ຂປລ. ກອງປະຊຸມສາ​ມັນຄົບ ຄະນະກໍາມະການ ສູນກາງແນວລາວສ້າງຊາດ (ສນຊ) ຄັ້ງທີ 4 ສະໄໝທີ XI ເປີດຂຶ້ນຢ່າງເປັນທາງການ ໃນວັນທີ 15-16 ມັງກອນ 2025 ໂດຍການເປັນປະທານຂອງ ທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ, ມີບັນດາຄະນະ ກຳມະການ ສນຊ ອ້ອມຂ້າງສູນກາງ ແລະ ບັນດາແຂວງ ໃນຂອບເຂດ ທົ່ວປະເທດ, ພ້ອມດ້ວຍ ພະເຖລາ-ນຸເຖລະ ເຂົ້າຮ່ວມ.

ທ່ານ ສິນລະວົງ ຄຸດໄພທູນ ໄດ້ໃຫ້ຮູ້ວ່າ: ກອງປະຊຸມໃນຄັ້ງນີ້, ຈະໄດ້ພ້ອມກັນລົງເລິກຄົ້ນຄວ້າ ຫລາຍບັນຫາສຳຄັນ ເປັນຕົ້ນ ທົບທວນຄວາມຄືບໜ້າ ໃນການຈັດຕັ້ງປະຕິບັດມະຕິກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XI ຂອງແນວລາວສ້າງຊາດ ໂດຍສະເພາະແມ່ນ ມະຕິກອງປະຊຸມສາມັນຄົບຄະນະ ສນຊ ຄັ້ງທີ 3 ໃນໜຶ່ງປີຜ່ານມາ ເຊິ່ງ ສາມາດຍາດໄດ້ຜົນງານ, ດ້ານດີ, ດ້ານອ່ອນ, ຂໍ້ຄົງຄ້າງ, ບົດຮຽນທີ່ຖອດຖອນໄດ້ ແລະ ຈະພ້ອມກັນຄົ້ນຄວ້າກໍານົດແຜນວຽກຈຸດສຸມ ໃນປີ 2025. ພ້ອມນີ້, ຍັງໄດ້ຮັບຟັງການລາຍງານ ແລະ ມີຄໍາເຫັນຕໍ່ການຈັດຕັ້ງປະຕິບັດ ແຜນພັດທະນາ ອົງການແນວລາວສ້າງຊາດ ປະຈຳປີ 2024 ແລະ ແຜນການ ປີ 2025 ດ້ວຍຄາດໝາຍ ແລະ ວິທີການແນວໃດ ຈຶ່ງຈະບັນລຸຜົນ.

ກອງປະຊຸມ, ຍັງຈະໄດ້ເອກະພາບກັນ ໃນທິດທາງສໍາຄັນ ກ່ຽວກັບການກະກຽມກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XII ຂອງແນວລາວສ້າງຊາດ, ຮັບຟັງການລາຍງານ ແລະ ມີຄຳເຫັນກ່ຽວກັບຄວາມຄືບໜ້າ ໃນການກະກຽມສະເຫລີມສະຫລອງ ວັນສ້າງຕັ້ງແນວລາວສ້າງຊາດ ຄົບຮອບ 75 ປີ ຕິດພັນກັບຂະບວນ ການສະເຫລີມສະຫລອງ 3 ວັນປະຫວັດສາດ ຂອງພັກ-ຂອງຊາດ ປີ 2025, ພ້ອມທັງ ປະເມີນຜົນ ແລະ ວາງໜ້າທີ່ສຳຄັນໃນ ການປະກອບສ່ວນຈັດຕັ້ງປະຕິບັດ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໃນຂົງເຂດແນວລາວສ້າງຊາດ, ເຊື່ອມຊຶມມະຕິກອງປະຊຸມ ຄົບຄະນະບໍລິຫານງານສູນກາງພັກ ຄັ້ງທີ 9 ສະໄໝທີ XI, ແຜນພັດທະນາ ປະ​ຈຳປີ 2025 ຂອງລັດຖະບານ ໂດຍຕິດພັນກັບການຈັດຕັ້ງປະຕິບັດ ມະຕິ 12 ຂອງຄະນະປະຈຳ ສນຊ ກ່ຽວກັບການສ້າງເສດຖະກິດ ເອກະລາດເປັນເຈົ້າຕົນເອງ ໃນຂົງເຂດແນວລາວສ້າງຊາດ, ຮັບຟັງການປະກອບຄຳເຫັນ, ແລກປ່ຽນບົດຮຽນ ແລະ ປະສົບການຕົວຈິງ ເຊິ່ງກັນ ແລະ ກັນ ໂດຍສະເພາະແມ່ນ ຕົວແບບຂະບວນການ ຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ. ພ້ອມກັນນີ້, ກອງປະຊຸມ ຍັງຈະໄດ້ພິຈາລະນາຮັບຮອງເອົາການຄັດເລືອກ, ແຕ່ງຕັ້ງກໍາມະການ ສນຊ ປ່ຽນແທນຈຳນວນໜຶ່ງ.

 ພາບ: ອ່າຍຄຳ

KPL