KPL
ຂປລ.ກົມຄຸ້ມຄອງຊັບສິນແຫ່ງລັດ ກະຊວງການເງິນ ຮ່ວມກັບ ກົມກົດໝາຍ ກະຊວງຍຸຕິທໍາ ໄຈັດກອງປະຊຸມທາບທາມ ຄໍາເຫັນຕໍ່ຮ່າງດໍາລັດວ່າດ້ວຍ ການປັບໃໝ ແລະ ມາດຕະການອື່ນຕໍ່ຜູ້ລະເມີດກົດໝາຍ ແລະ ລະບຽບການ ກ່ຽວກັບຊັບສິນຂອງລັດ ໃນວັນທີ 1 ເມສາ 2025
ຂປລ.ກົມຄຸ້ມຄອງຊັບສິນແຫ່ງລັດ ກະຊວງການເງິນ ຮ່ວມກັບ ກົມກົດໝາຍ ກະຊວງຍຸຕິທໍາ ໄຈັດກອງປະຊຸມທາບທາມ ຄໍາເຫັນຕໍ່ຮ່າງດໍາລັດວ່າດ້ວຍ ການປັບໃໝ ແລະ ມາດຕະການອື່ນຕໍ່ຜູ້ລະເມີດກົດໝາຍ ແລະ ລະບຽບການ ກ່ຽວກັບຊັບສິນຂອງລັດ ໃນວັນທີ 1 ເມສາ 2025 ໂດຍການເປັນປະທານຂອງ ທ່ານ ກົງຈີ ຢ່າງຈື່ ຮອງລັດຖະມົນຕີກະຊວງຍຸຕິທໍາ, ມີຫົວໜ້າກົມ, ຮອງກົມ ຂອງສອງກະຊວງ, ພ້ອມດ້ວຍຜູ້ຕາງໜ້າຈາກບັນດາກະຊວງ, ອົງການທຽບເທົ່າ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ກົງຈີ ຢ່າງຈື່ ໄດ້ໃຫ້ຮູ້ວ່າ: ຊັບສິນຂອງລັດ ມີທັງຊັບສິນສັງຫາລິມະຊັບ ແລະ ອະສັງຫາ ລິມະຊັບ. ສະນັ້ນ, ກອງປະຊຸມຄັ້ງນີ້ຕ້ອງໄດ້ພ້ອມກັນຄົ້ນຄວ້າວິທີການ, ມາດຕະການໃນການຄຸ້ມຄອງຊັບສິນຂອງລັດ ກໍຄື ການກໍານົດຫລັກການ, ລະບຽບການ ແລະ ມາດຕະການອື່ນຕໍ່ຜູ້ລະເມີດກົດໝາຍ ແລະ ລະບຽບການ ກ່ຽວກັບຊັບສິນຂອງລັດ ເຊັ່ນ: ການກໍານົດຂອບເຂດການນໍາໃຊ້, ການປັບໃໝ ຕໍ່ຜູ້ລະເມີດກົດໝາຍ ກໍຄື ການທໍາລາຍຊັບສິນຂອງລັດ, ການບໍ່ປະຕິບັດພັນທະຄ່າເຊົ່າ ຫລື ສໍາປະທານທີ່ດິນຂອງລັດ, ບໍ່ຊໍາລະຄ່າສັງຫາລິມະຊັບຕາມກໍານົດເວລາ, ການບໍ່ປະຕິບັດພັນທະຄ່າຊັບພະຍາກອນ ແລະ ອື່ນໆ ເພື່ອເປັນບ່ອນອີງໃຫ້ແກ່ ເຈົ້າໜ້າທີ່ຄຸ້ມຄອງຊັບສິນຂອງລັດ ໃນການປັບໃໝ ແລະ ການປະຕິບັດຕໍ່ຜູ້ລະເມີດ ຢ່າງຖືກຕ້ອງ, ເຂັ້ມງວວດ ແລະ ເປັນເອກະພາບ ໃນຂອບເຂດທົ່ວປະເທດ ແນໃສ່ເຮັດໃຫ້ບຸກຄົນ, ນິຕິບຸກຄົນ ແລະ ການຈັດຕັ້ງມີສະຕິຕື່ນຕົວເຄົາລົບ, ປະຕິບັດກົດໝາຍ ແລະ ລະບຽບການກ່ຽວກັບຊັບສິນຂອງລັດ ປະກອບສ່ວນເຂົ້າໃນ ການພັດທະນາເສດຖະກິດ-ສັງຄົມຂອງຊາດ.
ໂອກາດນີ້, ທ່ານ ພຸດທະສິນ ເຮືອງທະວົງ ຫົວໜ້າກົມຄຸ້ມຄອງຊັບສິນແຫ່ງລັດ ກະຊວງການເງິນ ຍັງໄດ້ລາຍງານສະພາບການປັບໃໝ ແລະ ການນໍາໃຊ້ມາດຕະການ ຕໍ່ຜູ້ລະເມີດກົດໝາຍ ແລະ ລະບຽບການກ່ຽບກັບຊັບສິນຂອງລັດ ໃນໄລຍະຜ່ານມາ ໂດຍສັງເຂບ ແລະ ທ່ານ ສົມບູນ ວົງພະຈັນ ຮອງຫົວໜ້າກົມກົດໝາຍ ກະຊວງຍຸຕິທໍາ ໄດ້ສະເໜີຮ່າງດໍາລັດ ວ່າດ້ວຍການປັບໃໝ ແລະ ມາດຕະ ການອື່ນ ຕໍ່ຜູ້ລະເມີດກົດໝາຍ ແລະ ລະບຽບການ ກ່ຽວກັບຊັບສິນຂອງລັດ ເຊິ່ງປະກອບມີ 5 ໝວດ, 29 ມາດຕາ.
ຂ່າວ-ພາບ: ກະຊວງການເງິນ
KPL
