ຂປລ. ຄະນະບໍລິຫານງານຊາວໜຸ່ມ ກະຊວງການຕ່າງປະເທດ ໄດ້ດໍາເນີນກອງປະຊຸມໃຫຍ່ ຜູ້ແທນຊາວໜຸ່ມ ກະຊວງການຕ່າງປະເທດ ຄັ້ງທີ XII ໃນວັນທີ 14 ມັງກອນ 2025 ໂດຍການເປັນປະທານຂອງ ສະຫາຍ ນາງ ມຸກດາວັນ ສີສຸລິດ ກໍາມະການສູນກາງຊາວໜຸ່ມ ປະຊາຊົນປະຕິວັດລາວ, ກໍາມະການຄະນະພັກກະຊວງ, ເລຂາຄະນະບໍລິຫານງານ ຊາວໜຸ່ມກະຊວງການຕ່າງປະເທດ, ໃຫ້ກຽດຂອງ ສະຫາຍ ທອງສະຫວັນ ພົມວິຫານ ກໍາມະການສູນກາງພັກ, ເລຂາຄະນະພັກກະຊວງ, ລັດຖະມົນຕີ ກະຊວງການຕ່າງປະເທດ, ສະຫາຍ ມອນໄຊ ລາວມົວຊົ່ງ ກໍາມະການສໍາຮອງສູນກາງພັກ, ເລຂາຄະນະບໍລິຫານງານສູນກາງ ຊາວໜຸ່ມປະຊາຊົນ ປະຕິວັດລາວ, ມີຄະນະພັກກະຊວງ, ບັນດາເລຂາໜ່ວຍພັກ ແລະ ຕາງໜ້າໜ່ວຍພັກຈາກຫ້ອງການ ແລະ ບັນດາກົມຕ່າງໆອ້ອມຂ້າງກະຊວງ, ອົງການຈັດຕັ້ງມະຫາຊົນ, ຄະນະບໍລິຫານງານຊາວໜຸ່ມ ແລະ ສະມາຊິກຊາວໜຸ່ມກະຊວງການຕ່າງປະເທດ ເຂົ້າຮ່ວມ.

ກອງປະຊຸມ ໄດ້ຮັບຟັງການລາຍງານ ກ່ຽວກັບການຈັດຕັ້ງປະຕິບັດ ວຽກງານຊາວໜຸ່ມ ຂອງຄະນະຊາວໜຸ່ມ ກະຊວງການຕ່າງປະເທດ ໃນໄລຍະຜ່ານມາ ແລະ ການວາງແຜນການທິດທາງໃນຕໍ່ໜ້າ ເຊິ່ງໄດ້ຍົກໃຫ້ເຫັນເຖິງຜົນສໍາເລັດອັນໃຫຍ່ຫລວງ ທີ່ຊາວໜຸ່ມຂະແໜງການຕ່າງປະເທດ ສາມາດຍາດມາໄດ້ ໃນຕະຫລອດໄລຍະ 5 ປີຜ່ານມາ, ພ້ອມທັງຕີລາຄາຄືນຈຸດດີ ທີ່ຕ້ອງເສີມຂະຫຍາຍ ແລະ ຂໍ້ຄົງຄ້າງຈໍານວນໜຶ່ງ ທີ່ຕ້ອງໄດ້ສືບຕໍ່ປັບປຸງແກ້ໄຂໃນຕໍ່ໜ້າ. ປັດຈຸບັນ, ຄະນະບໍລິຫານງານຊາວໜຸ່ມ ກະຊວງການຕ່າງປະເທດ ມີໂຄງປະກອບການຈັດຕັ້ງ ຈໍານວນ 185 ໜ່ວຍ (ຢູ່ພາຍໃນກະຊວງ ຈໍານວນ 17 ໜ່ວຍ, ສໍານັກງານຜູ້ຕາງໜ້າຢູ່ຕ່າງປະເທດ 41 ໜ່ວຍ ແລະ ໜ່ວຍນັກສຶກສາ ທີ່ຂຶ້ນກັບຄະນະຊາວໜຸ່ມຮາກຖານ ບັນດາສໍານັກງານຜູ້ຕາງໜ້າຢູ່ຕ່າງປະເທດ 127 ໜ່ວຍ) ແລະ 8 ຄະນະຮາກຖານ, ມີສະມາຊິກທັງໝົດປະມານ 7.830 ກວ່າສະຫາຍ, ຍິງ 2.736 ກວ່າສະຫາຍ. ຄະນະບໍລິຫານງານຊາວໜຸ່ມ ໄດ້ຖືເອົາວຽກງານໂຄສະນາສຶກສາອົບຮົມ ວຽກງານ ການເມືອງ-ແນວຄິດ ແລະ ຄຸນສົມບັດໃຫ້ແກ່ ສະ ມາຊິກຊາວໜຸ່ມຂອງຕົນ ເປັນບຸລິມະສິດສູງສຸດ ໄປຄຽງຄູ່ກັບການເຄື່ອນໄຫວວຽກງານ ວິຊາສະເພາະຂອງຕົນ ແລະ ຖືເອົາຂໍ້ແຂ່ງຂັນ 4 ບຸກ ທີ່ຄະນະບໍລິຫານງານ ສູນກາງຊາວໜຸ່ມ ປະຊາຊົນປະຕິວັດລາວ ວາງອອກເປັນຄາດໝາຍສູ້ຊົນ. ຕະຫລອດໄລຍະຜ່ານມາ, ຊາວໜຸ່ມຂະແໜງ ການຕ່າງປະເທດ ໄດ້ຮັບນາມມະຍົດເປັນຊາວໜຸ່ມ 4 ບຸກ ເຖິງ 6 ສະໄໝຕິດຕໍ່ກັນ ແລະ ໄດ້ຮັບທຸງໄຊນໍາໜ້າ ໃນຂະບວນການແຂ່ງຂັນ 4 ບຸກ ຈາກຄະນະບໍລິຫານງານສູນກາງຊາວໜຸ່ມປະຊາຊົນ ປະຕິວັດລາວ.

ກອງປະຊຸມຄັ້ງນີ້, ຍັງໄດ້ປ່ອນບັດຄັດເລືອກ ເອົາຄະນະບໍລິຫານງານຊາວໜຸ່ມ ກະຊວງການຕ່າງປະເທດ ຊຸດໃໝ່ ຈໍານວນ 19 ສະຫາຍ, ຍິງ 6 ສະຫາຍ. ກອງປະຊຸມຄັ້ງປະຖົມມະລືກຂອງຄະນະຊຸດໃໝ່ ໄດ້ເລືອກເອົາຄະນະປະຈໍາ 7 ສະຫາຍ, ຍິງ 2 ສະຫາຍ. ໃນນັ້ນ,  ເລືອກເອົາ ສະຫາຍ ນາງ ມຸກດາວັນ ສີສຸລິດ ເປັນເລຂາຄະນະ ບໍລິຫານງານຊາວໜຸ່ມ ກະຊວງການຕ່າງປະເທດ, ສະຫາຍ ໂກ້ ນັນທະສອນ, ສະຫາຍ ຈັນຖຸນາ ສຸທໍາມະວົງ ແລະ ສະຫາຍ ສຸກສາຍຂອງ ແກ້ວລາ ເປັນຮອງເລຂາຄະນະບໍລິຫານງານຊາວໜຸ່ມ ກະຊວງການຕ່າງປະເທດ. ພ້ອມນີ້, ຍັງໄດ້ ເລືອກຕັ້ງເອົາປະທານ, ຮອງປະທານ ແລະ ກໍາມະການກວດກາ, ພ້ອມທັງ ເລືອກຕັ້ງເອົາຄະນະຜູ້ແທນສົມບູນ ແລະ ຜູ້ແທນສໍາຮອງ ເພື່ອເຂົ້າຮ່ວມກອງປະຊຸມໃຫຍ່ ຜູ້ແທນຊາວໜຸ່ມປະຊາຊົນ ປະຕິວັດລາວ ທົ່ວປະເທດ ຄັ້ງທີ IX ອີກດ້ວຍ.

ໃນໂອກາດນີ້, ສະຫາຍ ທອງສະຫວັນ ພົມວິຫານ ແລະ ສະຫາຍ ມອນໄຊ ລາວມົວຊົ່ງ ໄດ້ມີຄຳເຫັນ ໂອ້ລົມ ເພື່ອເປັນເຂັມຊີ້ທິດເຍືອງທາງ ແລະ ເປັນບ່ອນອີງສໍາຄັນໃຫ້ແກ່ ຂະບວນການເຄື່ອນໄຫວ ຂອງຊາວໜຸ່ມຂະແໜງ ການຕ່າງປະເທດໃນຕໍ່ໜ້າ ມີຜົນສໍາເລັດໃໝ່, ທັງປະກອບສ່ວນເປັນກໍາລັງແຮງໃນການຈັດຕັ້ງປະຕິບັດ ມະຕິຂອງກອງປະຊຸມໃຫຍ່ ວຽກງານການຕ່າງປະເທດ ຄັ້ງທີ 14 ພາຍໃຕ້ຄໍາຂວັນ “ການທູດປ້ອງກັນເຫດ ແລະ ບຸກທະລຸ ເພື່ອພາລະກິດສ້າງສາ ແລະ ພັດທະນາປະເທດຊາດ”.

ໃນວາລະກອງປະຊຸມຄັ້ງນີ້, ຍັງມີພິທີມອບຫລຽນຊາວໜຸ່ມຕະລຸມບອນ ໃຫ້ແກ່ບຸກຄົນຂອງກະຊວງການຕ່າງປະເທດ ທີ່ມີຜົນງານດີເດັ່ນ, ມີຄຸນງາມຄວາມດີໃນການອຸທິດເຫື່ອແຮງ, ສະຕິປັນຍາ ແລະ ຊີ້ນໍາວຽກງານຂອງຄະນະຊາວໜຸ່ມ ປະຊາຊົນປະຕິວັດລາວ ໃນໄລຍະຜ່ານມາ ຈໍານວນ 29 ສະຫາຍ, ມອບໃບຍ້ອງຍໍ ໃຫ້ແກ່ຄະນະບໍລິຫານງານຊາວໜຸ່ມປະຊາຊົນປະຕິວັດລາວ ກະຊວງການຕ່າງປະເທດ ທີ່ມີຜົນງານດີເດັ່ນໃນການຈັດຕັ້ງປະຕິບັດວຽກງານຊາວໜຸ່ມ ໃນໄລຍະ 5 ປີຜ່ານມາ (2020-2024) ຈໍານວນ 25 ສະຫາຍ ຕື່ມອີກ.

ພາບ: ຂັນໄຊ

KPL