KPL
ກະຊວງການຄ້າ ຂອງມາເລເຊຍ ເປີດເຜີຍ ເມື່ອບໍ່ດົນມານີ້ວ່າ: ການສົ່ງອອກ ແລະ ຂົນສົ່ງຊີບ ເອໄອ(AI) ຫລື ປັນຍາ ປະດິດ ປະສິດທິພາບສູງ ຈາກ ສ.ອາເມລິກາ ຈະຕ້ອງມີ ໃບອະນຸຍາດ ການຄ້າ ແລະ ມີຜົນບັງຄັບໃຊ້ ທັນທີ
ຂປລ.ຕາມຂ່າວຈາກ ກົວລາລຳເປີ, ກະຊວງການຄ້າ ຂອງມາເລເຊຍ ເປີດເຜີຍ ເມື່ອບໍ່ດົນມານີ້ວ່າ: ການສົ່ງອອກ ແລະ ຂົນສົ່ງຊີບ ເອໄອ(AI) ຫລື ປັນຍາ ປະດິດ ປະສິດທິພາບສູງ ຈາກ ສ.ອາເມລິກາ ຈະຕ້ອງມີ ໃບອະນຸຍາດ ການຄ້າ ແລະ ມີຜົນບັງຄັບໃຊ້ ທັນທີ ໂດຍສະເພາະ ບຸກຄົນ ຫລື ບໍລິສັດ ທີ່ຕ້ອງການ ສົ່ງອອກ-ຂົນສົ່ງ ຫລື ນຳເຂົ້າ ສິນຄ້າໃດໆ ທີ່ບໍ່ໄດ້ຢູ່ໃນ ບັນຊີລາຍຊື່ ສິນຄ້າ ຍຸດທະສາດ ຂອງເມເລເຊຍ ຈະຕ້ອງແຈ້ງ ໃຫ້ເຈົ້າໜ້າທີ່ ຢ່າງໜ້ອຍ 30ວັນ ເພື່ອເປັນການປິດຊ່ອງຫວ່າງ ດ້ານກົດລະບຽບ ໃນລະຫວ່າງທີ່ ມາເລເຊຍ ພວມພິຈາລະນາວ່າ ຊີບເອໄອ ປະສິດທິພາບສູງຈາກ ສ.ອາເມລິກາ ນັ້ນ ຄວນຢູ່ໃນ ບັນຊີ ລາຍຊື່ ສິນຄ້າ ທາງຍຸດທະສາດ ຫລື ບໍ່.ຂະນະທີ່ ມາເລເຊຍ ຢືນຢັນ ຕໍ່ຄວາມພະຍາຍາມ ເພື່ອຫລີກເວັ້ນ ການຄວບຄຸມ ການສົ່ງອອກ ຫລື ການຄ້າ ຜິດກົດໝາຍ ໂດຍບຸກຄົນ ຫລື ບໍລິສັດໃດໆ ກໍ່ຕາມ ສຳລັບຜູ້ລະເມີດ ຈະຖືກດຳເນີນຄະດີ ຕາມກົດໝາຍ ຢ່າງເຂັ້ມງວດ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
