KPL
ຂປລ. ບໍລິສັດ ສະຕາໂທລະຄົມ (ຢູນິເທວ) ໄດ້ມອບທຶນໃນການຊ່ວຍເຫລືອ ໂຮງຮຽນ ມຕ ມູຈີ່ຫ້ວຍສານ ເມືອງບຸນໃຕ້ ແຂວງຜົ້ງສາລີ ຫລາຍກວ່າ 170 ລ້ານກີບ ພາຍໃຕ້ໂຄງການ “ໃຫ້ດ້ວຍຄວາມຮັກ ຮັບດ້ວຍຄວາມສຸກ” ເພື່ອສ້ອມແປງໂຮງຮຽນ, ຊ່ວຍເຫລືອການນຳເອົາ ນໍ້າສະອາດເຂົ້າໂຮງຮຽນ, ຊື້ດອກໄຟໂຊລ່າເຊວ ເພື່ອຕິດຕັ້ງໃຫ້ຫໍພັກນັກຮຽນ ພ້ອມທັງອຸປະກອນການສຶກສາຕ່າງໆ ລວມທັງເຄື່ອງນຸ່ງຫົ່ມທັງໃໝ່-ເກົ່າ ໃຫ້ນ້ອງນັກຮຽນ ແລະ ປະຊາຊົນທີ່ຂາດແຄນໃນໄລຍະທີ່ອາກາດໜາວ ຢູ່ບ້ານຈີ່ຫ້ວຍສານ, ບ້ານນ້ຳຂຸ້ນ ແລະ ບ້ານນາມາກ.
ຂປລ. ບໍລິສັດ ສະຕາໂທລະຄົມ (ຢູນິເທວ) ໄດ້ມອບທຶນໃນການຊ່ວຍເຫລືອ ໂຮງຮຽນ ມຕ ມູຈີ່ຫ້ວຍສານ ເມືອງບຸນໃຕ້ ແຂວງຜົ້ງສາລີ ຫລາຍກວ່າ 170 ລ້ານກີບ ພາຍໃຕ້ໂຄງການ “ໃຫ້ດ້ວຍຄວາມຮັກ ຮັບດ້ວຍຄວາມສຸກ” ເພື່ອສ້ອມແປງໂຮງຮຽນ, ຊ່ວຍເຫລືອການນຳເອົາ ນໍ້າສະອາດເຂົ້າໂຮງຮຽນ, ຊື້ດອກໄຟໂຊລ່າເຊວ ເພື່ອຕິດຕັ້ງໃຫ້ຫໍພັກນັກຮຽນ ພ້ອມທັງອຸປະກອນການສຶກສາຕ່າງໆ ລວມທັງເຄື່ອງນຸ່ງຫົ່ມທັງໃໝ່-ເກົ່າ ໃຫ້ນ້ອງນັກຮຽນ ແລະ ປະຊາຊົນທີ່ຂາດແຄນໃນໄລຍະທີ່ອາກາດໜາວ ຢູ່ບ້ານຈີ່ຫ້ວຍສານ, ບ້ານນ້ຳຂຸ້ນ ແລະ ບ້ານນາມາກ.
ໃນພິທີມອບ-ຮັບທຶນຊ່ວຍເຫລືອ ແລະ ອຸປະກອນການສຶກສາ ໃນຄັ້ງນີ້ ຈັດຂຶ້ນໃນວັນທີ 10 ມັງກອນ 2025 ຕາງໜ້າມອບໂດຍທ່ານ ຫງວຽນ ກວາງ ຫຽວ ອຳນວຍການ ສູນສະຕາມີເດຍ ຕາງໜ້າບໍລິສັດ ສະຕາໂທລະຄົມ ແລະ ຕາງໜ້າຮັບໂດຍທ່ານ ເຫລັກ ແສງວົງຄໍາ ຜູ້ອໍານວຍການໂຮງ ມຕ ມູຈີ່ຫ້ວຍສານ, ມີທ່ານ ບຸນສີຊ້າ ຮອງຫົວໜ້າຫ້ອງການສຶກສາທິການ ແລະ ກິລາເມືອງບູນໃຕ້, ທ່ານ ຫັດສະຫວ່າງສົງປະເສີດ ຮອງຫົວໜ້າຫ້ອງວ່າການປົກຄອງບູນໃຕ້ ພ້ອມດ້ວຍຄູ-ອາຈານ, ນ້ອງນັກຮຽນ ແລະ ພໍ່ແມ່ປະຊາຊົນ ບ້ານມູຈີ່ຫ້ວຍສານ ເຂົ້າຮ່ວມ.
ໃນໂອກາດນີ້, ທ່ານ ຫງວຽນ ກວາງ ຫຽວ ໄດ້ສະແດງຄວາມຮູ້ສຶກຍິນດີ ແລະ ດີໃຈ ທີ່ໄດ້ມີໂອກາດໄດ້ມາຊ່ວຍເຫລືອ. ຈຸດປະສົງໃນການຈັດຕັ້ງປະຕິບັດໂຄງການຄັ້ງນີ້ ກໍເພື່ອຊຸກຍູ້, ສົ່ງເສີມການສຶກສາ ໃຫ້ນ້ອງນັກຮຽນໃນເຂດຫ່າງໄກສອກຫລີກ ໄດ້ມີໂອກາດເຂົ້າເຖິງການສຶກສາທີ່ມີຄຸນນະພາບ, ຄຽງຄູ່ກັບການ ມີສະພາບ ການດຳລົງຊີວິດທີ່ດີຂອງປະຊາຊາຊົນ, ເຊິ່ງແຂວງຜົ້ງສາລີ ເປັນໜຶ່ງໃນແຂວງພາກເໜືອ ຂອງປະເທດລາວ ມີອາກາດໜາວເຢັນ ແລະ ມີພູມສັນຖານ ທີ່ເຕັມໄປດ້ວຍເປັນພູສູງ, ມີຫລາຍໝູ່ບ້ານທີ່ຢູ່ໃນເຂດຊົນນະບົດ ແລະ ຍັງມີຫລາຍຄອບຄົວ ທີ່ມີຄວາມຕ້ອງການ ການຊ່ວຍເຫລືອ ເຊິ່ງໜຶ່ງໃນນັ້ນກໍຄື ບ້ານຈີ່ຫ້ວຍສານ ເມືອງບຸນໃຕ້ ແຂວງຜົ້ງສາລີ. ສະນັ້ນ, ຢູນິເທວ ຈຶ່ງໄດ້ລະດົມທຶນ, ອຸປະກອນການຮຽນ, ເຄື່ອງນຸ່ງຫົ່ມທັງໃໝ່-ເກົ່າ ແລະ ເຂົ້າສານອາຫານແຫ້ງຕ່າງໆ ເພື່ອນຳມາຊ່ວຍເຫລືອໃນຄັ້ງນີ້.
ໂອກາດດັ່ງກ່າວ, ທ່ານ ເຫລັກ ແສງວົງຄໍາ ກໍໄດ້ກ່າວສະແດງຂອບໃຈ ຕໍ່ບໍລິສັດ ສະຕາໂທລະຄົມ ທີ່ໄດ້ໃຫ້ການຊ່ວຍເຫລືອໃນຄັ້ງນີ້, ເຊິ່ງເຮັດໃຫ້ນ້ອງນັກຮຽນ ໄດ້ຮັບການຍົກລະດັບຄຸນນະພາບ ໃນການຮ່ຳຮຽນ ກໍຄືນຳໄດ້ໃຊ້ຫ້ອງຮຽນທີ່ໄດ້ຮັບການບູລະນະ, ໄດ້ນຳໃຊ້ນ້ຳສະອາດ, ນັກຮຽນທີ່ຢູ່ຫໍພັກທັງ ຍິງ-ຊາຍ ໄດ້ນຳໃຊ້ດອກໄຟໂຊລ່າເຊວ, ປະຊາຊົນໃນບ້ານ ໄດ້ຮັບເຄື່ອງນຸ່ງຫົ່ມ ເຊິ່ງມີຄວາມຈຳເປັນໃນໄລຍະອາກາດໜາວ.
ໂຄງການ “ໃຫ້ດ້ວຍຄວາມຮັກ ຮັບດ້ວຍຄວາມສຸກ” ເປັນໂຄງການທີ່ໄດ້ຮັບການສ້າງຕັ້ງຂຶ້ນ ໂດຍ ບໍລິສັດສະຕາໂທລະຄົມ (ຢູນິເທວ) ເພື່ອສົ່ງເສີມການສຶກສາ ໃນເຂດຫ່າງໄກສອກຫລີກ ສົ່ງມອບການຊ່ວຍເຫລືອ ທາງດ້ານການດຳລົງຊີວິດ ໃນເຂດຊົນນະບົດທີ່ມີຄວາມຕ້ອງການ ເພື່ອຍົກລະດັບຄຸນນະພາບຊີວິດ ຂອງປະຊາຊົນໃຫ້ມີຊີວິດທີ່ດີຂຶ້ນ.
KPL
