ຂປລ. ​ໃນ​ໂອກາດລົງ​ເຄື່ອນ​ໄຫວຢ້ຽມຢາມ ​ແລະ ​ເຮັດ​ວຽກ​ຢູ່​ແຂວງ​ບໍລິ​ຄຳ​ໄຊ ເມື່ອບໍ່ດົນມານີ້, ທ່ານ ນາງ ສີ​ໃສ ລືເດດມູນສອນ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ​​ໄດ້ພົບ​ປະໂອ້ລົມ ການນຳ ແລະ ອຳນາດການປົກຄອງແຂວງບໍລິຄຳໄຊ ຫລາຍ​ບັນຫາ​ສຳຄັນ ​ໃນ​ການ​ກະກຽມ ​ແລະ ດຳ​ເນີນ​ກອງ​ປະຊຸມ​ໃຫຍ່ 3 ຂັ້ນ ຢູ່​ແຂວງ​ບໍລິ​ຄຳ​ໄຊ ໂດຍ​ໄດ້​ຮັບການຕ້ອນຮັບຂອງ ທ່ານ ສອນທະນູ ທຳມະວົງ ກຳມະການສູນກາງພັກ, ເລຂາພັກແຂວງ ເຈົ້າແຂວງບໍລິຄຳໄຊ, ພ້ອມດ້ວຍການນຳຂອງແຂວງ ​ແລະ ຫົວໜ້າພະແນກການອ້ອມຂ້າງເຂົ້າຮ່ວມ.

​ໂອກາດ​ນີ້, ທ່ານ ນາງ ສີໃສ ລືເດດມູນສອນ ກໍໄດ້ເນັ້ນໃຫ້ອົງຄະນະພັກແຂວງບໍລິຄຳໄຊ ເພີ່ມທະວີເອົາໃຈໃສ່ຕໍ່ວຽກງານກໍ່ສ້າງພັກ-ພະນັກງານ ແລະ ການກະກຽມກອງປະຊຸມໃຫຍ່ 3 ຂັ້ນຂອງຄະ ນະພັກແຕ່ລະຂັ້ນ, ຄົ້ນຄວ້າ, ສະຫລຸບຕີລາຄາການຈັດຕັ້ງປະຕິບັດ ກົດລະບຽບຂອງພັກສະໄໝທີ XI ຍັງມີບັນຫາໃດ ທີ່ຍັງບໍ່ທັນຈະແຈ້ງ ແລະ ຄວນປັບປຸງ ໃນກົດລະບຽບພັກສະໄໝທີ XII, ເອົາໃຈໃສ່ເຊື່ອມຊຶມຄໍາສັ່ງເລກທີ 411/ຄລສພ, ຄໍາແນະນຳເລກທີ 211/ຄຈສພ ແລະ ແຈ້ງການຂອງຄະນະຈັດຕັ້ງ ສູນກາງພັກເລກທີ 99/ຄຈສພ ກ່ຽວກັບການກະກຽມ ແລະ ດໍາເນີນກອງປະຊຸມໃຫຍ່ອົງຄະນະພັກ ເເຂວງຢ່າງລະອຽດ ແລະ ທົ່ວເຖິງ, ພ້ອມທັງລາຍງານ ໄປຍັງຄະນະຈັດຕັ້ງສູນກາງພັກ ເພື່ອຕິດຕາມຮ່ວມກັນ; ເອົາໃຈໃສ່ຕິດຕາມແກ້ໄຂ ບັນຫາເສດຖະກິດ-ການເງິນ ດ້ວຍການວາງກົນໄກ, ລະບຽບການຕ່າງໆຢ່າງເໝາະສົມ, ຖືເອົາວຽກງານການສຶກສາອົບຮົມ ການເມືອງ-ແນວຄິດເປັນພື້ນຖານ ເພື່ອໃຫ້ພະນັກງານ, ທະຫານ, ຕໍາຫລວດປະກອບສ່ວນ ປະຕິບັດໜ້າທີ່ໄດ້ດີຂຶ້ນ ໂດຍບໍ່ສວຍໃຊ້ບັນຫາດັ່ງກ່າວ ເປັນຊ່ອງວ່າງໃນການຫລີກເວັ້ນ ການປະຕິບັດວຽກງານ. ພ້ອມນີ້, ການປະຕິບັດ 2 ວາລະແຫ່ງຊາດ ຍັງເປັນວຽກໜຶ່ງທີ່ສໍາຄັນ ທີ່​ຈະ​ຕ້ອງ​ໄດ້​ສືບ​ຕໍ່​ເອົາ​ໃຈ​ໃສ່.

ໃນໂອກາດດຽວ​ກັນ, ທ່ານ ສອນທະນູ ທຳມະວົງ ກໍ​ໄດ້ລາຍງານໂດຍຍໍ້ກ່ຽວກັບ ວຽກງານການພັດທະນາເສດຖະກິດສັງຄົມຂອງແຂວງ ໂດຍສະເພາະ ການຄ້າ, ການລົງທຶນ, ການແກ້ໄຂໄພນ້ຳຖ້ວມ ໃນເມືອງທ່າພະບາດ, ເມືອງປາກຊັນ ແລະ ເມືອງອື່ນໆ. ທັງນີ້, ກໍເພື່ອຊອກຫາວິທີແກ້ໄຂ ເພື່ອຕອບໂຕກັບໄພພິບັດ ໂດຍເນັ້ນໃສ່ຟື້ນຟູ ຊິວິດການເປັນຢູ່ຂອງປະຊາຊົນ ທີ່ຖືກຜົນກະທົບໃນປັດຈຸບັນ.

ຂ່າວ-ພາບ: ຄຳຟອງ

KPL