ຂປລ.ເພື່ອປະກອບສ່ວນຮັດແໜ້ນ ແລະ ເສີມຂະຫຍາຍ ສາຍພົວພັນມິດຕະພາບ ອັນເປັນມູນເຊື້ອ ແລະ ຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ແລະ ການເປັນຄູ່ຮ່ວມຊະຕາກໍາສັງຄົມນິຍົມ ລາວ-ຈີນ, ຈີນ-ລາວ ເວົ້າລວມ, ເວົ້າສະເພາະ ລະຫວ່າງ ສະພາແຫ່ງຊາດ ແຫ່ງ ສປປ ລາວ ແລະ ສະພາຜູ້ແທນປະຊາຊົນ ທົ່ວປະເທດຈີນ ໃຫ້ນັບມື້ນັບເຂົ້າສູ່ລວງເລິກ ແລະ ເປັນຮູບປະທໍາຍິ່ງໆຂຶ້ນ. ໃນວັນທີ 4 ກັນຍາ 2023 ທີ່ນະຄອນ ຫລວງປັກກິ່ງ ສປ ຈີນ, ສະຫາຍ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະ ທານສະພາແຫ່ງຊາດລາວ ແລະ ສະຫາຍ ຈ້າວ ເລີ້ ຈີ້ ກໍາມະການຄະນະປະຈໍາກົມການເມືອງສູນກາງພັກກອມມູນິດຈີນ, ປະທານສະພາຜູ້ແທນ ປະຊາຊົນ ທົ່ວປະເທດຈີນ ໄດ້ລົງນາມ ໃນຂໍ້ຕົກລົງ ການຮ່ວມມື ເຊິ່ງເປັນນິຕິກໍາອັນສໍາຄັນໜຶ່ງທາງປະຫວັດສາດ ແລະ ເປັນບ່ອນອີງ ໃນການພົວພັນຮ່ວມມື ລະຫວ່າງ ສອງອົງການນິບັນຍັດ ຂອງສອງປະເທດ ລາວ-ຈີນ.

ສຳລັບ ເນື້ອໃນສຳຄັນຂອງຂໍ້ຕົກລົງການຮ່ວມມື ໂດຍສອງຝ່າຍ ໄດ້ເຫັນດີເປັນເອກະພາບ ຈະສືບຕໍ່ແລກປ່ຽນຄະນະຜູ້ແທນຂັ້ນສູງ, ກຳມາທິການ, ຄະນະ ມິດຕະພາບລັດຖະສະພາ ແລະ ວິຊາການຮ່ວມກັນ; ຊຸກຍູ້ການແລກປ່ຽນ, ການໄປມາຫາສູ່ກັນ ລະຫວ່າງ ສະພາປະຊາຊົນຂັ້ນແຂວງ ຂອງ ສປປ ລາວ ແລະ ສະພາປະຊາຊົນ ຂັ້ນທ້ອງຖິ່ນ ຂອງ ສປ ຈີນ. ສອງຝ່າຍ ຈະຮ່ວມກັນພັດທະນາຊັບພະຍາ ກອນມະນຸດ ໂດຍຜ່ານການແລກປ່ຽນບົດຮຽນ ແລະ ປະສົບການ, ແລກປ່ຽນຂໍ້ມູນຂ່າວສານ ໂດຍການຈັດກອງປະຊຸມຝຶກອົບຮົມ, ສຳມະນາ ແລະ ກອງປະຊຸມລະບົບທາງໄກ. ຂໍ້ຕົກລົງສະບັບນີ້, ມີອາຍຸການ ນໍາໃຊ້ 5 ປີ ແຕ່ປີ 2023-2027 ແລະ ສາມາດຕໍ່ໄດ້ຕື່ມອີກ ຕາມການຕົກລົງສອງຝ່າຍ.

ກ່ອນຈະມີການລົງນາມໃນຂໍ້ຕົກລົງການຮ່ວມມືດັ່ງກ່າວ, ປະທານສະພາແຫ່ງຊາດລາວ ແລະ ປະ ທານສະພາຜູ້ແທນປະຊາຊົນທົ່ວປະເທດຈີນ ໄດ້ພົບປະສອງຝ່າຍ ເພື່ອຮ່ວມກັນຕີລາຄາຄືນ ການພົວພັນ ແລະ ການຮ່ວມມື ລະຫວ່າງ ສອງອົງການນິຕິບັນຍັດ ລາວ-ຈີນ ໃນໄລຍະຜ່ານມາ ເຊິ່ງສອງຝ່າຍ ໄດ້ມີການແລກປ່ຽນຄະນະຜູ້ແທນຂັ້ນສູງ ຈົນຮອດຂັ້ນວິຊາການ ນັບແຕ່ສູນກາງຈົນຮອດທ້ອງຖິ່ນ, ແລກປ່ຽນບົດຮຽນ, ປະສົບການ ແລະ ຂໍ້ມູນຂ່າວສານ ກ່ຽວກັບການຈັດຕັ້ງ ປະຕິບັດພາລະບົດບາດ ດ້ານນິຕິບັນຍັດ ມີການແລກປ່ຽນສານຊົມເຊີຍ ໃນໂອກາດທີ່ມີການເລືອກຕັ້ງການນໍາສະພາແຫ່ງຊາດ ໃນແຕ່ລະຊຸດ ນໍາກັນ, ສານສະແດງ ຄວາມເຫັນໃຈໃນເວລາເກີດໄພພິບັດທາງທໍາມະຊາດ, ຈັດຕັ້ງກອງປະຊຸມສໍາມະນາ, ທັດສະ ນະສຶກສາ ແລະ ຝຶກອົບຮົມ ໂດຍສະພາ ຜູ້ແທນ ປະຊາຊົນ ທົ່ວປະເທດຈີນ ໄດ້ໃຫ້ທຶນແກ່ ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ແລະ ພະນັກງານວິຊາການ ເຂົ້າຮ່ວມການ ຝຶກອົບຮົມ ໃນການຍົກລະດັບ ດ້ານວິຊາສະເພາະ, ວິຊາການ ແລະ ຮຽນຮູ້ກ່ຽວກັບ ລະບົບການເມືອງ, ການປົກຄອງ ແລະ ການພັດທະນາ ເສດຖະກິດ-ສັງຄົມ ຢູ່ ສປ ຈີນ. ນອກຈາກນີ້, ສອງຝ່າຍ ຍັງໄດ້ຮ່ວມມື ແລະ ສະໜັບສະໜູນ ໃນເວທີລັດຖະສະພາພາກພື້ນ ແລະ ສາກົນ. ໃນນີ້, ສະພາຜູ້ແທນ ປະຊາຊົນ ທົ່ວປະເທດຈີນ ຈະໃຫ້ການຊ່ວຍເຫລືອ ແລະ ສະໜັບສະໜູນ ແກ່ສະພາແຫ່ງຊາດລາວ ໃນການເປັນເຈົ້າພາບ ຈັດກອງປະຊຸມ ສະມັດຊາໃຫຍ່ ລັດຖະສະພາ ລະຫວ່າງຊາດອາຊຽນ ຫລື AIPA ຄັ້ງທີ 45 ເຊິ່ງຈະຈັດຂຶ້ນ ໃນເດືອນຕຸລາ 2024.

ພ້ອມດຽວກັນນີ້, ສອງຝ່າຍ ເຫັນດີເປັນເອກະພາບກັນໃນການສືບຕໍ່ຊຸກຍູ້ ແລະ ສົ່ງເສີມ ສາຍພົວ ພັນມິດຕະພາບອັນເປັນມູນເຊື້ອ ແລະ ຄູ່ຮ່ວມຍຸດທະສາດ ຮອບດ້ານ ໝັ້ນຄົງ ຍາວນານ ຕາມທິດ 4 ດີ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ແລະ ການເປັນຄູ່ຮ່ວມຊະຕາກໍາສັງຄົມນິຍົມ ລາວ-ຈີນ, ຈີນ-ລາວ ໃຫ້ເປັນຮູບປະທໍາຫລາຍຂຶ້ນກວ່າເກົ່າ. ໃນນີ້, ພົ້ນເດັ່ນກວ່າໝູ່ ແມ່ນການຈັດຕັ້ງປະຕິບັດ ຂໍ້ລິເລີ່ມ ໜຶ່ງແລວ ໜຶ່ງເສັ້ນທາງ ໂດຍແມ່ນການສ້າງ ເສັ້ນທາງລົດໄຟດ່ວນລາວ-ຈີນ ເຊິ່ງເປັນສັນຍາລັກອັນສໍາຄັນ ແຫ່ງການພົວພັນຮ່ວມມື ກໍຄືການເຊື່ອມໂຍງເຊື່ອມຈອດ, ເປັນເສັ້ນທາງແຫ່ງມິດ ຕະພາບ ແລະ ນໍາເອົາຄວາມຜາສຸກ ມາສູ່ປະຊາຊົນສອງຊາດ ລາວ-ຈີນ.

ສໍາລັບການຮ່ວມມືທາງດ້ານເສດຖະກິດສອງຝ່າຍ ລາວ-ຈີນ ໄດ້ມີໝາກຜົນສໍາເລັດອັນໃໝ່ ເປັນ ຕົ້ນແມ່ນ ສປ ຈີນ ເປັນອັນດັບໜຶ່ງ ຂອງການລົງທຶນ ຕ່າງປະເທດ ຢູ່ ສປປ ລາວ ເຊິ່ງມີ 834 ໂຄງການ ລວມມູນຄ່າ 16 ຕື້ກວ່າໂດລາສະຫະລັດ, ເປັນປະເທດຄູ່ການຄ້າໃຫຍ່ອັນດັບສອງຂອງ ສປປ ລາວ, ມີມູນຄ່າການຄ້າ ລາວ-ຈີນ ໃນປີ 2022 ບັນລຸໄດ້ 5 ຕື້ກວ່າໂດລາສະຫະລັດ. ຂະນະດຽວກັນ, ນັກທ່ອງທ່ຽວຈີນ ກໍຈັດຢູ່ໃນອັນດັບ 2 ຂອງນັກທ່ອງທ່ຽວ ຕ່າງປະເທດ ມາທ່ອງທ່ຽວຢູ່ລາວ ໃນປີ 2022 ມີຈໍານວນ 4 ແສນກວ່າເທື່ອຄົນ.

KPL