KPL
ເພື່ອສືບຕໍ່ເສີມຂະຫຍາຍທາດແທ້ ແລະ ມູນເຊື້ອອັນສະຫງ່າອົງອາດຂອງຕົນນັ້ນ, ກອງທັບປະຊາຊົນລາວ ສືບຕໍ່ສູ້ຊົນປະຕິບັດບັນ ດາໜ້າທີ່ສຳຄັນທີ່ພັກ, ລັດ ແລະ ປະຊາຊົນມອບໝາຍໃຫ້ທັງໃນວຽກງານການເມືອງນຳພາແນວຄິດ, ດ້ານການທະຫານ ກໍ່ຄື ດ້ານພະລາທິ ການ ແລະ ອື່ນໆ.
*ເພື່ອສືບຕໍ່ເສີມຂະຫຍາຍທາດແທ້ ແລະ ມູນເຊື້ອອັນສະຫງ່າອົງອາດຂອງຕົນນັ້ນ, ກອງທັບປະຊາຊົນລາວ ສືບຕໍ່ສູ້ຊົນປະຕິບັດບັນດາໜ້າທີ່ສຳຄັນທີ່ພັກ, ລັດ ແລະ ປະຊາຊົນມອບໝາຍໃຫ້ທັງໃນວຽກງານການເມືອງນຳພາແນວຄິດ, ດ້ານການທະຫານ ກໍ່ຄື ດ້ານພະລາທິ ການ ແລະ ອື່ນໆ.
ດ້ານການເມືອງແນວຄິດ, ຕ້ອງສຶກສາອົບຮົມຖັນແຖວພະນັກງານ, ສະມາຊິກພັກ, ນັກຮົບທຸກຄົນຮັບປະກັນໃຫ້ມີຄວາມໜັກແໜ້ນທາງດ້ານການເມືອງແນວຄິດ, ມີຄວາມຈົງຮັກພັກດີຕໍ່ພັກ, ຕໍ່ປະເທດຊາດ, ຕໍ່ປະຊາຊົນ, ມີທັດສະນະຫລັກໝັ້ນຊົນຊັ້ນ, ຮູ້ຈຳແນກມິດ- ສັດຕູຢ່າງຈະແຈ້ງ, ຍົກສູງນ້ຳໃຈຮັກຊາດ, ຮັກລະບອບປະຊາທິປະໄຕປະຊາຊົນ, ມີມານະຈິດປະຕິວັດ, ທົນທານໝັ້ນໜຽວ, ກ້າເສຍສະລະເພື່ອຜົນປະໂຫຍດຂອງປະເທດຊາດ, ເດັດດ່ຽວຕ້ານ ແລະ ສະກັດກັ້ນທຸກກົນອຸບາຍຂອງສັດຕູ ແລະ ປະກົດການຫຍໍ້ທໍ້ໃຫ້ຫລຸດໜ້ອຍລົງ. ສູ້ຊົນປັບປຸງກໍ່ສ້າງພັກ, ໂດຍສົມທົບແໜ້ນທັງ 3 ດ້ານຄື: ດ້ານການເມືອງ-ແນວຄິດ, ການຈັດຕັ້ງ ແລະ ແບບແຜນວິທີນຳພາ, ບັນຫາໃຈກາງແມ່ນການສ້າງພັກປອດໃສ ເຂັ້ມແຂງ ໜັກແໜ້ນ, ໄປພ້ອມກັບການກ່ໍສ້າງກອງວັດທະນະທຳຕິດພັນກັບໜ້າທີ່ການເມືອງຂອງພັກ, ຂອງກອງທັບ ແລະ ຄວາມຮຽກຮ້ອງຕ້ອງການຂອງການຈັດຕັ້ງນຳພາ-ບັນຊາກອງທັບໃນໄລຍະໃໝ່. ສືບຕໍ່ບຳລຸງສ້າງພະນັກງານແຕ່ລະປະເພດ ໂດຍເລີ່ມຈາກຄວາມຮຽກຮ້ອງຕ້ອງການ, ໜ້າທີ່ການເມືອງຂອງພັກ, ຂອງກອງທັບ, ຮັບປະກັນລັກສະນະຊົນຊັ້ນຂອງພັກໂດຍຖືເອົາຄຸນທາດການເມືອງ, ຄຸນສົມບັດສິນທຳປະຕິວັດ-ຈັນຍາທຳເປັນກົກ, ຍົກລະດັບການສຶກສາ, ຄວາມສາມາດຈັດຕັ້ງປະຕິບັດແນວທາງນະໂຍບາຍຂອງພັກ ແລະ ສຸຂະພາບເປັນສຳຄັນ.
ດ້ານການທະຫານ, ສືບຕໍ່ປະຕິບັດແຜນຍຸດທະສາດການຫັນລົງກໍ່ສ້າງຮາກຖານການເມືອງພັດທະນາຊົນນະບົດຮອບດ້ານ, ຫັນເອົາກຳລັງສົມທົບກັບອຳນາດການປົກຄອງທ້ອງຖິ່ນ ໂດຍຕິດພັນກັບການກໍ່ສ້າງບ້ານ ແລະ ກຸ່ມບ້ານພັດທະນາໃນຂອບເຂດທົ່ວປະເທດ. ສູ້ຊົນປະຕິບັດຍຸດທະສາດສ້າງກິດຈະການປ້ອງກັນຊາດ ແລະ ລະບອບກຽມພ້ອມສູ້ຮົບຢ່າງເຂັ້ມງວດ; ສືບຕໍ່ຍົກລະດັບຄຸນນະພາບຂອງການຝຶກແອບຮໍ່າຮຽນສິລະປະຍຸດ, ຍຸດທະວິທີ ແລະ ວິຊາຊີບເຫລົ່າຮົບ, ເຕັກນິກໃຫ້ກອງທະຫານມີຄວາມຊຳນານໃນການສູ້ຮົບມີຄວາມສາມາດພຽງພໍໃນການຕອບຕ້ານສະພາບການທີ່ອາດຈະເກີດຂຶ້ນໃນທຸກລະດັບ, ໂດຍສຸມໃສ່ປັບປຸງຫລັກສູດສິດສອນຢູ່ບັນດາວິທະຍາຄານ, ໂຮງຮຽນໃຫ້ສອດຄ່ອງກັບສະພາບເງື່ອນໄຂໃໝ່.
ດ້ານພະລາທິການ, ສູ້ຊົນປະຕິບັດແຜນພັດທະນາເສດຖະກິດຂອງ ພັກ-ລັດ ແນໃສ່ຍົກລະດັບຊີວິດການເປັນຢູ່ຂອງພະນັກງານ, ນັກຮົບໃຫ້ມີອັນຫັນປ່ຽນຢ່າງຕັ້ງໜ້າ; ສືບຕ່ໍຍູ້ແຮງຂະບວນການຜະລິດເປັນສິນຄ້າ ໂດຍເລັ່ງໃສ່ຜະລິດອຸດສາຫະກຳ, ຫັດຖະກຳ ແລະ ປຸງແຕ່ງທີ່ເປັນພື້ນຖານເພື່ອສ້າງລາຍຮັບໃຫ້ກອງທັບ, ຄົ້ນຄວ້າຂຶ້ນແຜນເສດຖະກິດຕິດພັນກັບການປ້ອງກັນຊາດ ແລະ ກໍ່ສ້າງແນວຫລັງຍຸດທະສາດໃຫ້ເປັນຮູບເປັນຮ່າງເທື່ອລະກ້າວ. ເອົາໃຈໃສ່ຄຸ້ມຄອງຊັບສົມບັດ, ຄຸ້ມຄອງການຜະລິດ, ປະຕິບັດຫລັກການຄຸ້ມຄອງລາຍຮັບ-ລາຍຈ່າຍຕ່າງໆໃນກອງທັບໃຫ້ຮັດກຸມ, ຕ້ານ ແລະ ສະກັດກັ້ນປະກົດການຫຍໍ້ທໍ້ຕ່າງໆ.
ເພີ່ມທະວີການຊີ້ນຳ-ນຳພາໂດຍກົງ, ເດັດຂາດ ແລະ ຮອບດ້ານຂອງພັກຕໍ່ກອງທັບປະຊາຊົນລາວ, ສ້າງໃຫ້ກຳລັງປ້ອງກັນຊາດປອດໃສ, ເຂັ້ມແຂງໜັກແໜ້ນ ທາງດ້ານການເມືອງ, ແນວຄິດ, ການຈັດຕັ້ງ ແລະ ແບບແຜນນຳພາ, ເປັນກຳລັງທີ່ສັດຊື່ ແລະ ຈົງຮັກພັກດີຢ່າງເດັດຂາດຕໍ່ພັກ, ຕໍ່ປະເທດຊາດ, ເປັນກຳລັງຫລັກແຫລ່ງໃຫ້ແກ່ປວງຊົນລາວທັງຊາດ ໃນການປົກປັກຮັກສາເອກະລາດ, ອຳນາດອະທິປະໄຕ, ຜືນແຜ່ນດິນອັນຄົບຖ້ວນຂອງປະເທດຊາດ; ປົກປັກຮັກສາລະບອບປະຊາທິປະໄຕປະຊາຊົນ, ຮັກສາສະຖຽນລະພາບທາງດ້ານການເມືອງ ແລະ ຄວາມເປັນລະບຽບຮຽບຮ້ອຍທາງສັງຄົມ, ເຂົ້າຮ່ວມໃນການກໍ່ສ້າງຮາກຖານ ແລະ ປະກອບສ່ວນພັດທະນາເສດຖະກິດ-ສັງຄົມຂອງຊາດ ໃຫ້ຮັ່ງມີເຂັ້ມແຂງ.
KPL
