KPL
ທ່ານ ເປໂດຣ ຊານເຊ,ນາຍົກລັດຖະມົນຕີ ແອັດສະປາຍ ປະກາດ ແຜນເກັບພາສີ ອະສັງຫາລິມະຊັບ ຄັ້ງໃໝ່ 100% ເພື່ອເກັບພາສີອະສັງຫາລິມະຊັບ ທີ່ຊື້ໂດຍ ຜູ້ຢູ່ອາໄສ ນອກສະຫະພາບ ເອີຣົບ(ອີຢູ) ເຊັ່ນ: ອັງກິດ
ຂປລ.ສຳນັກຂ່າວ ເອເອຟພີ,ວັນທີ14 ມັງກອນນີ້, ທ່ານ ເປໂດຣ ຊານເຊ,ນາຍົກລັດຖະມົນຕີ ແອັດສະປາຍ ປະກາດ ແຜນເກັບພາສີ ອະສັງຫາລິມະຊັບ ຄັ້ງໃໝ່ 100% ເພື່ອເກັບພາສີອະສັງຫາລິມະຊັບ ທີ່ຊື້ໂດຍ ຜູ້ຢູ່ອາໄສ ນອກສະຫະພາບ ເອີຣົບ(ອີຢູ) ເຊັ່ນ: ອັງກິດ ຊຶ່ງເປັນມາດຕະການ ທີ່ບໍ່ເຄີຍມີ ມາກ່ອນ ເພື່ອຮັບມືກັບ ສະພາວະສຸກເສີນ ດ້ານທີ່ຢູ່ອາໄສ ຂອງປະເທດ ພາຍຫລັງ ມີຜູ້ຢູ່ອາໄສນອກອີຢູ ຊື້ອະສັງຫາລິມະຊັບ ສູງເຖິງ 27.000ແຫ່ງ ໃນແອັດສະປາຍ ທີ່ບໍ່ແມ່ນ ເພື່ອການຢູ່ອາໄສ ແຕ່ເພື່ອສ້າງລາຍໄດ້.ສຳລັບ ມາດຕະການ ເພື່ອທີ່ຢູ່ອາໄສ 12 ມາດຕະການ ທີ່ນາຍົກລັດຖະມົນຕີ ແອັດສະປາຍ ປະກາດ ຄວບຄຸມເຖິງ ການຍົກເວັ້ນພາສີ ສຳລັບ ເຈົ້າຂອງເຮືອນ ທີ່ຈັດຫາ ທີ່ຢູ່ອາໄສ ລາຄາຖືກ, ການໂອນ ກຳມະສິດເຮືອນ ຫລາຍກວ່າ 3.000 ຫລັງ ໄປຍັງ ໜ່ວຍງານ ທີ່ຢູ່ອາໄສ ສາທາລະນະ ແຫ່ງໃໝ່ ແລະ ການຄວບຄຸມ ທີ່ເຂັ້ມງວດ ຍິ່ງຂຶ້ນ ລວມເຖິງ ການຂຶ້ນພາສີ ຫ້ອງເຊົ່າ ສຳລັບ ນັກທ່ອງທ່ຽວ./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
