ຂປລ. ຫ້ອງວ່າການສຳນັກງານປະທານປະເທດ (ຫສປທ) ຈັດເຜີຍແຜ່ເອກະສານ ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 70 ປີ (22/3/1955-22/3/2025), ເຜີຍແຜ່ສູນທອນພົດ ຂອງ ສະຫາຍ ທອງລຸນ ສີສຸລິດ ເລຂາທິການໃຫຍ່ ປະທານປະເທດ ແຫ່ງ ສປປ ລາວ, ໃນພິທີໂຮມຊຸມນຸມໃຫຍ່ ສະເຫລີມສະຫລອງ ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 70 ປີ ແລະ ເຜີຍ ແຜ່ມະຕິກອງປະຊຸມ ຄົບຄະນະສະໄໝສາມັນ ຂອງຄະນະບໍລິຫານງານສູນກາງພັກ ສະໄໝ XI ໃນວັນທີ 1 ເມສາ 2025 ໂດຍການ​ເຜີຍ​ແຜ່​ຂອງ ສະຫາຍ ນາງ ເຂັມມະນີ ພົນເສນາ ກຳມະການສູນກາງພັັັັກ, ເລຂາຄະນະພັກ, ຫົວໜ້າຫ້ອງວ່າການສຳນັກງານປະທານປະເທດ, ມີຄະນະພັກ, ຫົວໜ້າກົມ, ຮອງ ກົມ, ຫົວໜ້າພະແນກ, ຮອງພະແນກ, ສະມາຊິກພັກ ແລະ ພະນັກງານເຂົ້າຮ່ວມ.

ໂອກາດນີ້, ສະຫາຍ ນາງ ເຂັມມະນີ ພົນເສນາ ໄດ້ຍົກໃຫ້ເຫັນຂະບວນວິວັດແຫ່ງການກຳເນີດ ແລະ ການນຳພາ-ຊີ້ນຳ ຂອງພັກປະຊາຊົນ ປະຕິວັດລາວ ຕະຫລອດໄລຍະ 70 ປີ ຜ່ານມາ, ພ້ອມທັງ ຍົກໃຫ້ເຫັນຜົນສຳເລັດຂອງ ກອງປະຊຸມຄົບຄະນະສະໄໝສາມັນ ຂອງຄະນະບໍລິຫານງານສູນກາງພັກ ສະໄໝ XI ເຊິ່ງໄດ້ດຳເນີນມາແຕ່ວັນທີ 24-25 ກຸມພາ 2025 ຜ່ານມາ ໂດຍພາຍໃຕ້ການເປັນປະທານຂອງ ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ, ປະທານປະເທດ ເຊິ່ງກອງປະຊຸມໄດ້ສຸມໃສ່ຄົ້ນຄວ້າ, ປະກອບຄຳຄິດຄຳເຫັນຢ່າງເລິກເຊິ່ງ, ກົງໄປກົງມາ ແລະ ຕົກລົງຫລາຍບັນຫາສຳຄັນ ເປັນຕົ້ນ ​ແມ່ນກ່ຽວກັບການປັບປຸງລັດຖະທຳມະນູນ ສະບັບປີ 2025, ການປັບປຸງກົດໝາຍ ວ່າດ້ວຍການປົກຄອງທ້ອງຖິ່ນ ແລະ ການສ້າງຕັ້ງອົງການປົກຄອງຕາແສງ ແລະ ການປັບປຸງກົງຈັກ ການຈັດຕັ້ງຂອງລັດຖະບານ. ພ້ອມນີ້,  ສະຫາຍ ນາງ ເຂັມມະນີ ພົນເສນາ ຍັງໄດ້ຍົກໃຫ້ເຫັນ ບາງເນື້ອໃນສຳຄັນ ຂອງສູນທອນພົດ ຂອງ ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ ແຫ່ງ ສປປ ລາວ, ໃນພິທີໂຮມຊຸມນຸມໃຫຍ່ ສະ ເຫລີມສະຫລອງ ວັນສ້າງຕັ້ງພັກ ປະຊາຊົນ ປະຕິວັດລາວ ຄົບຮອບ 70 ປີ ຕື່ມອີກ.

ການເຜີຍແຜ່ເອກະສານໃນຄັ້ງນີ້, ເພື່ອໂຄສະນາສຶກສາອົບຮົມໃຫ້ສະມາຊິກພັກ, ພະນັກງານ- ລັດຖະກອນ ພາຍໃນຫ້ອງວ່າການສຳນັກງານ ປະທານປະເທດ ໄດ້ຮັບຮູ້ ແລະ ເຂົ້າໃຈ ທາດແທ້ມູນເຊື້ອອັນດີງາມຂອງພັກ, ທັງເປັນການສັນລະເສີນຄຸນງາມຄວາມດີ ຂອງບັນພະບູລຸດຜູ້ທີ່ເສຍສະລະຊີວິດ ເພື່ອຊາດເພື່ອປະຊາຊົນ ແລະ ເພື່ອປຸກລະດົມນໍ້າໃຈຮັກຊາດ, ຮັກລະບອບໃໝ່ ແລະ ໃຫ້ເຫັນປະ ຫວັດມູນເຊື້ອການກຳເນີດ ແລະ ເຕີບໃຫຍ່ຂະຫຍາຍຕົວຂອງພັກ ປປ ລາວ ຕະຫລອດ 70 ປີຜ່ານມາ.

ຂໍ້ມູນ-ພາບ: ໜັງສືພິມປະຊາຊົນ

KPL