ຂປລ. ໃນໄລຍະຜ່ານມາການຊຸກຍູ້ສົ່ງເສີມ ການຜະລິດກະສິກຳ ແລະ ປ່າໄມ້ ຢູ່ນະຄອນຫລວງວຽງຈັນ (ນວ) ໄດ້ເອົາໃຈໃສ່ຫລາຍຮູບແບບ ໂດຍສະເພາະ ການສົ່ງເສີມຫົວໜ່ວຍວິສາຫະກິດ ກຸ່ມການຜະລິດ ແລະ ສະຫະກອນໃຫ້ເພີ່ມຂຶ້ນ.  ນອກນີ້ຍັງໄດ້ຊຸກຍູ້ບັນດາເມືອງ ລົງກວດກາສັງລວມກຸ່ມການຜະລິດ ແລະ ສະຫະກອນກະສິກຳ ເພື່ອເປັນສິນຄ້າພື້ນຖານໃຫ້ແກ່ການສ້າງຕັ້ງປັບປຸງ ແລະ ຜັນຂະຫຍາຍວຽກງານດັ່ງກ່າວ ໃນນີ້ ມີກຸ່ມປູກເຂົ້າ ແລະ ພືດຜັກ ແລະ ກຸ່ມລ້ຽງສັດ, ສ້າງກຸ່ມການຜະລິດກະສິກຳ ແລະ ສ້າງກຸ່ມເຂັ້ມແຂງກ້າວເປັນສະຫະກອນ. 
ໂດຍອີງຕາມຮ່າງການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ 5 ປີຄັ້ງທີ IX (2021-2025) ແລະ ທິດທາງແຜນການ 5 ປີຄັ້ງທີ X (2026-2030) ຂອງນະຄອນຫລວງວຽງຈັນ ໃນກອງປະຊຸມໃຫຍ່ຜູ້ແທນອົງຄະນະພັກ ນວ ຄັ້ງທີ VIII ວ່າ: ຕະຫລອດໄລຍະ 5 ປີຜ່ານມາ ດ້ານກະສິກຳ ໄດ້ສຸມໃສ່ພັດທະນາກະສິກໍາແບບປະສົມປະສານ, ກະສິກໍາສະອາດ ແລະ ກະສິກໍາອັດສະລິຍະ ໂດຍຂະຫຍາຍການຜະລິດກະສິກໍາສະອາດ ແບບປະສົມປະສານໄດ້ 127 ກຸ່ມ ແລະ ຊຸກຍູ້ຕິດຕາມການຜະລິດກະສິກໍາແບບອັດສະລິຍະ ເຊັ່ນ: ການປູກຜັກແບບເຮືອນຮົ່ມທີ່ເປັນລະບົບຄົບຊຸດ 1.137 ຫລັງ; ຊຸກຍູ້ສົ່ງເສີມການຜະລິດຜັກສະອາດ ແລະ ຜັກອິນຊີ ໄດ້ທັງໝົດ 46 ກຸ່ມ. ສາມາດຜະລິດເຂົ້າລວມໄດ້ທັງໝົດ 1.455.734 ໂຕນ, ເທົ່າກັບ 91% ຂອງແຜນການ (ແຜນ 5 ປີ ໃຫ້ໄດ້ 1.604.033 ໂຕນ), ຜະລິດພືດຜັກ ປີໄດ້ 595.070 ໂຕນ, ປະຕິບັດໄດ້ລື່ນແຜນ 0,3% (ແຜນການ 5 ປີ ໃຫ້ໄດ້ 593.087 ໂຕນ), ໄມ້ໃຫ້ໝາກຜະລິດໄດ້ 481.780 ໂຕນ, ປະຕິບັດໄດ້ລື່ນແຜນ 26% (ແຜນການ 5 ປີ ໃຫ້ໄດ້ 372.903 ໂຕນ), ສະໜອງທາດຊີ້ນ ໄດ້ 358.074 ໂຕນ, ເທົ່າ ກັບ 97% ຂອງແຜນການ (ແຜນການ 5 ປີ ໃຫ້ໄດ້ 368.786 ໂຕນ); ລົງຊຸກຍູ້ຕິດຕາມບັນດາໂຮງງານຜະລິດຝຸ່ນຊີວະພາບ 10 ແຫ່ງ, ກຸ່ມຕົວແບບໃນການຜະລິດຝຸ່ນອົງຄະທາດ, ສາມາດຜະລິດຝຸ່ນໄດ້ 43.710 ໂຕນ; ໂຮງງານຜະລິດຫົວອາຫານສັດ 5 ແຫ່ງ ຜະລິດອາຫານສັດໄດ້ 324.500 ໂຕນຕໍ່ປີ, ໂດຍລວມແລ້ວ ສາມາດສະໜອງສະບຽງອາຫານ ໄດ້ພຽງພໍໃນການສະໜອງຊົມໃຊ້ພາຍໃນ ເປັນຕົ້ນ: ເຂົ້າສະໜອງໄດ້ສະເລ່ຍ 277 ກິໂລ/ຄົນ/ປີ, ພືດຜັກ ສະໜອງໄດ້ສະເລ່ຍ 114 ກິໂລ/ຄົນ/ປີ, ໝາກໄມ້ ສະໜອງໄດ້ສະເລ່ຍ 93 ກິໂລ/ຄົນ/ປີ; ຊີ້ນ, ປາ ແລະ ໄຂ່ ສະໜອງໄດ້ ສະເລ່ຍ 68.5 ກິໂລ/ຄົນ/ປີ; ໄດ້ສົ່ງເສີມການປູກມັນຕົ້ນ, ໝາກໄມ້, ເຂົ້າ ແລະ ອື່ນໆ 

ເພື່ອສະໜອງຄວາມຕ້ອງການ ວັດຖຸດິບໃຫ້ໂຮງງານອຸດສາຫະກໍາປຸງແຕ່ງພາຍໃນ ແລະ ເປັນສິນຄ້າສົ່ງອອກ ໄດ້ 2,16 ລ້ານໂຕນ, ມູນຄ່າສົ່ງອອກ 1ຕື້ກວ່າໂດລາສະຫະລັດ.
ພ້ອມນັ້ນ, ຄາດໝາຍການຂະຫຍາຍຕົວຂອງເສດຖະກິດໃນ 5 ປີຕໍ່ໜ້າ (2026-2030) ຂອງນະຄອນຫລວງວຽງຈັນ ຈະສູ້ຊົນເຮັດໃຫ້ເສດຖະກິດ ຂອງນະຄອນຫລວງວຽງຈັນ ຂະຫຍາຍຕົວສະເລ່ຍໃນລະດັບ 8% ຕໍ່ປີ, ລວມຍອດຜະລິດ ຕະພັນພາຍໃນຮອດປີ 2030 ໃຫ້ບັນລຸໄດ້ 153.292,02 ຕື້ກີບ, ລວມຍອດຜະລິດຕະພັນພາຍໃນສະເລ່ຍຕໍ່ຫົວຄົນ (ປີ 2030) ໃຫ້ບັນລຸ 134,24 ລ້ານກີບ. ສຳລັບຂະແໜງກະສິກຳຈະສູ້ຊົນເຮັດໃຫ້ ຂະຫຍາຍຕົວກວມເອົາ 11,5% ຂອງຈີດີພີ, ສູ້ຊົນຜະລິດເຂົ້າໃຫ້ໄດ້  1.239.758  ໂຕນ, ປູກພືດຜັກໃຫ້ໄດ້ 560,430 ໂຕນ, ປູກໄມ້ກິນໝາກໃຫ້ໄດ້  76,241 ໂຕນ, ຂະຫຍາຍຝູງສັດໃຫ້ໄດ້ 3-4% ຕໍ່ປີ. 

ຮູບປະກອບ

KPL