ຂປລ. ກອງປະຊຸມສະໄໝວິສາມັນ ຂອງຄະນະກຳມະການ ໄອຍະການປະຊາຊົນສູງສຸດ ຊຸດທີ II ຈັດ​ຂຶ້ນໃນວັນທີ 4 ພຶດສະພາ 2023 ພາຍໃຕ້ການເປັນປະທານຂອງ ສະຫາຍ ໄຊຊະນະ ໂຄດພູທອນ ກໍາມະການສູນກາງພັກ, ຫົວໜ້າອົງການໄອຍະການປະຊາຊົນສູງສຸດ, ປະທານຄະນະກຳມະ ການໄອຍະການປະຊາຊົນສູງສຸດ, ມີຮອງປະທານຄະນະກຳມະການໄອຍະການປະຊາຊົນສູງສຸດ ແລະ ກອງເລຂາ ​ເຂົ້າ​ຮ່ວມ.
   ກອງປະຊຸມໄດ້ຮັບຟັງການລາຍງານ ແລະ ປະກອບຄໍາເຫັນ ໃສ່ຫລາຍບັນຫາສໍາຄັນ ຕາມຄໍາຖາມເຈາະຈີ້ມຂອງ ທ່ານປະທານຄະນະກຳມະການໄອຍະການປະຊາຊົນສູງສຸດ ຊຶ່ງເປັນບັນຫາຍຸດທະສາດຂອງອົງການໄອຍະການປະຊາຊົນ ເປັນຕົ້ນ ຂໍ້ຕົກລົງວ່າດ້ວຍຫ້ອງໃຫ້ຄໍາປຶກສາທາງດ້ານກົດໝາຍແກ່ປະຊາຊົນ ແລະ ການປະເມີນຜົນຂອງ ຫ້ອງໃຫ້ຄໍາປຶກສາທາງດ້ານກົດໝາຍດັ່ງກ່າວ; ຄົ້ນຄວ້າປັບ ປຸງຂໍ້ຕົກລົງຂອງຫົວໜ້າອົງການໄອຍະການປະຊາຊົນສູງສຸດ ວ່າດ້ວຍພະນັກງານໄອຍະການ ແລະ ຜູ້ຊ່ວຍ; ການສະເໜີສ້າງຕັ້ງອົງການໄອຍະການປະຊາຊົນເຂດ ຢູ່ ແຂວງເຊກອງ ແລະ ແຂວງອັດຕະປື; ການປະເມີນຜົນການປະຕິບັດພາລະບົດບາດ, ສິດ ແລະ ໜ້າທີ່ ຂອງອົງການໄອຍະການປະຊາຊົນເຂດປະຈໍາເມືອງ ໂດຍຖືເອົາເມືອງປາກງຶ່ມ ນະຄອນຫລວງວຽງຈັນ ເປັນບ່ອນທົດລອງ; ວຽກງານສ້າງ ແລະ ປັບປຸງນິຕິກໍາ ຄູ່ມືການຂຽນຄໍາຖະແຫລງໃນຄະດີອາຍາ ແລະ ຄະດີແພ່ງ, ຄໍາແນະນໍາກ່ຽວກັບການຕິດຕາມກວດກາ ແລະ ການນໍາໃຊ້ 7 ມາດຕະການສະກັດກັ້ນ; ການລາຍງານການປະເມີນຜົນກ່ຽວກັບການຫັນລົງສູ່ຮາກຖານ ເພື່ອຊຸກຍູ້ວຽກງານຕິດຕາມກວດກາທົ່ວໄປ ແລະ ການສ້າງກົນໄກປະສານງານ ລະຫວ່າງ ອົງການໄອຍະການປະຊາຊົນທ້ອງຖິ່ນ ແລະ ພາກສ່ວນກ່ຽວຂ້ອງ; ການກະກຽມເປັນເຈົ້າພາບຈັດກອງປະຊຸມ 4 ພາກສ່ວນ ກ່ຽວກັບການດໍາເນີນຄະດີຕາມຂະບວນການຍຸຕິທໍາ.
   ໃນວາລະກອງ​ປະຊຸມ, ທ່ານປະທານ, ຮອງປະທານ ແລະ ບັນດາຄະນະກໍາມະການໄອຍະການປະຊາຊົນສູງສຸດ ໄດ້ສຸມໃສ່ຄົ້ນຄວ້າ, ປຶກສາຫາລື ​ແລະ ປະກອບຄໍາຄິດຄໍາເຫັນ ຢ່າງເປັນຂະບວນຟົດ ຟື້ນ ແນໃສ່ເຮັດໃຫ້ອົງການໄອຍະການປະຊາຊົນ ນັບມື້ເຕີບໃຫຍ່ເຂັ້ມແຂງ, ໄດ້ຮັບການພັດທະນາ ແລະ ຮັບປະກັນການປະຕິບັດພາລະບົດບາດ, ສິດ ແລະ ໜ້າທີ່ ຂອງອົງການໄອຍະການປະຊາຊົນ ຕາມກົດໝາຍ, ເຮັດໃຫ້ກົດໝາຍໄດ້ຮັບການຄົບລົບ ແລະ ປະຕິບັດຢ່າງຖືກຕ້ອງ ແລະ ເປັນເອກະພາບ  ແນໃສ່ປົກປ້ອງຜົນປະໂຫຍດຂອງລັດ, ສັງຄົມ, ສິດ ແລະ ຜົນປະໂຫຍດອັນຊອບທຳຂອງພົນລະເມືອງ, ເຮັດໃຫ້ສັງຄົມມີຄວາມສະຫງົບ ແລະ ຄວາມເປັນລະບຽບຮຽບຮ້ອຍ, ເພີ່ມທະວີນິຕິທຳ ປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ຕາມທິດທາງກ້າວໜ້າ ແລະ ທັນສະໄໝ.

ຂ່າວ: ອອປສ

KPL