ຂປລ. ກົມສື່ມວນຊົນໜຸ່ມລາວສູນກາງຊາວໜຸ່ມ ປປ ລາວ ຮ່ວມກັບ ສະຖານີວິທະຍຸໂທລະ ພາບສູນການຈີນ ປະຈຳ ສປປ ລາວ ຈັດຖະແຫງຂ່າວງານປະກວດຊາວໜຸ່ມດີເດັ່ນ ຄັ້ງທໍາອິດ ຂອງ ສປປ ລາວ ໃນຫົວຂໍ້ “ຊາວໜຸ່ມຕົວແບບ” ໃນວັນທີ 2 ເມສາ 2025 ຢູ່ນະຄອນຫລວງວຽງຈັນ ເພື່ອຄັດເລືອກຊາວໜຸ່ມ ຜູ້ທີ່ມີພອນສະຫວັນ, ຫົວຄິດປະດິດສ້າງ, ປະກອບສ່ວນຕັ້ງໜ້າໃນການພັດທະນາສັງຄົມ ແລະ ປະເທດຊາດ ແລະ ເປັນຕົວແບບທີ່ໂດດເດັ່ນທີ່ສຸດໃນຂົງເຂດອົງການຈັດຕັ້ງ ຂອງຕົນຢູ່ໃນທຸກສາຂາອາຊີບ, ເປັນຕົວແທນຂອງຊາວໜຸ່ມລາວ ສາມາດໄປຖ່າຍທອດບົດຮຽນ ແລະ ແບງປັນປະສົບການໃນນາມ ຊາວໜຸ່ມລາວທີ່ດີເດັ່ນຢູ່ພາຍໃນ ແລະ ຕ່າງປະເທດ.

ທ່ານ ນາງ ບົວໂຮມ ສົມວິຈິດ ຫົວໜ້າກົມສື່ມວນຊົນໜຸ່ມລາວ ສູນກາງຊາວໜຸ່ມ ປປ ລາວ ໄດ້ ​ໃຫ້​ຮູ້ວ່າ: ການຈັດກິດຈະກຳຄັດເລືອກ "ຊາວໜຸ່ມຕົວແບບ” ເນື່ອງໃນໂອກາດວັນສ້າງຕັ້ງຄະນະຊາວ ໜຸ່ມປະຊາຊົນປະຕິວັດລາວຄົບຮອບ 70 ປີ ໃນວັນທີ 14 ເມສາ 2025 ທີ່ໃກ້ຈະມາເຖິງນີ້, ເປັນການປະກອບສ່ວນສໍາຄັນໃນການເພີ່ມທະວີຄວາມສາມັກຄີ ຊາວໜຸ່ມໃນທຸກຂົງເຂດວຽກງານ ແລະ ບົນຈິດໃຈຂອງຊາວໜຸ່ມແຫ່ງຍຸກສະໄໝ. ນອກນັ້ນ, ຍັງເປັນພື້ນຖານໃນການຈັດຕັ້ງປະຕິບັດຕົວຈິງ ແລະ ລົງເລິກການແລກປ່ຽນລະຫວ່າງຊາວໜຸ່ມລາວ-ຈີນ, ເປັນການປະກອບສ່ວນຢ່າງຕັ້ງໜ້າໃນການຜັນຂະ ຫຍາຍເນື້ອໃນຄູ່ຮ່ວມຊາຕາກຳລາວ-ຈີນ ໃຫ້ແໜ້ນແຟ້ນຍິ່ງໆຂຶ້ນ. ກິດຈະກຳນີ້, ຈະເປັນເວທີໃຫ້ຊາວໜຸ່ມລາວສະແດງຄວາມຮູ້, ຄວາມສາມາດ, ແລກປ່ຽນປະສົບການ ແລະ ຊຸກຍູ້ຊາວໜຸ່ມໃນທຸກຂົງເຂດວຽກງານ ທີ່ມີຜົນງານດີເດັ່ນ, ຫ້າວຫັນໃນໜ້າທີ່ວຽກງານ, ຊຸກຍູ້ຊ່ວຍເຫລືອສັງຄົມ ແລະ ສຶກສາອົບຮົມໃຫ້ຄົນເປັນຄົນດີໃນທົ່ວສັງຄົມ.

ທ່ານ ນາງ ແສງແກ້ວ (MO XIAOLING) ຫົວໜ້າວິທະຍຸ-ໂທລະພາບສູນການຈີນ ປະຈຳ ລາວ ​ໄດ້​ໃຫ້​ຮູ້ວ່າ: ໃນຖານະເປັນຂົວຕໍ່ທີ່ສໍາຄັນ ສໍາລັບການຮ່ວມມືມິດຕະພາບລະຫວ່າງສອງປະເທດຈີນ-ລາວ, ວິທະຍຸ-ໂທລະພາບສູນການຈີນ ປະຈໍາລາວ ຈະອອກແຮງຊຸກຍູ້ສົ່ງເສີມການແລກປ່ຽນ ແລະ ການຮຽນຮູ້ເຊິ່ງກັນ ແລະ ກັນລະຫວ່າງປະຊາຊົນສອງປະເທດ ໂດຍສະເພາະແມ່ນວຽກງານຊາວໜຸ່ມ. ງານປະກວດຊາວໜຸ່ມດີເດັ່ນ ຄັ້ງນີ້ຈະສະແດງໃຫ້ເຫັນເລື່ອງລາວຜົນງານ, ການຕໍ່ສູ້ຊີວິດ, ຄວາມອົດທົນພະຍາຍາມ, ຊາວໜຸ່ມຕາມຍຸກສະໄໝ ໂດຍຜ່ານສື່ໂຄສະນາຫລາຍຊ່ອງທາງ ແລະ ຫລາຍຮູບແບບ ເພື່ອສ້າງຂົວຕໍ່ແຫ່ງການສື່ສານ ສໍາລັບຊາວໜຸ່ມຂອງສອງປະເທດ ແລະ ສ້າງບາດກ້າວໃໝ່ໃຫ້ກັບການສ້າງຄູ່ຮ່ວມຊາຕາກຳລາວ-ຈີນ. ວິທະຍຸໂທລະພາບສູນການຈີນ ປະຈຳ ສປປ ລາວ ຈະນໍາໃຊ້ ທ່າ ແຮງຂອງຕົນໃນການເຜີຍແຜ່ຜ່ານສື່ໂຄສະນາ ໂດຍສະເພາະ ໂທລະພາບ, ວິທະຍຸ, ອິນເຕີເນັດ ແລະ ສື່ ສັງຄົມອອນລາຍຕ່າງໆ ເພື່ອລາຍງານຄວາມຄືບໜ້າຂອງກິດຈະກຳຢ່າງຮອບດ້ານ ແລະ ເສີມຂະຫຍາຍ ບົດບາດກິດຈະກຳໃຫ້ກວ້າງຂວາງ.

ງານປະກວດຄັ້ງນີ້, ເລີ່ມເປີດຮັບສະໝັກຜູ້ເຂົ້າ ປະກວດຊາວໜຸ່ມລາວອາຍຸລະຫວ່າງ 15-35 ປີ ສາມາດເຂົ້າ ຮ່ວມການປະກວດໂດຍຜ່ານ ການອານຸມັດຈາກອົງການຈັດຕັ້ງຂອງຕົນ ແລະ ປະຕິບັດໃຫ້ຖືກຕ້ອງຕາມລະບຽບຫລັກການໃນທົ່ວປະເທດ ນັບແຕ່ມື້ຖະແຫລງຂ່າວຈົນຮອດວັນທີ 20 ເມສາ 2025,  ການຄັດເລືອກຈະໄດ້ແບ່ງອອກເປັນ 2 ຂັ້ນຕອນຄື: ການຄັດເລືອກຮອບທີ 1 ຈະສຳເລັດໃນວັນທີ 24 ເມສາ ແມ່ນຄັດເລືອກເອົາ 30 ຄົນເຂົ້າຮອບທີ 2, ແລ້ວເປີດການໂຫວດ ອອນລາຍອອນລາຍຕັ້ງແຕ່ວັນທີ 25 ເມສາ ຫາ 4 ພຶດສະພາ 2025. ຫລັງຈາກນັ້ນ, ໃນວັນທີ 5-7 ພຶດສະພາ 2025 ຄະນະຮັບຜິດຊອບຈະຄັດເລືອກຜູ້ຊະນະຂັ້ນສຸດທ້າຍ ໂດຍຜ່ານປະສົມປະສານ 20 ຄະແນນການໂຫວດທາງອອນລາຍ ແລະ ການປະເມີນຈາກຜູ້ຊ່ຽວຊານ ຈະຄັດເລືອກເອົວ "ຊາວໜຸ່ມຕົວແບບ” 10 ທ່ານ ແລະ ຈະຈັດ ພິທີມອບລາງວັນ ໃນຕົ້ນເດືອນມິຖຸນາ. ພາຍຫລັງກິດຈະກຳ, ຄະນະຮັບຜິດ ຊອບຈະໄດ້ລົງຖ່າຍທຳສາລະຄະດີສັ້ນກ່ຽວກັບ ຊາວໜຸ່ມທີ່ໄດ້ຮັບລາງວັນ, ຜະລິດປຶ້ມຕົວແບບຊາວໜຸ່ມ, ແລະ ມີແຜນຈັດກອງປະຊຸມຖ່າຍທອດບົດຮຽນໃນໂຮງຮຽນ ແລະ ວິສາຫະກິດ ເພື່ອຂະຫຍາຍ ອິດທິພົນທາງສັງຄົມຂອງກິດຈະກຳຢ່າງຕໍ່ເນື່ອງ.

ຂ່າວ-ພາບ: ວຽງ​ສະຫວັນ

KPL