ຂປລ. ພິທີສະຫລອງ ວັນຄົບຮອບ 50 ປີ ແຫ່ງການສ້າງຕັ້ງສາຍພົວພັນການທູດ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ແຟງລັງ ຈັດຂຶ້ນໃນວັນທີ 2 ເມສາ 2025 ຢູ່ນະຄອນຫລວງວຽງຈັນ ໂດຍມີ ທ່ານ ທອງສະຫວັນ ພົມວິຫານ ລັດຖະມົນຕີກະຊວງການຕ່າງປະເທດ ໃນນາມຕາງໜ້າລັດຖະບານ ແຫ່ງ ສປປ ລາວ, ທ່ານ ໄກໂຈ ນໍວັນໂຕ ເອກອັກຄະລັດ ຖະທູດວິສາມັນ ຜູ້ມີອໍານາດເຕັມ ແຫ່ງ ສາທາລະນະລັດ ແຟງລັງ ປະຈໍາ ສປປ ລາວ, ມີຮອງລັດຖະມົນຕີ, ເຈົ້າໜ້າທີ່ຂັ້ນສູງຂອງລາວ, ທູຕານຸທູດຕ່າງປະເທດ ປະຈໍາລາວ, ອົງການຈັດຕັ້ງສາກົນ ພ້ອມແຂກຖືກເຊີນ ເຂົ້າຮ່ວມ.

ໃນ​ພິ​ທີ​,​ ທ່ານລັດຖະມົນຕີ ທອງສະຫວັນ ພົມວິຫານ ແລະ ທ່ານ ທູດ ໄກໂຈ ນໍວັນໂຕ ໄດ້​​ສະ​ແດງ​ຄວາມ​ຊົມ​ເຊີຍ ແລະ ຕີລາຄາ​ສູງຕໍ່ຜົນສຳເລັດ ​ຂອງການພົວພັນ​ຮ່ວມ​ມື​ສອງຝ່າຍ ລະຫວ່າງ ລາວ ແລະ ແຟງລັງ ຕະຫລອດ​ໄລຍະ 50 ປີ, ນັບ​ຕັ້ງແຕ່​ສອງປະເທດ ໄດ້​ສ້າງ​ຕັ້ງ​ສາຍ​ພົວ​ພັນ​ການ​ທູດ​ຮ່ວມກັນ ໃນວັນທີ 1 ມັງກອນ 1975. ການພົວພັນຮ່ວມມື ລາວ ແລະ ແຟງລັງ ​​ຢູ່​ໃນ​ລ​ະ​ດັບ​ດີ, ​ແຟງ​ລັງ​​ ສືບ​ຕໍ່​ໃຫ້​ການຮ່ວມມື​ ໃນ​ຂອບ​ຫລາຍ​ຝ່າຍ; ການນໍາຂັ້ນສູງຂອງທັງສອງປະເທດ ໄດ້ມີການແລກປ່ຽນສານຊົມເຊີຍ ແລະ ສານອວຍພອນ ໃນບາງໂອກາດວັນສໍາຄັນ. ນອກນັ້ນ, ສອງຝ່າຍ ຍັງມີການແລກປ່ຽນການຢ້ຽມຢາມລະດັບສູງ ຫລາຍຄັ້ງທີ່ພົ້ນເດັ່ນ ເຊັ່ນ: ໃນ​ປີ 2014, ທ່ານ ທອງ​ລຸນ  ສີ​ສຸ​ລິດ ຮອງ​ນາ​ຍົກ​ລັດ​ຖະ​ມົນ​ຕີ, ລັດ​ຖະ​ມົນ​ຕີ​ກະ​ຊວງ​ການ​ຕ່າງ​ປະ​ເທດ ແຫ່ງ ສ​ປ​ປ ລາວ(ໃນເວລານັ້ນ) ພ້ອມ​ຄະ​ນະ ໄດ້​ໄປ​ຢ້ຽມ​ຢາມ​ທາງ​ການ ທີ່ປະ​ເທດແຟງ​ລັງ ແລະ ໃນ​ປີ 2012, ທ່ານ Jyrki Tapani Katainen, ນາຍົກລັດຖະມົນຕີແຟງ​ລັງ ​ໄດ້ມາ​ຢ້ຽມຢາມ ​ແລະ ​​ເຂົ້າ​ຮ່ວມ​ກອງ​ປະຊຸມ​ສຸດ​ຍອດ​ອາ​ແຊັມ ຄັ້ງ​ທີ 9  ທີ່​ ນະຄອນຫລວງ​ວຽງ​ຈັນ​.

ໃນຊຸມປີຜ່ານມາ ແຟງລັງ ໄດ້ສືບຕໍ່ໃຫ້ການຊ່ວຍເຫລືອ ສປປ ລາວ ໃນຮູບແບບສອງຝ່າຍ ແລະ ຫລາຍຝ່າຍເພື່ອປະກອບ ສ່ວນເຂົ້າໃນບຸລິມະສິດຂອງການພັດທະນາປະເທດເຮົາ ໃນຂະແໜງ ຄຸ້ມຄອງ  ພາຍໃຕ້ຂອບການຮ່ວມມືຄະນະກໍາມະການແມ່ນໍ້າຂອງສາກົນ (MRC ການປົກປັກຮັກສາ ສິ່ງແວດລ້ອມ, ການສ້າງຄວາມເຂັ້ມແຂງໃຫ້ພະນັກງານ ດ້ານການບໍລິການແຜນທີ່ ຢູ່ທາງພາກໃຕ້ຂອງລາວ, ແຜນການນຳໃຊ້ພະລັງງານແບບຍືນຍົງ, ໂຄງການ​ກົດ​ໝາຍ​ສາກົນ ແລະ ອື່ນໆ.

ເຖິງວ່າ ການຊ່ວຍເຫລືອສອງຝ່າຍຈາກ ແຟງລັງ ທີ່ເລີ່ມມີມາແຕ່ປີ 2007 ແລະ ສິ້ນສຸດລົງໃນປີ 2018 ແຕ່ແຟງລັງ ໄດ້ຮ່ວມກັບບັນດາປະເທດສະມາຊິກເອີຣົບ ເອີ້ນວ່າ “ທີມເອີຣົບ” ເພື່ອສືບຕໍ່ປະ ກອບສ່ວນເຂົ້າໃຫ້ການຊ່ວຍເຫລືອ ເພື່ອການ​ພັດທະນາ​ ແກ່ ສປປ ລາວ ໃນບັນດາຂະແໜງການກະສິກໍາ, ການສຶກສາ, ສາທາ ແລະ ການພັດທະນາຂະແໜງການປົກຄອງ ແຕ່ປີ 2021-2025 ແລະ ປີ 2025-2027. ໃນ​ເວທີພາກ​ພື້ນ ​ແລະ ສາກົນ ລາວ ແລະ ແຟງລັງ ຍັງໄດ້ສືບຕໍ່​ໃຫ້ການສະໜັບສະໜູນ​ເຊິ່ງກັນ​ ແລະ ກັນ ​ໂດຍ​ສະ​ເພາະ​​ ໃນ​ຂອບ​ອາ​ຊຽນ ​ແລະ ອົງການສະຫະປະຊາຊາດ.

ແຟງລັງ ໄດ້ເຂົ້າເປັນພາຄີ ສົນທິສັນຍາໄມຕີຈິດ ແລະ ການຮ່ວມມືໃນອາຊີຕາເວັນອອກສຽງໃຕ້ (Treaty of Amity and Cooperation-TAC) ຢ່າງເປັນທາງການ ໃນເດືອນກໍລະກົດ 2024 ທີ່ ນະຄອນຫລວງວຽງຈັນ. ສປປ ລາວ ໃນຖານະເປັນປະທານອາຊຽນ 2024 ໄດ້ມີບົດບາດສໍາຄັນ ໃນການປະກອບສ່ວນຕໍ່ຜົນສໍາເລັດ ໃນການລົງນາມເຂົ້າເປັນພາຄີດັ່ງກ່າວຂອງແຟງລັງ ໂດຍມີເຈດຈໍານົງເພື່ອສົ່ງເສີມສັນຕິພາບ, ສະຖຽນລະພາບ ແລະ ການຮ່ວມມືເພື່ອການພັດທະນາໃນພາກພື້ນ. 

ໃນໂອກາດສະເຫລີມສະຫລອງ ວັນສ້າງຕັ້ງສາຍພົວພັນການທູດ ລະຫວ່າງ ລາວ ແລະ ແຟງລັງ ຄົບຮອບ 50 ປີດັ່ງກ່າວນີ້, ການນຳຂັ້ນສູງຂອງທັງສອງປະເທດ ກໍຄື ທັງສອງປະມຸກລັດ ລວມທັງ ລະ ດັບນາຍົກລັດຖະມົນຕີ ແລະ ລັດຖະມົນຕີຕ່າງປະເທດ ລາວ ແລະ ແຟງລັງ  ກໍໄດ້ມີການສົ່ງສານ ສະແດງແດງຄວາມຊົມເຊີຍ ເຊິ່ງກັນ ແລະ ກັນ. ນອກຈາກນີ້, ຍັງມີການຈັດກອງປະຊຸມສໍາມະນາ ໃນຫົວຂໍ້ ການຮ່ວມເຮັດທຸລະກິດກັບແຟງລັງ (Seminar On Doing Business With Finland) ເຊິ່ງເປັນກິດຈະກໍາທີ່ສໍາຄັນໃນການນໍາສະເໜີ ແລະ ສະໜັບສະໜູນການຮ່ວມມື ທາງດ້ານການຮ່ວມລົງ ທຶນ ແລະ ການຄ້າ ລະຫວ່າງ ສອງປະເທດ ໃນອະນາຄົດ.

ຂ່າວ-ພາບ: ກຕທ

KPL