ຂປລ. ປັດຈຸບັນກະສິກອນຢູ່ບັນດາແຂວງ ໃນຂອບເຂດທົ່ວປະເທດ ໄດ້ຫັນມາປູກໝາກຖົ່ວລຽນເພື່ອຈຳໜ່າຍໃຫ້ກັບຜູ້ບໍລິໂພກ ກໍຄື ຕະຫລາດພາຍໃນປະເທດຫລາຍຂຶ້ນ ເນື່ອງຈາກວ່າໝາກຖົ່ວລຽນ ກຳລັງໄດ້ຮັບຄວາມນິຍົມຈາກກຸ່ມຜູ້ບໍລິໂພກ ນັບມື້ນັບຫລາຍຂຶ້ນ ບວກກັບສະພາບດິນ ຟ້າອາກາດທີ່ເໝາະສົມ, ດິນດີ, ປູກງ່າຍ, ເປັນໝາກໄມ້ທີ່ມີລາຄາສູງ ແລະ ອື່ນໆ ເຮັດໃຫ້ກະສິກອນຫັນມາປູກຖົ່ວລຽນ ເພື່ອຈຳໜ່າຍຫລາຍຂຶ້ນ ເຊັ່ນດຽວກັບ ສວນຖົ່ວລຽນໝອນທອງ ບ້ານ ຫາດເດື່ອ ເມືອງ ແກ້ວອຸດົມ ແຂວງ ວຽງຈັນ ກໍເປັນສວນໜຶ່ງທີ່ເປັນຕົ້ນແບບ ທີ່ປູກຕາມເຕັກນິກ ວິຊາການສາມາດເກັບຜົນຜະລິດໄດ້ພາຍໃນ 4 ປີ.

 
ທ່ານ ນາງ ບຸນລັ່ງ ວໍລະສິງ ເຈົ້າຂອງສວນຖົ່ວລຽນໝອນທອງ ບ້ານຫາດເດື່ອ ເມືອງແກ້ວອຸດົມ ແຂວງວຽງຈັນ ​ໄດ້ໃຫ້ສຳພາດຕໍ່​ນັກ​ຂ່າວ​ສໍານັກ​ຂ່າວສານ​ປະ​ເທດ​ລາວ ເມື່ອບໍ່ດົນນີ້ວ່າ: ກ່ອນຈະລົງມືປູກໝາກຖົ່ວລຽນ ຕົນເອງໄດ້ແຮງບັນດານໃຈ ມາຈາກແນວຄິດລິເລີ່ມ ຂອງຜູ້ເປັນພໍ່ ແລະ ພີ່ນ້ອງ ຈາກປະເທດເພື່ອນບ້ານ (ໄທ) ຈຶ່ງເກີດມີຄວາມຄິດຢາກປູກຖົ່ວລຽນ ແລະ ຕັດສິນໃຈລົງມືບຸກເບີກພື້ນທີ່ ຕາມເຕັກນິກວິຊາການ ທີ່ຖືກຕ້ອງ ແລະ ເລີ່ມລົງມືປູກ ໃນປີ 2022 ເຊິ່ງມີເນື້ອທີ່ 4 ເຮັກຕາ, ປູກຖົ່ວລຽນພັນໝອນທອງ ທັງໝົດ 690 ກວ່າຕົ້ນ. ​ໃນ​ປີ 2025 ນີ້, ​ເປັນ​ປີ​ທໍ​າອິດທີ່ເກັບຜົນຜະລິດ ເພື່ອສົ່ງອອກຈຳໜ່າຍ ໃຫ້ກຸ່ມລູກຄ້າ ​ໃນ​ຈໍານວນ 460 ຕົ້ນ ​ແລະ ຄາດວ່າຈະສາມາດເກັບຜົນຜະລິດ ໄດ້ປະມານ 6 ໂຕນ ເພື່ອຈຳໜ່າຍໃຫ້ຕະຫລາດພາຍໃນ.

ທ່ານ ນາງ ບຸນລັ່ງ ວໍລະສິງ ຍັງໃຫ້ຮູ້ອີກວ່າ: ສວນຖົ່ວລຽນໝອນທອງ ບ້ານຫາດເດື່ອ ໄດ້ນຳໃຊ້ເຕັກນິກການປູກ, ການບົວລະບັດຮັກສາ ນັບແຕ່ມື້ປູກ ຈົນຮອດມື້ເກັບຜົນຜະລິດ ທີ່ຖືກຕ້ອງຕາມຫລັກວິຊາການ, ມີລະບົບນ້ຳ, ການໃຫ້ຝຸ່ນຕ່າງໆຢ່າງເປັນລະບົບ, ທັນສະໄໝ ເຊິ່ງປູກ ພາຍໃນ 4 ປີ ກໍສາມາດເກັບຜົນຜະລິດໄດ້ຕາມເປົ້າໝາຍ. ແຕ່ເຖິງຢ່າງໃດກໍຕາມ, ຢາກໃຫ້ພາກລັດ ເຂົ້າມາຊ່ວຍເຫລືອ ບາງດ້ານຕື່ມອີກ ເປັນຕົ້ນ ຈັດຕັ້ງເປັນກຸ່ມຜູ້ປູກຖົ່ວລຽນ, ຊອກຫາແຫລ່ງຕະຫລາດພາຍໃນ ​ແລະ ກ້າວໄປສູ່ການສົ່ງອອກໄປຕ່າງປະເທດ.

ສຳລັບ ທ່ານໃດທີ່ີມີຄວາມຕ້ອງການຢາກປຸກຖົ່ວລຽນ ຫລື ຢາກຮູ້ເຕັກນິກການປຸກ, ການບົວລະບັນຮັກສາ ສາມາດເຂົ້າມາປຶກສາ ໄດ້ຢູ່ສວນຖົ່ວລຽນໝອນທອງ ບ້ານຫາດເດື່ອ ໄດ້ໂດຍກົງ ຫລື ສາມາດໂທໄດ້ທີ່ເບີ 020 54371466 ໃຫ້ຄຳປຶກສາຟຣີ.

ຂ່າວ-ພາບ: ທະນູທອງ

KPL