*ສວນວາງສະແດງຊາພູເອີຈີນຂອງນະຄອນພູເອີ, ແຂວງຢຸນນານ, ສປຈີນ. ຫລາຍໆທ່ານອາດຈະສົງໃສວ່າສວນວາງສະແດງຊາພູເອີ ມັນແມ່ນແນວໃດ? ຫລື ອີ່ຫຍັງກັນແທ້ ເພາະຜ່ານມາພວກເຮົາຕ່າງກໍເຄີຍໄດ້ຍິນຄຳວ່າ ຫໍວາງສະແດງ, ສູນວາງສະແດງ, ຫ້ອງວາງສະແດງຕ່າງໆນາໆ ແຕ່ບໍ່ເຄີຍໄດ້ຍິນສວນວາງສະແດງ. ທຳອິດທີ່ຂ້າພະເຈົ້າໄດ້ຍິນນາຍແປພາສາຈີນ ບອກວ່າສວນວາງສະແດງຊາກໍເອະໃຈວ່າ ເພິ່ນເວົ້າຖືກສຳນຽງບໍ່ຄິດວ່າ ເພິ່ນອາດຈະອອກສຽງບໍ່ຖືກອາດຈະໝາຍເຖິງສູນວາງສະແດງຊາປະມານນັ້ນ ແຕ່ພໍໄດ້ເຫັນປ້າຍທີ່ເປັນພາສາຈີນ ຂ້າພະເຈົ້າກໍຍົກໂທລະສັບຖ່າຍສົ່ງເຂົ້າວີແຊັດແປ ມັນກໍປະກົດວ່າແມ່ນສວນວາງສະແດງຊາແທ້. ສວນວາງສະແດງຊາພູເອີຈີນ ຫລື ພາສາອັງກິດເອີ້ນວ່າ China Puer Tea Exhibition Garden ຫລື China Pu’er Tea Exposition Garden ເປັນສະຖານທີ່ທ່ອງທ່ຽວທີ່ຕັ້ງຢູ່ເທິງ ພູຢິງພັນ - Yingpan Mountain - ຫ່າງຈາກເມືອງຊິມາວ ຂອງນະຄອນພູເອີ, ແຂວງຢຸນນານພຽງ 29 ກິໂລ ແມັດ ແລະ ຢູ່ໃກ້ກັບປ່າສະຫງວນ ແຫ່ງຊາດພູເອີ. 

ສວນວາງສະແດງຊາພູເອີຈີນ ເປັນ ສະຖານທີ່ວາງສະແດງຊາຂະໜາດ ໃຫຍ່ ແລະ ເປັນບ່ອນຜະລິດ ຫລື ປູກຊາພູເອີ ຊາທີ່ມີຊື່ສຽງທີ່ສຸດຂອງ ແຂວງຢຸນນານ. ສະຖານທີ່ແຫ່ງນີ້ຂຶ້ນຊື່ລືນາມໃນການຜະລິດຊາ ຍ້ອນວ່າມີສະພາບອາກາດທີ່ເໝາະສົມ ແລະ ເອື້ອຍອຳນວຍຕໍ່ການປູກຊາ. ຢູ່ບ່ອນນີ້ຖ້າຜູ້ໃດໄດ້ເຂົ້າມາທ່ຽວຊົມ ຈະໄດ້ຮຽນຮູ້ເຖິງຕົ້ນກຳເນີດ, ວິວັດທະນາການ, ການປູກ, ການປຸງແຕ່ງ, ວິທີການດື່ມຊາຕາມແບບຕົ້ນສະບັບຂອງຄົນພື້ນເມືອງ ລວມໄປເຖິງການຫຸ້ມຫໍ່ຊາເພື່ອຈຳໜ່າຍເປັນສິນຄ້າເຊິ່ງຈຸດໃຈກາງ ຫລື ຈຸດເດັ່ນຂອງສວນວາງສະແດງແຫ່ງນີ້ມີເນື້ອທ່ີ ເກືອບ 2 ແສນຕາແມັດປະກອບດ້ວຍສະຖານທີ່ທ່ຽວຊົມຫລາຍຈຸດ ເປັນຕົ້ນແມ່ນຫໍພິພິທະພັນຊາພູເອີຈີນ ທີ່ມີຟອດຊິວຊາ ຫລື ຊາທີ່ກາຍເປັນຫິນ, ໝູ່ບ້ານຊົນເຜົ່າ, ໂຮງຜະລິດຊາ, ເຮືອນຊົນເຜົ່າປູລາງ ແລະ ຫໍຊົມທິວທັດ ເຊິ່ງມີຈຸດພິເສດຢູ່ບ່ອນວ່າເປັນຫໍຊົມທິວທັດທຳມະຊາດຂະໜາດສາມຊັ້ນ ແບບບູຮານ ແລະ ມີປະຕູສີ່ດ້ານ ແຕ່ລະດ້ານປິ່ນຫາສີ່ທິດ ຄືທິດຕາເວັນອອກ, ຕາເວັນຕົກ, ທິດເໜືອ ແລະ ທິດໃຕ້.

    ໃນບໍລິເວນເຂດເຮືອນ ປູລາງ ມີອານຸສາວະລີ ຂອງບັນພະບູລຸດເຜົ່າປູລາງທີ່ມີຊື່ວ່າ: ພາອ້າຍເລິງ ທີ່ເປັນຄົນທຳອິດທີ່ປູກຊາພູເອີເມື່ອ 1.800 ປີ ກ່ອນ ດ້ວຍເຫດນີ້ເປັນເວລາຜ່ານມາຫລາຍຮ້ອຍປີ ຄົນເຜົ່າປູລາງ ຈຶ່ງເຄົາລົບນັບຖືວ່າເປັນບັນພະບູລຸດຊາ ແລະ ບູຊາພາອ້າຍເລິງດັ່ງເທວະດາ ຂອງຊົນເຜົ່າຕົນ. ສຳລັບຄົນປູລາງແລ້ວ ຊາມີຄວາມສຳຄັນຫລາຍ ປຽບດັ່ງເລືອດທີ່ມີຄວາມສຳຄັນຕໍ່ຊີວິດ. ພວກເຂົາສາມາດຢູ່ໄດ້ໂດຍບໍ່ກິນເຂົ້າແຕ່ບໍ່ສາມາດຂາດຊາໄດ້ພຽງແຕ່ມ້ືດຽວ ແລະ ອີກສິ່ງໜຶ່ງທີ່ຂາດບໍ່ໄດ້ໃນການມາຢ້ຽມຢາມ ສວນວາງສະແດງ ຊາພູເອີຈີນ ກໍຄືເຮົາຈະຕ້ອງເຂົ້າຮ່ວມພິທີຕ້ອນຮັບຂອງໝູ່ບ້ານຊົນເຜົ່າ ຂອງຊົນເຜົ່າປູລາງ, ໄຕ, ລາຫູ, ວ້າ ແລະ ຮັນນີ້. ໂດຍໃນການດຳເນີນພິທີຕ້ອນຮັບຂອງຊົນເຜົ່າທ້ອງຖິ່ນ ຈະມີການອະນຸຍາດໃຫ້ນັກທ່ອງທ່ຽວໄດ້ສຳພັດກັບການສະແດງສິລະປະອັນເປັນເອກະລັກຂອງຊົນເຜົ່າພື້ນເມືອງ ດ້ວຍການຮ່ວມຮ້ອງເພງເຕັ້ນລຳທີ່ມີຊີວິດຊີວາຂອງເຂົາເຈົ້າຢູ່ກາງສວນຊາທ່ີ ຂຽວສະອຸ່ມ ແລະ ສາຍລົມເຢັນເທິງເຂດພູສູງ ແລະ ຮ່ວມຊິມຊາພູເອີປະເພດຕ່າງໆ ບໍ່ວ່າຈະເປັນຊາແດງ, ຊາຂາວ, ຊາຂຽວ ຕາມວິທີການດື່ມຊາ ແບບດັ່ງເດີມຂອງຊົນເຜົ່າທ້ອງຖິ່ນ. 

ຖ້າທ່ານໃດຫາກໄດ້ໄປນະຄອນ ພູເອີ ກໍຢ່າລືມຫາໂອກາດໄປທ່ຽວຊົມສວນວາງສະແດງຊາພູເອີຈີນ ເພື່ອຮຽນຮູ້ວັດທະນະທຳ ແລະ ວິຖີຊີວິດການເປັນຢູ່ຂອງຄົນຊົນເຜົ່າທ້ອງຖິ່ນ ທີ່ຕິດພັນກັບຊາມາແຕ່ດົນນານ. 

ໂດຍ: ແສງທອງ

KPL