ຂປລ. ເທສະການອາຫານລາວ 2025 ຈະຈັດຂຶ້ນໃນລະຫວ່າງວັນທີ 22-26 ມັງກອນ 2025 ທີ່ຈະມາເຖິງນີ້, ຢູ່ສວນເຈົ້າອານຸວົງ (ແຄມຂອງ) ນະຄອນຫລວງວຽງຈັນ ໂດຍຈະຈັດງານແບບເປີດກວ້າງ, ອະນຸຍາດ ໃຫ້ມີອາຫານລາວແບບພື້ນບ້ານ, ອາຫານລາວປະຍຸກ ແລະ ອາຫານນາໆຊາດ ມາວາງຂາຍ ເຖິງ 180 ຮ້ານ. ໃນນັ້ນ, ອາຫານເອກກະລັກຈາກແຂວງຕ່າງໆ ແລະ ຈາກຜູ້ສະໜັບສະໜູນງານລວມ 160 ຮ້ານ, ຮ້ານຂາຍເຄື່ອງຫັດຖະກໍາ ແລະ ກະສິກໍາ 20 ຮ້ານ.

ທ່ານ ນາງ ຈັນທະຈອນ ວົງໄຊ ປະທານສະມາຄົມນັກທຸລະກິດແມ່ຍິງ, ທັງເປັນປະທານຄະນະກຳມະການຈັດເທສະການອາຫານລາວ 2025 ​ໄດ້ໃຫ້ຮູ້ໃນພິທີຖະແຫລງຂ່າວ ກ່ຽວກັບການຈັດງານ ດັ່ງກ່າວ ໃນວັນທີ 6 ມັງກອນ 2025 ນີ້ວ່າ: ການຈັດເທສະການອາຫານລາວ ໃນຄັ້ງນີ້, ເພື່ອຄໍານັບຮັບຕ້ອນ ວັນຄົບຮອບ 20 ປີ ຂອງການຈັດເທສະການອາຫານລາວ ຂອງສະມາຄົມນັກທຸລະກິດແມ່ຍິງລາວ ແລະ ສ້າງຂະບວນການ ເພື່ອຄໍານັບຮັບຕ້ອນກອງປະຊຸມໃຫຍ່ຄັ້ງທີ IV ຂອງສະມາຄົມນັກທຸລະ ກິດແມ່ຍິງໃນປີ 2025 ເພື່ອສືບຕໍ່ອະນຸລັກ ວັດທະນະທໍາດ້ານອາຫານລາວ ໃຫ້ຄົງຢູ່ຄູ່ກັບກັບສັງຄົມລາວ ແລະ ສາມາດຂາຍຜ່ານລະບົບອອນລາຍ ໃນຍຸກດີຈິຕອນໄດ້ ເພື່ອສ້າງລາຍຮັບຂອງຜູ້ປະກອບການແມ່ຍິງລາວ ກ່ຽວກັບອາຫານໃຫ້ເປັນປົກກະຕິ ເພື່ອເສີມຂະຫຍາຍຄວາມສາມັກຄີ, ສ້າງຄວາມເຂັ້ມແຂງ ໃຫ້ສະມາຊິກພາຍໃນ ສະມາຄົມນັກທຸລະກິດຍິງດ້ວຍກັນ ແລະ ຜູ້ປະກອບການແມ່ ຍິງທາງດ້ານອາຫານ ໃນທົ່ວປະເທດ ແລະ ໃນຕ່າງປະເທດ,  ສາມາດສ້າງເປັນຍີ່ຫໍ້ (BRAND) ອາຫານເອກະລັກແບບລາວໆ ຈໍາໜ່າຍອອກສູ່ສາກົນ ແລະ ໃຫ້ເປັນທີ່ຮູ້ຈັກ, ແຜ່ຫລາຍທັງພາຍໃນ ແລະ ຕ່າງປະເທດ, ທັງເປັນການໂຄສະນາ, ສົ່ງເສີມທຸລະກິດອາຫານລາວ ໃຫ້ເປັນທີ່ຍອມຮັບວ່າ ການບໍລິໂພກອາຫານລາວແມ່ນສະອາດ ແລະ ປອດໄພ.

ເທສະການອາຫານລາວ ຄັ້ງທີ 20 ໃນປີ 2025 ນີ້, ຈັດຂຶ້ນ ພາຍໃຕ້ຄໍາຂວັນ: “20 ປີ ເທສະການອາຫານລາວມີໄຊ ສືບຕໍ່ກ້າວໄປສູ່ສາກົນ” ເຊິ່ງເທສະການອາຫານ ເປັນຕະຫລາດນັດ ຂະໜາດໃຫຍ່ລະດັບຊາດ ເພື່ອໃຫ້ຜູ້ປະກອບການແມ່ຍິງ ແລະ ຄອບຄົວ ໄດ້ຈໍາໜ່າຍພືດຜັກ, ຜົນຜະລິດກະສິກໍາ, ຫັດຖະກໍາ ແລະ ໂຄສະນາຍີ່ຫໍ້ສິນຄ້າທີ່ຜະລິດຢູ່ລາວ ຂອງຫົວໜ່ວຍທຸລະກິດ ທີ່ຜູ້ບໍລິໂພກສາມາດຈັບຈ່າຍຊື້ຂາຍ ດ້ວຍຄວາມໝັ້ນໃຈ ແລະ ປອດໄພ.                                                                                                                                                                                                                                                                                                                                                                                                                                                ຂ່າວ: ທະນູທອງ

ຂໍ້ມູນ-ພາບ: ວິທະຍຸແຫ່ງຊາດ

KPL