ຂປລ
ຂປລ. ໃນວັນທີ 29 ທັນວາ 2023 ນີ້, ໂຮງຮຽນວັດທະນະທຳຊົນເຜົ່າກອງທັບ ສ້າງຂະບວນການອອກແຮງງານ ອະນາໄມອ້ອມຮອບໂຮງຮຽນ ເພື່ອສະເຫລີມສະຫລອງວັນ ສ້າງຕັ້ງກອງທັບປະຊາຊົນລາວ ຄົບຮອບ 75 ປີ
ຂປລ. ໃນວັນທີ 29 ທັນວາ 2023 ນີ້, ໂຮງຮຽນວັດທະນະທຳຊົນເຜົ່າກອງທັບ ສ້າງຂະບວນການອອກແຮງງານ ອະນາໄມອ້ອມຮອບໂຮງຮຽນ ເພື່ອສະເຫລີມສະຫລອງວັນ ສ້າງຕັ້ງກອງທັບປະຊາຊົນລາວ ຄົບຮອບ 75 ປີ ນຳໂດຍ ທ່ານ ພັນເອກ ສະແຫວງ ແດນນາມົນ ຫົວໜ້າການເມືອງ ໂຮງຮຽນວັດທະນະທຳຊົນເຜົ່າກອງທັບ, ມີຄະນະພັກ, ຄະນະອຳນວຍການໂຮງຮຽນ, ຄະນະພັກ, ຄະນະບັນຊາຫ້ອງການ, ກອງພັນ, ພະນັກງານ-ນັກຮົບ ແລະ ນ້ອງນັກຮຽນ ເຂົ້າຮ່ວມ ຢ່າງເປັນຂະບວນຟົດຟື້ນ.
ທ່ານ ພັນເອກ ສະແຫວງ ແດນນາມົນ ກ່າວວ່າ: ການຈັດກິດຈະກຳ ອອກແຮງງານລວມໃນຄັ້ງນີ້, ເພື່ອສ້າງຂະບວນການຂ່ຳນັບຮັບຕ້ອນ ວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ໃຫ້ເປັນຂະບວນການຟົດຟື້ນ, ທັງເປັນການຂ່ຳນັບຮັບຕ້ອນກອງປະຊຸມໃຫຍ່ສະມາຊິກພັກຂອງບັນດາໜ່ວຍພັກ ແລະ ກອງປະຊຸມໃຫຍ່ອົງຄະນະພັກໂຮງຮຽນວັດທະນະທຳຊົນເຜົ່າກອງທັບ ທີ່ຈະມາເຖິງໃນຕໍ່ໜ້ານີ້, ແນໃສ່ເຮັດໃຫ້ກົມກອງ ກໍຄື ໂຮງຮຽນມີຄວາມ ສະອາດງາມຕາມ, ມີຄວາມເປັນລະບຽບຮຽບຮ້ອຍປະຕິບັດຕາມຄຳຂວັນທີ່ວ່າ: “ກິນສະອາດ ຢູ່ສະອາດ ປາສະຈາກໂລກໄພ’’.
ທ່ານ ພັນເອກ ສະແຫວງ ແດນນາມົນ ຍັງກ່າວອີກວ່າ: ເນື່ອງໃນໂອກາດ ວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ທີ່ຈະມາເຖິງນີ້, ໂຮງຮຽນວັດທະນະທໍາຊົນເຜົ່າກອງທັບ ໄດ້ກະກຽມຫລາຍກິດຈະກໍາ ເພື່ອສະເຫລີມສະຫລອງວັນດັ່ງກ່າວ ເປັນຕົ້ນ ໂຄສະນາມູນເຊື້ອອັນປີຊາສາມາດຂອງກອງທັບ, ຈັດຕັ້ງສ້າງຂະບວນການຕ່າງໆ ພາຍໃນໂຮງຮຽນໃຫ້ເປັນຂະບວນຟົດຟື້ນ ແລະ ກິດຈະກໍາແຂ່ງຂັນກິລາ ເພື່ອໃຫ້ມີບັນຍາກາດຟົດຟື້ນ. ໃນລະຍະຜ່ານມາ ໂຮງຮຽນວັດທະນະທໍາຊົນເຜົ່າກອງທັບ ກໍໄດ້ຈັດຕັ້ງສະຫລອງວັນສ້າງຕັ້ງກອງທັບ ສໍາເລັດຫລາຍກິດຈະກໍາ ເປັນຕົ້ນ ກິດຈະກໍາປູກຕົ້ນໄມ້, ໂຄສະນາເຜີຍແຜ່ວັນດັ່ງກ່າວ ໃຫ້ມີຄວາມໝາຍຄວາມສໍາຄັນຢ່າງເປັນປະຈໍາ, ເປີດບັ້ນດໍາເນີນຊີວິດການເມືອງ, ຍູ້ແຮງການກະກຽມດໍາເນີນກອງປະຊຸມໃຫຍ່ 3 ຂັ້ນຂອງພັກໃນຂັ້ນຂອງຕົນ ແລະ ເປີດຂະບວນກິລາ ພາຍໃນໂຮງຮຽນ, ສົ່ງນັກກິລາໄປຮ່ວມແຂ່ງຂັນກິລານັກຮຽນທີ່ທາງ ຫ້ອງການສຶກສາ ເມືອງໄຊເສດຖາ, ຂະບວນການໄປແລກປ່ຽນບົດຮຽນແຮກສຽວ ກັບໂຮງຮຽນວັດທະນະທໍາຫລັກ 67 ກະຊວງປ້ອງກັນຄວາມສະຫງົບ ແລະ ຂະບວນການອອກແຮງງານອື່ນໆ ຢ່າງເປັນຂະບວນຟົດຟື້ນ.
ທ່ານ ພັນເອກ ສະແຫວງ ແດນນາມົນ ໃຫ້ຮູ້ອີກວ່າ: ຕະຫລອດໄລຍະ 75 ປີຜ່ານມາ ຮອດປັດຈຸບັນ, ກອງທັບປະຊາຊົນລາວ ມີການຫັນປ່ຽນຢ່າງຕັ້ງໜ້າ ໂດຍສະເພາະຄຸນນະພາບ ຂອງບຸກຄະລາກອນ, ພະນັກງານນັກ ຮົບ ໃນການນຳພາບັນຊາ ແມ່ນມີຄວາມເຂັ້ມແຂງ, ເປັນຂະບວນການ ຂຶ້ນກວ່າເກົ່າ ໂດຍເລັ່ງໃສ່ວຽກງານການເມືອງແນວຄິດເປັນກົກ ຢູ່ແຕ່ລະກົມກອງ, ມີຫລາຍກົມກອງຍາດໄດ້ເປັນ ກອງແຂງໜ່ວຍພັກຮູ້ນຳພາຮອບດ້ານ, ເປັນກອງສາມປອດ, ເປັນກອງວັດທະນະທຳ ແລະ ເປັນໜ່ວຍພັກປອດໄສເຂັ້ມແຂງໜັກແໜ້ນ.
ຂ່າວ-ພາບ: ທະນູທອງ
KPL
