*ກອງທັບປະຊາຊົນລາວ ແມ່ນກອງທັບຂອງປະຊາຊົນທີ່ຕໍ່ສູ້ເພື່ອປົດປ່ອຍປະຊາຊົນ ອອກຈາກການກົດຂ່ີຂູດຮີດຂອງສັກດີນາ ແລະ ຕ່າງຊາດ, ຕໍ່ສູ້ເພືື່ອນຳເອົາເອກະລາດອຳນາດອະທິປະໄຕ ມາໃຫ້ແກ່ປະຊາຊົນພາຍໃຕ້ການນຳພາ-ຊີ້ນຳຂອງພັກປະຊາຊົນປະ ຕິວັດລາວ ໂດຍແມ່ນພັກເປັນຜູ້ສ້າງຕັ້ງ, ສຶກສາອົບຮົມ ແລະ ຝຶກຝົນຫລໍ່ຫລອມ, ແມ່ນກອງທັບປະຊາຊົນ, ເກີດຈາກປະຊາຊົນ, ສູ້ຮົບເພື່ອຜົນປະໂຫຍດຂອງປະຊາຊົນຜູ້ອອກແຮງງານລາວບັນດາເຜົ່າ, ແມ່ນພາຫະນະອັນແຫລມຄົມຂອງພັກ, ຂອງຊົນຊັ້ນກຳມະກອນລາວ. ດັ່ງນັ້ນ, ທາດແທ້ຂອງກອງທັບປະຊາຊົນລາວ ຈຶ່ງແມ່ນທາດແທ້ປະຕິວັດ, ມີທາດແທ້ຊົນຊັ້ນກຳມະກອນຢ່າງແທ້ຈິງ, ມີຄວາມສັດຊື່ບໍລິສຸດຈົງຮັກພັກດີຕໍ່ປະເທດຊາດ ແລະ ມີລະບຽບແບບແຜນທີ່ເຂັ້ມງວດ.

     ກອງທັບປະຊາຊົນລາວມີມູນ ເຊື້ອອັນສະຫງ່າອົງອາດ, ສະແດງອອກມີຄວາມຈົງຮັກພັກດີຕໍ່ພັກ, ຕໍ່ຊາດ, ຕໍ່ປະຊາຊົນ ແລະ ຕໍ່ອຸດົມການສັງຄົມນິຍົມ. ມູນເຊື້ອດັ່ງກ່າວນີ້ ໄດ້ສະແດງອອກແຈ້ງໃນພຶດຕິກຳຕົວຈິງແຫ່ງການຕໍ່ສູ້ກູ້ຊາດອັນຍືດເຍື້ອຍາວນານ ຊຶ່ງໄດ້ຢັ້ງຢືນຢ່າງ ຈະແຈ້ງແລ້ວວ່າກອງທັບປະຊາຊົນລາວ ແມ່ນມາຈາກປະຊາຊົນ, ໂດຍປະຊາຊົນ, ເພື່ອປະຊາຊົນພາຍໃຕ້ ການນຳພາ ແລະ ໄດ້ຮັບການຝຶກຝົນຫລໍ່ຫລອມຈາກພັກຍາມໃດກ່ໍມີຄວາມຈົງຮັກພັກດີ, ມີຄວາມບໍລິສຸດຜຸດຜ່ອງ, ເດັດດ່ຽວໜຽວແໜ້ນ, ມີລະບຽບແບບແຜນທີ່ເຂັ້ມງວດ, ມີຄວາມອົງອາດກ້າຫານ, ມີນ້ຳໃຈເສຍສະລະອັນສູງສົ່ງພ້ອມຈະເສຍສະລະເພ່ືອຊາດ, ເພື່ອປະຊາຊົນ. ສິ່ງເຫລົ່ານັ້ນມັນໄດ້ກາຍເປັນມູນເຊື້ອອັນສະຫງ່າງາມຂອງກອງທັບ ແລະ ກຳລັງປະກອບອາວຸດປະຊາຊົນເຮົາຕະຫລອດມາ.

    ກອງທັບເຮົາໄດ້ສືບທອດມູນ ເຊື້ອພິລະອາດຫານຂອງວິລະບຸລຸດຂອງຊາດ ອັນເປັນການສະແດງອອກເຖິງທາດແທ້ຂອງກອງທັບ. ກອງທັບເຮົານັບແຕ່ມື້ກໍ່ຕັ້ງມາເຊິ່ງມີກຳລັງບໍ່ເທົ່າໃດຄົນ, ປະກອບອາວຸດປະຖົມປະຖານ, ແຕ່ພາຍໃຕ້ການນຳພາອັນສະຫລາດສ່ອງໃສຂອງພັກ, ກອງທັບເຮົານັບມື້ໄດ້ຮັບການປັບປຸງກ່ໍສ້າງເຕີບໃຫຍ່ຂະຫຍາຍຕົວດ້ານປະລິມານ ແລະ ຄຸນນະພາບຢ່າງບໍ່ຢຸດຢັ້ງ, ມີຄວາມອົງອາດກ້າຫານບໍ່ຫວັ່ນໄຫວຄອນແຄນຕໍ່ຄວາມຫຍຸ້ງຍາກ ແລະ ອຸປະສັກຕ່າງໆ, ຍິ່ງສູ້ຮົບຍິ່ງເຕີບໃຫຍ່ເຂັ້ມແຂງຜ່ານພຶດຕິກຳແຫ່ງການຕໍ່ສູ້ກູ້ຊາດຍືດເຍື້ອຍາວນານໄດ້ເກີດມີນັກຮົບທີ່ດີເດັ່ນ, ນັກຮົບແຂ່ງຂັນ ແລະ ນັກຮົບວິລະຊົນນັບທັງກຳລັງຫລວງ, ທະຫານທ້ອງຖິ່ນ, ກອງຫລອນຊຶ່ງມີກຳລັງເພດຍິງ ແລະ ເພດຊາຍຢ່າງຫລວງຫລາຍ.

   ກອງທັບປະຊາຊົນລາວ ມີມູນເຊື້ອນ້ຳໃຈດຸໝັ່ນຂະຫຍັນພຽນໃນການອອກແຮງງານເພີ່ມພູນຜະລິດຜົນ ແລະ ປະຢັດສັດທ່ຽງ; ຍາມໃດກໍ່ມີຄວາມສາມັກຄີອັນແໜ້ນແຟ້ນກັບປະຊາຊົນບັນດາເຜົ່າ, ສາມັກຄີກັບກອງທັບປະເທດສັງຄົມນິຍົມອ້າຍນ້ອງ ແລະ ບັນດາປະເທດເພື່ອນມິດທີ່ກ້າວໜ້າໃນໂລກ, ໂດຍສະເພາະແມ່ນສາມັກຄີສຳພັນສູ້ຮົບແບບພິເສດກັບກອງທັບປະຊາຊົນ ຫວຽດນາມອ້າຍນ້ອງ; ເວລາໃດກໍ່ຮັກສາໄດ້ມູນເຊື້ອອັນດີງາມ, ມີປະຊາທິປະໄຕ, ມີລະບຽບວິໄນ.

KPL