*ພວກເຮົາເຄີຍໄດ້ຍິນຄຸ້ນຫູກັນມາວ່າ “ຢູ່ບ່ອນໃດມີສຽງແຄນ, ຜູ້ໃດຢູ່ເຮືອນຮ້ານ, ກິນເຂົ້າໜຽວ, ນັ້ນແມ່ນຄົນລາວ”, ເຂົ້າໜຽວກັບລາບໄດ້ກາຍເປັນສ່ວນໜຶ່ງທ່ີສໍາຄັນໃນຊີວິດປະຈໍາວັນ ຂອງປະຊາຊົນລາວບັນດາເຜົ່າ ເຊິ່ງບັນພະບູລຸດເຮົາໄດ້ມອບໃຫ້ເປັນມໍລະດົກ ແລະ ສືບທອດກັນມາຍາວນານຕິດພັນກັບຮີດ 12 ຄອງ 14 ຮີດຍີ່ຄອງຈຽງ ຖ້າຍ້ອນເວລາຄືນຫລັງການປະພຶດປະຕິບັດບຸນປະເພນີ, ງານແຕ່ງດອງ ແລະ ງານຕ່າງໆບໍ່ເຄີຍປະຖິ້ມ ແລະ ມັກຈະພົບເຫັນອາຫານຍອດນິຍົມເອີ້ນວ່າ “ ເຂົ້າໜຽວກັບລາບຊີ້ນ” ຢູ່ເທິງໂຕະ, ພາເຂ້ົາ ແລະ ການສັງສັນທ່ີເຕັມໄປດ້ວຍມິດຕະພາບໄມຕີຈິດ ແລະ ຄວາມອົບອຸ່ນແບບເອກະລັກຂອງລາວເຮົາ. ຫລາຍຊຸມປີຜ່ານມາ, ບໍ່ວ່າຈະເປັນລາບປາ, ລາບຊີ້ນງົວ, ລາບເປັດ, ລາບໄກ່ງວງ, ລາບກຸ້ງ ແລະ ອື່ນໆບໍ່ແມ່ນໄດ້ຮັບຄວາມນິຍົມພຽງມື້ນີ້ມື້ວານແຕ່ຫາກໄດ້ຮັບຄວາມນິຍົມແຕ່ບູຮານນາການ ແລະ ສືບຕໍ່ເພີ່ມຂຶ້ນຢ່າງກວ້າງຂວາງຈາກແຂກພາຍໃນ ແລະ ຕ່າງປະເທດໃນພາກພື້ນອາຊຽນ-ສາກົນ ໂດຍທົ່ວໄປເພີ່ນມັກຈະບັນຈຸເຂ້ົາໃນລາຍການອາຫານທ່ີແຊບຊ້ອຍ ແລະ ເປັນໃບໜ້າໃບຕາຂອງຊາດລາວໃນການກະກຽມພາເຂ້ົາສາມັກຄີຕ້ອນຮັບກອງປະຊຸມລະດັບຊາດ, ກອງປະຊຸມສາກົນ ແລະ ງານເຊື່ອມສໍາພັນມິດຕະພາບນັ້ນເອງ.   ຍ້ອນແນວນັ້ນບັນດາທຸລະກິດຮ້ານອາຫານຈຶ່ງຄ່ອຍໆເຕີບໃຫຍຂະຫຍາຍຕົວໄປຕາມຈັງຫວະເສດຖະກິດ ແລະ ຄວາມຕ້ອງການຂອງສັງຄົມຫລາຍຂຶ້ນຄືກັບເງົາຕາມໂຕເຮົາເອງ ເຊິ່ງແຕ່ລະຮ້ານກໍມີສູດເດັດໆສູດແຊບໆເປັນເອກະລັກ ຂອງໃຜມັນເພື່ອປັບໃຫ້ເຂົ້າກັບຍຸກກັບສະໄໝໃໝ່ດັ່ງຕົວຢ່າງຮ້ານພູມ ຊັບຂຶ້ນຊື່: ຮ້ານອາຫານພື້ນເມືອງເປັນເອກະລັກລາວແທ້ໆທີ່ມີຊື່ສຽງໂດ່ງດັງ ແລະ ໄດ້ຮັບຄວາມນິຍົມເປັນອັນດັບຕົ້ນໆໃນລາວກໍວ່າໄດ້. ໂດຍສ່ວນໃຫຍ່ລາຍການອາຫານຂອງຮ້ານອາຫານພູມຊັບຈະເນັ້ນພວກກ້ອຍ-ລາບ, ຕົ້ມແກງ, ມົກອ່ອມພາຍໃຕ້ປັດສະຍາຊີວິດ “ຢາກຮັກສາອາຫານພື້ນບ້ານລາວ ແບບດັ້ງເດີມໄວ້, ຕ້ອງການໃຫ້ລູກຄ້າໄດ້ກິນອາຫານແຊບ, ມີຮອຍຍິ້ມເພິ່ງພໍໃຈ, ມີຄວາມອົບອຸ່ນດີ, ລາຄາບໍ່ແພງເຂົ້າເຖິງໄດ້ທຸກຊັ້ນຄົນ, ວັດຖຸດິບສົດຄຸນນະພາບມາກ່ອນ, ສະອາດປອດໄພ ແລະ ການບໍລິການໃນຮ້ານ-ສົ່ງນອກຮ້ານຕ້ອງດີ”.

     ທ່ານ ນາງ ມະໂນລົມ ເຂັມສຸລິຍະຈັກ (ManolomK hemso uliyachak), ບໍ່ແມ່ນຄົນອື່ນຄົນໄກ ເພີ່ນເປັນລູກຮັກຫລານແພງຂອງນັກຮົບປະຕິວັດ ທັງເປັນເຈົ້າຂອງຮ້ານອາຫານພູມຊັບເລົ່າສູ່ຜູ້ຂຽນຟັງດ້ວຍຮອຍຍິ້ມເຕັມປ່ຽມທັດສະນະຕິ ແລະ ວິໄສທັດບອກວ່າ: ຮ້ານອາຫານພູມຊັບສ້າງຕັ້ງຂຶ້ນເກືອບ 5 ປີແລ້ວນັບແຕ່ປີ 2019, ຕອນນັ້ນຮ້ານຂອງພວກຍັງຕັ້ງຢູ່ໜ້າທາງ  ແລະ ຕໍ່ມາໄດ້ຍ້າຍເຂົ້າມາຮ່ອມເບື້ອງໃນບ້ານ (ບ້ານຮ່ອງ ໄກ່ແກ້ວ) ແຕ່ບັງເອີນພໍດີພະຍາດໂຄວິດ 19  ແພ່ລະບາດ ແລະ ກໍໄດ້ປິດ, ແລ້ວມາເປີດທົດລອງຂາຍອອນລາຍ ໂດຍມີລົດຂົນສົ່ງໄປໃຫ້ລູກຄ້າ ແລະ ຈໍານວນໜຶ່ງມາເອົາເອງເຊັ່ນ: ຢູ່ຕາມບ້ານເຮືອນນັກກິລາ, ໂຮງໝໍ, ໂຮງຮຽນທິດສະດີ ແລະ ລູກຄ້າທົ່ວໄປ ເຊິ່ງເຫັນວ່າມັນຕອບໂຈດໄດ້ດີຫລາຍ, ເລີຍຄິດຢາກຍ້າຍຮ້ານມາເຮັດຢູ່ໃນເຮືອນ ເພາະເປັນເຮືອນຂອງເຮົາເອງຊື່: ຮ້ານທະນັດດາເຊ່ົາຊຸດໄໝອອກງານ ເຊີ່ງມີລູກຄ້າມາໃຊ້ບໍລິການກໍຫລາຍຢູ່ແລ້ວ, ຍ້ອນແນວນັ້ນເລີຍຕັດສິນໃຈເຮັດທຸລະກິດຮ້ານອາຫານ ເພື່ອໃຫ້ລູກຄ້າທີ່ມາໃຊ້ບໍລິການຮ້ານຜ້າໄໝ ຫລື ຮ້ານອາຫານອາດເປັນລູກຄ້າຄົນດຽວກັນ.

    ໄດ້ແຮງບັນດານຈາກໃສ່ຈິງ ຕັດສິນໃຈມາເຮັດຮ້ານອາຫານ? ຕອບ: ອີງໃສ່ສະພາບເສດຖະກິດຄອບຄົວຜົວ-ເມຍ ເປັນພະນັກງານທັງສອງ, ລາຍຮັບກໍ່ອາໃສຈາກເງິນເດືອນ ແລະ ມີລູກ 2 ຄົນ ກຳລັງຮຽນ, ເຊິ່ງຄ່າໃຊ້ຈ່າຍກໍຖືວ່າຫລາຍ ແລະ ບາງຄັ້ງເຮັດໃຫ້ບໍ່ພຽງພໍໃນການບໍລິຫານຄອບຄົວ, ເລີຍຄິດວ່າເປັນເວລາອັນເໝາະສົມ ແລ້ວບວກກັບແນວທາງນະໂຍບາຍຂອງພັກ-ລັດອັນຖືກຕ້ອງໃນການສົ່ງເສີມເສດຖະກິດຄອບຄົວ ແລະ ກ້າວຫາໄປເພິ່ງຕົນເອງກຸ້ມຕົນເທື່ອລະກ້າວຄືການປະກອບສ່ວນໜ້າທີ່ສໍາຄັນ ໃນການພັດທະນາເສດຖະກິດ-ສັງຄົມ, ສ້າງວຽກເຮັດງານທໍາ ແລະ ແກ້ໄຂຄວາມທຸກຍາກຢ່າງຮອບດ້ານ, ຈຶ່ງໄດ້ຕັດສິນໃຈເປີດຮ້ານອາຫານ ເຊິ່ງເປັນສິ່ງທີ່ຕົນເອງມັກໃນການປຸງແຕ່ງອາຫານໃຫ້ພໍ່ແມ່ ແລະ ຄອບຄົວຢູ່ແລ້ວ, ພ້ອມນັ້ນກໍ່ເພື່ອສືບສານເຈດຕະນາລົມມູນເຊື້ອອັນດີງາມຂອງບັນພະບູລຸດເຮົາ.

    ຈຸດເດັ່ນຂອງອາຫານຮ້ານຂອງແມ່ນຫຍັງ? ຕອບ: ຈຸດເດັ່ນຂອງອາຫານກໍ່ຈະມີລາບຊີ້ນເພ້ຍສົດ, ຈຸ່ມເພ້ຍ, ແຈ່ວເພ້ຍຂົມໆ ເຊິ່ງວັດຖຸດິບທັງໝົດນັ້ນພວກເຮົາສັ່ງໂດຍກົງຈາກໂຮງງານຂ້າສັດມາສົ່ງ). ພ້ອມດຽວກັນນັ້ນ, ສະເພາະລາບຊ້ີນແທ້ໆກວມລວມຫລາຍລາຍການອາຫານທີ່ຄອຍບໍລິການຄື: ລາກຸ້ງແຫລວ, ລາບປາຕອງ, ລາບໄກ່ງວງ, ລາບເປັດ ແລະ ອື່ນໆ ເຊິ່ງອາຫານທັງໝົດພວກເຮົາຈະເນັ້ນລົດຊາດແຊບເປັນເອກະລັກພື້ນເມືອງ, ວັດຖຸດິບມີຄວາມສົດໃໝ່ມື້ຕໍ່ມື້, ສະອາດໄດ້ສຸຂະອະນາໄມ ແລະ ເພື່ອຮັບປະກັນໃຫ້ລູກຄ້າໄດ້ຮັບປະທານອາຫານມີຄວາມປະທັບໃຈ ແລະ ຄິດຢາກກັບມາອີກ. ພິເສດລາຄາອາຫານໃນຮ້ານຂອງພວກເຮົາຈະເນັ້ນລາຄາບໍ່ແພງໃຫ້ລູກຄ້າທຸກຊັ້ນຄົນເຂົ້າເຖິງໄດ້ເຊັ່ນ: ລາບຊີ້ນມີລາຄາພຽງປະມານ 60 ພັນກີບ ຕໍ່ຊຸດສາມາດກິນອິ່ມໄດ້ 3 ຄົນ. ລູກຄ້າ ແລະ ແຂກເຂົ້າມາຮ້ານເຮົາສ່ວນໃຫຍ່ແມ່ນຄົນກຸ່ມໃດ? ຕອບ: ຕົ້ນຕໍແມ່ນຈະເປັນພະນັກງານລັດ, ບັນດາກະຊວງ, ອົງການຕ່າງໆ, ບໍລິສັດເອກະຊົນຕ່າງໆ ແລະ ປະຊາຊົນທົ່ວໄປກໍມີມາຫລາຍ ແລະ ບາງຄັ້ງກໍມີກຸ່ມລູກຄ້າກໍ່ບອກຕໍ່ກັນເຊັ່ນຕົວຢ່າງ ມື້ພັກວັນເສົາເພີ່ນຈະພາຄອບຄົວມາກິນເຂົ້າ ແລະ ຍັງມີລູກຄ້າຄົນລາວໄປຢູ່ຕ່າງປະເທດ ແລະ ປະເທດເພື່ອນບ້ານທົວໄທ ກໍມາເປັນໄລຍະນີ້, ນອກຈາກມາຮັບປະທານໃນຮ້ານແລ້ວພວກເຮົາຍິນດີໃຫ້ບໍລິການສົ່ງລູກຄ້າເຖິ່ງທີ່ຜ່ານການສັ່ງທາງອີ່ເກັດ ຫລື ມີຂົນສົ່ງໄດ້. ສາເຫດທີ່ລູກຄ້ານິຍົມ ແລະ ຕິດໃຈຮ້ານອາຫານເຮົາແມ່ນ? ຕອບ: ທຸກລາຍການອາຫານໃນຮ້ານຂອງພວກເຮົາເນັ້ນຄວາມສົດໃໝ່ໃຫ້ລູກຄ້າໄດ້ກິນສົດໆແຊບໆ, ເຮັດຕາມໃຈທີ່ລູກຄ້າສັ່ງ, ບາງຄົນມັກຂົມ, ເຜັດຕາມໃຈລູກຄ້າ, ບັນຍາກາດຮ້ານໂລ່ງດີ, ມີບ່ອນຈອດລົດ, ມີຫ້ອງແອເຢັນໄວ້ຄອຍບໍລິການແຂກທຸກລະດັບ.

    ທ່ານໃດໄປບໍ່ຮອດຈອດບໍ່ເຖິງ ທີ່ນີ້ພວກເຮົາແນະນໍາລາຍລະອຽດລຸ່ມນີ້: ຮ້ານພູມຊັບ ໄດ້ເປີດຮ້ານວັນຈັນ-ວັນອາທິດ, ລູກຄ້າສາມາດມາກິນເຂົ້າສວຍຢູ່ຮ້ານ ຫລື ໂທສັ່ງກັບບ້ານໄດ້.  ບັນຍາກາດຮ້ານດີບ່ອນຈອດລົດສະດວກ ຮ້ານພູມຊັບລາບແຊບ & ຈຸ່ມເພ້ຍ ສະຖານທີ່: ບ້ານຮ່ອງໄກ່ແກ້ວ, ຮ່ອມ12 ເຂົ້າຮ່ອມມາປະມານ 20 ແມັດ (ມີປ້າຍໜ້າຮ່ອມ) ສາມາດຈອດລົດຢູ່ແຄມທາງໃຫຍ່ ຫລື ເຂົ້າໄປຈອດດ້ານໃນໄດ້ກໍ່ໄດ້, ແຜນທີ່: https ://maps.google.com/ ?q=17. 986942,102. 626007  ຮ້ານເປີດ:ວັນຈັນ-ອາທິດເວລາ: 08:00-15:00 ໂມງ ສາມາດສັ່ງກັບບ້ານໄດ້ມີບໍລິການຈັດສົ່ງ ໂທ ຫລື ວ໋ອດແອັບໄດ້ທີເບີ 020 55669911-56966989.

KPL