KPL
ສາຍການບິນຫວຽດເຈັດ (VietJet) ໄດ້ເປີດບໍລິການຖ້ຽວບິນໃໝ່ຢ່າງຕໍ່ເນື່ອງ 4 ແຫ່ງທີ່ເຊື່ອມຕໍ່ນະຄອນຮ່າໂນ້ຍ ແລະ ນະຄອນໂຮ່ຈີ່ມິນງຂອງຫວຽດນາມ ໄປປັກກິ່ງ ແລະ ກວາງໂຈ່ວ ປະເທດຈີນ.
ຂປລ. ສາຍການບິນຫວຽດເຈັດ (VietJet) ໄດ້ເປີດບໍລິການຖ້ຽວບິນໃໝ່ຢ່າງຕໍ່ເນື່ອງ 4 ແຫ່ງທີ່ເຊື່ອມຕໍ່ນະຄອນຮ່າໂນ້ຍ ແລະ ນະຄອນໂຮ່ຈີ່ມິນງຂອງຫວຽດນາມ ໄປປັກກິ່ງ ແລະ ກວາງໂຈ່ວ ປະເທດຈີນ. ເສັ້ນທາງເຫລົ່ານີ້ເປັນຂີດໝາຍທີ່ສຳຄັນໃນການສືບຕໍ່ຂະຫຍາຍສາຍການບິນຂອງ VietJet ໃນປີ 2025 ເຊິ່ງລວມທັງເສັ້ນທາງການບິນໃໝ່ອື່ນໆໄປຍັງອິນເດຍ, ຍີ່ປຸ່ນ, ສິງກະໂປ ທີ່ໄດ້ເນັ້ນໜັກເຖິງການເຕີບໂຕຢ່າງແຂງແຮງຂອງສາຍການບິນ ແລະ ຄວາມໝັ້ນໝາຍໃນການເພີ່ມທະວີການເຊື່ອມຕໍ່ສາກົນ.
ໄປພ້ອມກັບການຂະຫຍາຍເສັ້ນທາງບິນໃໝ່ນີ້ ສາຍການບິນ VietJet ໄດ້ມີບໍລິການພິເສດແບບຈຳກັດເວລາຕັ້ງແຕ່ມື້ນີ້ເຖິງວັນທີ 5 ເມສາ 2025, ດ້ວຍຄ່າໂດຍສານແບບ Eco-class ເລີ່ມຕົ້ນຕໍ່າສຸດ USD0 (ບໍ່ລວມພາສີ ແລະ ຄ່າທຳນຽມ) ໃນທຸກເສັ້ນທາງ. ບໍລິການນີ້ແມ່ນມີຢູ່ໃນຖ້ຽວບິນລະຫວ່າງວັນທີ 15 ເມສາ 2025 ຫາວັນທີ 28 ມີນາ 2026 (ຍົກເວັ້ນວັນພັກລັດຖະການ), ດ້ວຍການຈອງຜ່ານ www.vietjetair.com ຫລື ແອັບມືຖື VietJet Air.ເສັ້ນທາງໃໝ່ຫວຽດນາມ-ຈີນໃຫ້ບໍລິການປະຈຳວັນ ຈາກນະຄອນໂຮ່ຈີ່ມິງ ໄປ ປັກກິ່ງ ແລະ ກວາງໂຈ່ວ ແລະ ຮ່າໂນ້ຍໄປກວາງໂຈ່ວ. ໃນຂະນະທີ່ ເສັ້ນທາງຮ່າໂນ້ຍ-ປັກກິ່ງໄດ້ເລີ່ມດຳເນີນຖ້ຽວບິນ 3 ຖ້ຽວຕໍ່ອາທິດ ກ່ອນທີ່ຈະຫັນເປັນການບໍລິການປະຈຳວັນແຕ່ວັນທີ 27/04/2025 ເປັນຕົ້ນໄປ. ນອກຈາກນັ້ນ, ການບໍລິການໃໝ່ຈາກ ຮ່າໂນ້ຍ-ຊຽງໄຮຈະເລີ່ມດຳເນີນໃນວັນທີ 29/04/2025, ໂດຍຈະເປີດໃຫ້ບໍລິການຖ້ຽວບິນທຸກວັນ. ນັບແຕ່ຖ້ຽວບິນທຳອິດຈາກຫວຽດນາມໄປຈີນໃນປີ 2014, VietJet ໄດ້ເສີມສ້າງເຄືອຂ່າຍການບິນລະຫວ່າງສອງປະເທດບ້ານໃກ້ເຮືອນຄຽງ ເຊິ່ງປັດຈຸບັນໄດ້ກວມເອົາຫລາຍກວ່າ 50 ປາຍທາງໃນທົ່ວປະເທດຈີນ. ເຄືອຂ່າຍນີ້ສະເໜີຖ້ຽວບິນທີ່ປະຫຍັດກັບຜູ້ຄົນລ້ານກວ່າຄົນ, ປະກອບສ່ວນໃນການຊຸກຍູ້ການແລກປ່ຽນວັດທະນະທຳ, ເສດຖະກິດ, ການຄ້າ, ການທ່ອງທ່ຽວໃນທົ່ວອາຊີ.
ໃນປີນີ້, ເສັ້ນທາງໃໝ່ ຫວຽດນາມ - ຈີນ ແມ່ນສ່ວນໜຶ່ງໃນການເປີດກວ້າງສາກົນຂອງ VietJet ຈາກສູນກາງທີ່ສຳຄັນຂອງຫວຽດນາມ. ນັບແຕ່ກາງເດືອນມີນາເປັນຕົ້ນມາ, ສາຍການບິນໄດ້ເລີ່ມບິນກົງຈາກ ນະຄອນໂຮ່ຈີ່ມິງໄປ Hyderabad ແລະ Bengaluru ທີ່ປະເທດອິນເດຍ. ນອກຈາກນັ້ນຍັງມີເສັ້ນທາງໃໝ່ຈາກນະຄອນໂຮ່ຈີ່ມິງ ໄປ Nagoya ແລະ Fukuoka ທີ່ປະເທດຍີ່ປຸ່ນ ທີ່ຈະເລີ່ມດຳເນີນໃນທ້າຍເດືອນເມສານີ້. ໃນຂະນະທີ່ເສັ້ນທາງໃໝ່ທີ່ເຊື່ອມຕໍ່ເກາະ Phu Quoc ທີ່ເປັນເກາະໃຫຍ່ທີ່ສຸດຂອງຫວຽດນາມ ໄປຫາ ສິງກະໂປ ຈະເລີ່ມດຳເນີນໃນທ້າຍເດືອນພຶດສະພານີ້.ການຂະຫຍາຍຕົວຂອງ VietJet ແມ່ນຂັບເຄື່ອນໂດຍເຮືອບິນທີ່ທັນສະໄໝ, ຄວາມມຸ່ງໝັ້ນອັນໜັກແໜ້ນຕໍ່ກັບການດຳເນີນງານທີ່ເປັນເລີດ ແລະ ສຸມໃສ່ຄວາມປອດໄພຂອງຜູ້ໂດຍສານ. ປັດຈຸບັນ, ສາຍການບິນໄດ້ສະໜອງຖ້ຽວບິນກົງປະຈຳວັນຈາກ ນະຄອນຫລວງວຽງຈັນ ໄປຫາ ນະຄອນໂຮ່ຈີ່ມິງ, ສູນເສດຖະກິດໃຫຍ່ຂອງປະເທດຫວຽດນາມ ແລະ ເມືອງຮ່າໂນ້ຍ ທີ່ເປັນນະຄອນຫລວງຂອງປະເທດຫວຽດນາມ. ຈາກສອງນະຄອນດັ່ງກ່າວ, ບັນດານັກທ່ອງທ່ຽວສາມາດເຊື່ອມຕໍ່ໄດ້ຢ່າງງ່າຍດາຍກັບເຄືອຂ່າຍການບິນທີ່ກວ້າງຂວາງຂອງ VietJet ທີ່ກວມເອົາບັນດາຈຸດໝາຍປາຍທາງທີ່ເປັນນິຍົມໃນຫວຽດນາມ ແລະ ໃນທົ່ວອາຊີ-ປາຊີຟິກ.
KPL
