ຂປລ. ຕອນ​ແລງວັນທີ 6 ມັງກ​ອນ 2025 ຢູ່ຫໍປະຊຸມແຫ່ງຊາດ, ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ໃຫ້ກຽດເຂົ້າຮ່ວມເປັນສັກຂີພິຍານ ​ໃນພິທີມອບ-ຮັບເງິນ ຈາກບັນດາຫົວໜ່ວຍ​ທຸ​ລະ​ກິດ ຈຳນວນ 21 ພາກສ່ວນ, ລວມມູນຄ່າທັງໝົດ 55 ຕື້ກີບ ເພື່ອປະກອບສ່ວນເຂົ້າໃນ ການສ້າງກອງທຶນຜະລິດສິນຄ້າຂອງ ສປປ ລາວ,​ ມີ ທ່ານ ບົວຄົງ ນາມມະວົງລັດຖະມົນຕີ, ຫົວໜ້າຫ້ອງວ່າການ ສໍານັກງານນາຍົກລັດຖະມົນຕີ, ທ່ານ ວິໄລວົງ ບຸດດາຄໍາ ລັດຖະມົນຕີກະຊວງພາຍໃນ, ທ່ານ ສັນຕິພາບ ພົມວິຫານ ລັດຖະມົນຕີ ກະຊວງການເງິນ, ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກຳ ແລະການຄ້າ, ທ່ານ ລິນຄຳ ດວງສະຫວັນ ລັດຖະມົນຕີ ກະຊວງກະສິກຳ ແລະ ປ່າໄມ້,

 


ບັນດາຮອງລັດຖະມົນຕີ, ປະທານສະພາບໍລິຫານ, ຜູ້ອໍານວຍການ ແລະ ຜູ້ຕາງໜ້າຈາກບັນດາຫົວໜ່ວຍທຸລະກິດ ແລະ ພາກສ່ວນກ່ຽວຂ້ອງ ເຂົ້າຮ່ວມ. ພາກສ່ວນທີ່ນຳເງິນມາມອບໃນຄັ້ງນີ້ ປະກອບມີ​: ບໍລິສັດ ST Bank ຈໍານວນ 6 ຕື້​ກີບ,  ບໍລິສັດ PT Sole, ບໍລິສັດ ພົງ​ຊັບ​ທະວີ ຈຳກັດ, ທະນາຄານ​ພັດທະນາ​ລາວ (LDB), ທະນາຄານ​ຮ່ວມ​ພັດທະນາ (JDB), ບໍລິສັດ ປີ​ໂຕຣລ້ຽມ​ເທຣດດິ້ງລາວມະຫາຊົນ, ບໍລິສັດ ລາ​ວກຣີນ​ດີ​ເວີ​ລົບ​ເມັ້ນ ຈຳກັດ, ບໍລິສັດ AIF ​ແລະ AIDC ​ແລະ ບໍລິສັດ ຊີ​ເຄ ກຣຸບ ພາກສ່ວນ​ລະ 5 ຕື້ກີບ, ບໍລິສັດ ສີສະ​ເກດ ກໍ່ສ້າງ​ຄົບ​ວົງ​ຈອນ ຈຳກັດ​ຜູ້​ດຽວ 2 ຕື້ກີບ, ບໍລິສັດ​ໂຊກ​ໄຊ, ບໍລິສັດ​ລາດ​ຊະ​ວົງ ພັດທະນາ, ບໍລິສັດ ​ໄຊ​ສົມບູນ ຈະ​ເລີ​ນຊັບ, ບໍລິສັດ ຄູນ​ຄຳ ຈຳກັດ ​ແລະ ບໍລິສັດ​ບົວ​ທິບ ພາກສ່ວນ​ລະ 1 ຕື້ກີບ, ກຸ່ມ​ບໍລິສັດ ດວງ​ຈະ​ເລີນ, ກຸ່ມ​ບໍລິສັດ ນິກສັນ ພັດທະນາບໍ່ແຮ່ ຈຳກັດ ​ແລະ ກຸ່ມ​ບໍລິສັດ ພູສີກໍ່ສ້າງກຣຸບ ພາກ​ສ່ວນ​ລະ 500 ລ້ານ​ກີບ, ບໍລິສັດ​ພັນທະ​ມິດ ​ແລະ ບໍລິສັດ HKS ພາກສ່ວນ​ລະ 200 ລ້ານ​ກີບ ​ແລະ ບໍລິສັດ3S ຈໍານວນ 100 ລ້ານ​ກີບ.

ໂອກາດນີ້, ທ່ານ ນາຍົກລັດຖະມົນຕີ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ບັນດາຫົວໜ່ວຍ​ທຸລະ​ກິດ ທີ່ໄດ້ສະແດງເຈດຈໍານົງ ແລະ ມີຈິດໃຈຢາກພັດທະນາ ດ້ວຍນໍ້າໃຈຮັກຊາດ, ຮັກບ້ານເກີດເມືອງນອນ ແລະ ຢາກເຫັນປະເທດຊາດຂອງຕົນ ໄດ້ຮັບການພັດທະນາຢ່າງແທ້ຈິງ, ຈຶ່ງໄດ້ລະດົມກັນປະກອບສ່ວນທຶນ ເຂົ້າໃນກອງທຶນຜະລິດສິນຄ້າ ໃນຄັ້ງນີ້. ພ້ອມ​ນີ້, ທ່ານ​ຍັງໄດ້ແຈ້ງໃຫ້ຊາບ ກ່ຽວກັບຈຸດປະສົງ​ ແລະ ເຫດຜົນໃນ​ການ​ສ້າງ​ຕັ້ງ​ກອງ​ທຶນ​ດັ່ງກ່າວ, ​ລວມທັງ ທ່າແຮງ ແລະ ຂໍ້ຈຳກັດ ທາງດ້ານແຫລ່ງທຶນ ໃນການຊຸກຍູ້ສົ່ງເສີມບັນດາ ວິສາຫະກິດໃຫ້ມີຄວາມເຂັ້ມແຂງ ແລະ ຍືນຍົງ ໂດຍສະເພາະ ການຊຸກຍູ້ການດໍາເນີນທຸລະກິດ, ການບໍລິການ, ການຜະລິດສິນຄ້າພາຍໃນ ທີ່ເປັນຍີ່ຫໍ້ (Brand) ຂອງຄົນລາວ ໃຫ້ໄດ້ທັງປະລິມານ ແລະ ຄຸນນະພາບ ເພື່ອໃຫ້ສາມາດສົ່ງອອກຕ່າງປະເທດ. ທັງນີ້, ກໍເພື່ອເປັນການຈັດຕັ້ງຜັນຂະຫຍາຍມະຕິ ວ່າດ້ວຍການສ້າງເສດຖະກິດເອກະລາດ ເປັນເຈົ້າຕົນເອງໃນໄລຍະໃໝ່ ເທື່ອລະກ້າວ ​ໂດຍ​ທ່ານໄດ້ຢືນຢັນວ່າ ຈະນຳໃຊ້ເງິນທີ່ໄດ້ຮັບການປະກອບສ່ວນ ໃຫ້ເປັນປະໂຫຍດສູງສຸດ ແລະ ເປັນໄປຕາມຈຸດປະສົງທີ່ວາງໄວ້ ເພື່ອໃຫ້ກອງທຶນດັ່ງກ່າວ ນັບມື້ນັບເຕີບໃຫຍ່ຂຶ້ນເລື້ອຍໆ. ສຳລັບການຄຸ້ມຄອງ ແລະ ນຳໃຊ້ທຶນດັ່ງກ່າວ, ລັດຖະບານໄດ້ມອບໃຫ້ກະຊວງອຸດສາຫະກຳ ແລະ ການຄ້າ ເປັນໃຈກາງສົມທົບກັບ ຫ້ອງວ່າການສຳນັກງານ ນາຍົກລັດຖະມົນຕີ, ກະຊວງການເງິນ ແລະ ທະນາຄານແຫ່ງ ສປປ ລາວ ເພື່ອສ້າງນິຕິກຳ ແລະ ລະບຽບການ, ພ້ອມທັງ ໃຫ້ເອົາລະບຽບການດັ່ງກ່າວ ທາບທາມຄຳຄິດເຫັນນຳ ບັນດາຜູ້ປະກອບການຕົວຈິງຕື່ມ ເພື່ອລະດົມຄວາມຄິດເຫັນທີ່ຫລາກຫລາຍ ແນໃສ່ສ້າງກອງທຶນດັ່ງກ່າວ ມີເນື້ອໃນຮັດກຸມ, ຈະແຈ້ງ ສາມາດຈັດຕັ້ງປະຕິບັດໄດ້ ຢ່າງມີປະສິດທິພາບ ແລະ ປະສິດທິຜົນສູງ. ຕາງໜ້າໃຫ້ລັດຖະບານ ເພື່ອຮັບເອົາເງິນຄັ້ງນີ້, ແມ່ນ ທ່ານ ບົວຄົງ ນາມມະວົງ ລັດຖະມົນຕີ, ຫົວໜ້າຫ້ອງວ່າການສຳນັກງານ ນາຍົກລັດຖະມົນຕີ.

ຂ່າວ-ພາບ: ກົມປະຊາສຳພັນ, ຫສນຍ

KPL