ຂປລ. ກົມຕິດຕາມກວດກາຄ້າຍຄຸມຂັງ-ດັດສ້າງ ອົງການໄອຍະການປະຊາຊົນສູງສຸດ ຈັດກອງປະຊຸມເຜີຍແຜ່ເຊື່ອມຊຶມ ຄໍາສັ່ງຂອງຫົວໜ້າອົງການໄອຍະການປະຊາຊົນສູງສຸດ ວ່າດ້ວຍການຕິດຕາມກວດກາຄະດີ ປະຫານຊີວິດທີ່ມີຄໍາຕັດສິນ ຫລື ຄໍາພິພາກສາໃຊ້ໄດ້ຢ່າງເດັດຂາດ ສະບັບເລກທີ 04/ອອປສ, ລົງວັນທີ 20 ມີນາ 2025 ໃນຂອບເຂດທົ່ວປະເທດ ໃນວັນທີ 2 ເມສາ 2025 (ຜ່ານລະບົບກອງປະຊຸມທາງໄກ) ໂດຍການເປັນປະທານຂອງ ທ່ານ ບົວລີ ເພັດມີໄຊ ຄະນະບໍລິຫານງານພັກ, ຫົວໜ້າກົມຕິດຕາມກວດກາຄ້າຍຄຸມຂັງ-ດັດສ້າງ ອົງການໄອຍະການປະຊາຊົນສູງສຸດ, ມີຮອງຫົວໜ້າ ອົງ ການໄອຍະການປະຊາຊົນພາກ, ຫົວໜ້າ, ຮອງຫົວໜ້າອົງການໄອຍະການປະຊາຊົນແຂວງ, ນະຄອນ ຫລວງວຽງຈັນ, ຕາງໜ້າອົງການໄອຍະການທະຫານຂັ້ນສູງ, ບັນດາພະແນກ, ຂະແໜງການທີ່ກ່ຽວຂ້ອງ ໃນຂອບເຂດ ທົ່ວປະເທດເຂົ້າຮ່ວມ.

ໂອກາດນີ້, ທ່ານ ໄຊຊະນະ ສຸລິຍະວົງ ຮອງຫົວໜ້າກົມຕິດຕາມ ກວດກາຄ້າຍຄຸມຂັງ-ດັດສ້າງ  ໃຫ້ຮູ້ວ່າ: ຄຳສັ່ງດັ່ງກ່າວ, ໄດ້ມອບໃຫ້ອົງການໄອຍະການ ປະຊາຊົນແຂວງ, ນະຄອນຫລວງວຽງຈັນ ແລະ ອົງການໄອຍະການທະຫານ ຕິດຕາມກວດການໍາບັນດາສານປະຊາຊົນແຂວງ, ນະຄອນຫລວງວຽງຈັນ ແລະ ສານທະຫານ ວ່າຜ່ານມາມີການລົງຄໍາຕັດສິນ ຫລື ຄໍາພິພາກສາ ທີ່ໃຊ້ໄດ້ຢ່າງເດັດຂາດ ກ່ຽວກັບໂທດປະຫານຊີວິດທັງໝົດຢູ່ແຕ່ລະແຂວງ, ນະຄອນຫລວງວຽງຈັນ ແລະ ສົ່ງເຂດທະຫານ ແລ້ວເຮັດສະຖິຕິສະເພາະ ແລະ ອື່ນໆ; ມອບໃຫ້ກົມຕິດຕາມ ກວດກາ ການດໍາເນີນຄະດີອາຍາ, ບັນດາອົງການໄອຍະການປະຊາຊົນພາກ ແລະ ອົງການໄອຍະການທະຫານ ໃຫ້ຕິດຕາມກວດກາຄໍາພິພາກສາ ຄະດີອາຍາກ່ຽວກັບໂທດປະຫານຊີວິດ ຂັ້ນຂອງຕົນ; ມອບໃຫ້ກົມຕິດຕາມກວດກາຄ້າຍຄຸມຂັງ-ດັດສ້າງ ຕ້ອງເຮັດສະຖິຕິສະເພາະ ຈໍານວນນັກໂທດ ທີ່ຖືກສານຕັດສິນປະຫານຊີວິດ ໃນຂອບເຂດທົ່ວປະເທດ; ພ້ອມທັງ ໃຫ້ຕິດຕາມກວດກາສານປະຊາຊົນ ຫລື ສານທະຫານ ຂັ້ນຂອງຕົນ ກ່ຽວກັບການແຈ້ງຮັບຊາບຄໍາຊີ້ຂາດໃຫ້ຈໍາເລີຍ(ນັກໂທດ) ທີ່ຖືກລົງໂທດປະຫານຊີວິດນັ້ນ ຕ້ອງເຮັດເປັນລາຍລັກອັກສອນ.

ສຳລັບ ວິທີການຈັດຕັ້ງປະຕິບັດ ມອບໃຫ້ບັນດາກົມທີ່ກ່ຽວຂ້ອງ ອົງການໄອຍະການປະຊາຊົນສູງສຸດ, ອົງການໄອຍະການປະຊົນພາກ, ແຂວງ, ນະຄອນຫລວງວຽງຈັນ ແລະ ອົງການໄອຍະການທະຫານ ປະສານສົມທົບກັບພາກສ່ວນທີ່ກ່ຽວຂ້ອງ ເພື່ອຈັດຕັ້ງປະຕິບັດໃຫ້ມີ ຄວາມເປັນ ເອກະພາບ, ຮັບປະກັນການຈັດຕັ້ງປະຕິບັດ ໂທດປະທານຊີວິດ ໃຫ້ຖືກຕ້ອງຕາມລະບຽບການ ແລະ ກົດໝາຍ; ໃຫ້ບັນດາກົມ, ຫ້ອງການ, ສະຖາບັນຄົ້ນຄວ້າ ແລະ ຝຶກອົບຮົມໄລຍະການ ອົງການໄອຍະການປະຊາຊົນສູງສຸດ, ອົງການໄອຍະການປະຊົນພາກ, ແຂວງ, ນະຄອນຫລວງວຽງຈັນ ເເລະ ອົງການໄອຍະການທະຫານເຜີຍແຜ່, ແນະນຳ ແລະ ຜັນຂະຫຍາຍ ເຂົ້າໃນວຽກງານທີ່ກ່ຽວຂ້ອງຕົວຈິງ ແລະ ໃຫ້ພະ ນັກງານທີ່ຢູ່ໃນຄວາມຮັບຜິດຊອບຂອງຕົນ ສາມາດເຂົ້າໃຈ ແລະ ຈັດຕັ້ງປະຕິບັດໃຫ້ໄດ້ຮັບຜົນດີ.

ໂອກາດນີ້, ປະທານກອງຊຸມໄດ້ມອບຄວາມຮັບຜິດຊອບໃຫ້ ຫົວໜ້າອົງການໄອຍະການປະຊາຊົນພາກ, ແຂວງ, ນະຄອນຫລວງວຽງຈັນ, ຫົວໜ້າອົງການໄອຍະການທະຫານຂັ້ນສູງ, ສືບຕໍ່ເຜີຍແຜ່ເຊື່ອມຊຶມຄໍາສັ່ງດັ່ງກ່າວ ໃຫ້ພະນັກງານທີ່ຢູ່ໃນ ຄວາມຮັບຜິດຊອບຂອງຕົນ ເຂົ້າໃຈຢ່າງ ເລິກເຊິ່ງ ເພື່ອຈັດຕັ້ງປະຕິບັດ ໃຫ້ມີຄວາມເປັນເອກະພາບ, ຖ້າພົບຄວາມຫຍຸ້ງຍາກ ຫລື ຄວາມເຂົ້າໃຈທາງດ້ານເນື້ອໃນ ບໍ່ເອກະພາບກັນ ໃຫ້ນໍາສະເໜີຕໍ່ອົງການໄອຍະການປະຊາຊົນສູງສຸດ ເພື່ອພິຈາລະນາຄົ້ນຄວ້າ ແລະ ມີທິດຊີ້ນໍາໃນການຈັດຕັ້ງປະຕິບັດໃນຂັ້ນຕອນຕໍ່ໄປ.

ຂ່າວ-ພາບ: ອອປສ

KPL