ຂປລ. ກະຊວງແຮງງານ ແລະ ສະຫວັດດີການສັງຄົມ ຈັດກອງປະຊຸມປືກສາຫາລື ເພື່ອກະກຽມການແຂ່ງຂັນສີມື ແຮງງານແຫ່ງຊາດ ຄັ້ງທີ 4 ​ໃນວັນທີ 2 ເມສາ 2025 ພາຍ​ໃຕ້​ການເປັນປະທານຂອງ ທ່ານ ນາງ  ແກ້ວ ຈັນທະວິໄຊ ຮອງລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ, ມີຄະນະບໍລິຫານງານສູນກາງ ສະຫະພັນກຳມະບານລາວ, ສະພາການຄ້າ ແລະ ອຸດສາ ຫະກໍາແຫ່ງຊາດລາວ ແລະ ພາກສ່ວນກ່ຽວຂ້ອງ ເຂົ້າຮ່ວມ.

ທ່ານ ນາງ ແກ້ວ ຈັນທະວິໄຊ ​ໄດ້​ໃຫ້​ຮູ້ວ່າ: ການແຂ່ງຂັນສີມືແຮງງານແຫ່ງຊາດ ໄດ້ຈັດຕັ້ງມາແລ້ວ 3 ຄັ້ງ ຢູ່ນະຄອນຫລວງວຽງຈັນ. ​ໃນ​ນັ້ນ, ຄັ້ງທີ 1 ຈັດຂຶ້ນໃນປີ 2012, ຄັ້ງທີ 2 ຈັດຂຶ້ນໃນປີ 2016, ຄັ້ງທີ 3 ຈັດຂຶ້ນໃນປີ 2018 ແລະ ຄັ້ງທີ 4 ຈະຈັດຂຶ້ນໃນ ລະຫວ່າງ 28-30 ເມສາ 2025 ເພື່ອຄັດເລືອກເອົານັກແຂ່ງຂັນ ສີມືແຮງງານ ຜູ້ທີ່ມີສີມືແຮງງານດີເລີດ ຕາງໜ້າທີມຊາດລາວເຂົ້າຮ່ວມ ການແຂ່ງຂັນສີມືແຮງງານອາຊຽນ ຄັ້ງທີ 14 ທີ່ປະເທດ ຟິນລິບປິນ ເປັນເຈົ້າພາບຈັດ​ຂຶ້ນ ໃນທ້າຍເດືອນສິງຫາ 2025 ນີ້.

ສຳລັບ ການແຂ່ງຂັນສີມືແຮງງານ ແຫ່ງຊາດຄັ້ງທີ 4 ປະກອບມີ 5 ສາຂາຊ່າງ ຄື: ຕິດຕັ້ງໄຟຟ້າໃນອາຄານ (Electrical Installations)ຈັດຢູ່ສະຖາບັນພັດທະນາສີມືແຮງງານ;  ເຕັກໂນໂລຊີອອກແບບກຣາບຟິກ (Graphic Design Technology)ຈັດຢູ່ ວິທະຍາໄລເຕັກນິກວິຊາຊີບ ມິດຕະພາບວຽງຈັນ-ຮ່າໂນ້ຍ;ປຸງແຕ່ງອາຫານ (Cooking) ຈັດຢູ່ວິທະຍາໄລເຕັກນິກປາກປ່າສັກ;ເຮັດຕູ້ໄມ້ (Cabinet Making)ຈັດຢູ່ ສະຖາບັນພັດທະນາສີມືແຮງງານ; ເຕັກໂນໂລຊີເວັບໄຊ (Web Technologies)ຈັດຢູ່ ຫໍປະຊຸມແຫ່ງຊາດ.

ສຳລັບການເຂົ້າຮ່ວມການແຂ່ງຂັນ ສີມືແຮງງານອາຊຽນ ຂອງ ສປປ ລາວ ເປັນການປະຕິບັດສິດ ແລະ ພັນທະຂອງ ສປປ ລາວ ໃນຖານະເປັນປະເທດສະມາຊິກອາຊຽນ ເພື່ອຍາດແຍ່ງເອົາຜົນປະໂຫຍດດ້ານເຕັກນິກວິຊາການ ໃນການພັດທະນາຄວາມເຂັ້ມແຂງ ໃຫ້ນາຍຊ່າງສີມືຂອງຄົນລາວ, ການແລກປ່ຽນບົດຮຽນ​ເຊິ່ງກັນ ແລະ ກັນໃນວຽກງານຝຶກ  ແລະ ພັດທະນາສີມືແຮງງານ. ພ້ອມນັ້ນ, ຍັງເປັນຂີດໝາຍທີ່ສຳຄັນ ຂອງນາຍຊ່າງສີມືຂອງລາວ ທີ່ຈະໄດ້ໄປສະແດງ ຄວາມສາມາດຂອງຕົນໃນເວທີດັ່ງກ່າວ ​ເຊິ່ງເປັນການທົດສອບລະດັບຄວາມຮູ້, ຄວາມສາມາດ ແລະ ລະດັບມາດຕະຖານສີມືນາຍຊ່າງຂອງຄົນລາວບັນດາເຜົ່າ ກັບສີມືນາຍຊ່າງທີ່ດີເດັ່ນ ຈາກບັນດາປະເທດສະມາຊິກອາຊຽນດ້ວຍກັນ.ໃນໄລຍະຜ່ານມາ ສປປ ລາວ ພວກເຮົາໄດ້ເຂົ້າຮ່ວມການແຂ່ງຂັນສີມືແຮງງານອາຊຽນ ຈໍານວນ 12 ຄັ້ງ, ສາມາດຍາດມາໄດ້ 1 ຫລຽນເງິນ ຈາກສາຂາວິຊາຊ່າງຕິດຕັ້ງໄຟຟ້າໃນອາຄານ ໃນການແຂ່ງຂັນສີມືແຮງງານອາຊຽນ ຄັ້ງທີ Xທີ່ຮ່າໂນຍ, ສສ ຫວຽດນາມ ແລະ ໄດ້ຮັບໃບຢັ້ງຢືນສີມືແຮງງານລະດັບອາຊຽນ 21 ໃບ.

ຂ່າວ-ພາບ: ເກດສະໜາ

KPL