊຸມ​ໄດ້ມີການແລກປ່ຽນບົດຮຽນ, ສົນທະນາກ່ຽວກັບການວາງແຜນຕໍ່ການ ສ້າງຄວາມສາມາດໃນການກະກຽມ ແລະ ການຕອບໂຕ້ ຂອງພະນັກງານສາທາລະນະສຸກ ແລະ ລະບົບສາທາລະນະສຸກ ເພື່ອການຮັບມືກັບເຫດການສຸກເສີນ ດ້ານສາທາລະນະສຸກໃນອະນາຄົດ ຢ່າງມີປະສິດທິພາບ, ພ້ອມດຽວກັນກໍຮັກສາ ການເຮັດໜ້າທີ່ບໍລິການ ທີ່ຈໍາເປັນຢ່າງເປັນປົກກະຕິ. ພ້ອມ​ນີ້, ຜູ້ເຂົ້າຮ່ວມຍັງໄດ້ໄປຖອດຖອນບົດຮຽນ ຢູ່ມະຫາວິທະຍາໄລ ວິທະຍາສາດສຸຂະພາບ ກ່ຽວກັບການກໍ່ສ້າງພະນັກງານ ໃນການຕອບໂຕ້ຕໍ່ເຫດການສຸກເສີນ ທາງດ້ານສາທາລະນະສຸກ ໃນອະນາຄົດທີ່ອາດຈະເກີດຂຶ້ນ; ລົງ​ຕິ​ດ ຕາມເບິ່ງຄວາມພ້ອມຂອງສູນວິເຄາະ ແລະ ລະບາດວິທະຍາ, ສູນເລືອດແຫ່ງຊາດ, ໃນການກວດວິ ເຄາະ ແລະ ສະໜອງເລືອດ ຖ້າມີກໍລະນີເກີດເຫດການສຸກເສີນ ທາງດ້ານສາທາລະນະສຸກ ​ແລະ ໄປຢ້ຽມຢາມສຸກສາລາ ແລະ ບ້ານນາກຸງ ເມືອງໄຊທານີ ເພື່ອເບິ່ງການປະກອບສ່ວນຕໍ່ຊຸມຊົນ ໃນການຕອບໂຕ້ຕໍ່ເຫດການສຸກເສີນ.

ຂ່າວ: ສົມຫວັງ

ພາບ: ເກດສະໜາ

KPL