ຂປລ. ໃນລະຫວ່າງວັນທີ 31 ທັນວາ 2024-2 ມັງກອນ 2025 ທ່ານ ນາງ ປານີ ຢາທໍ່ຕູ້ ຮອງປະທານປະເທດ ພ້ອມດ້ວຍຄະນະ ໄດ້ຢ້ຽມຢາມແຂວງຊຽງຂວາງ ​ໂດຍ​ການຕ້ອນຮັບຂອງ ທ່ານບຸນຈັນ ສີວົງພັນ ເຈົ້າແຂວງຊຽງຂວາງ ພ້ອມ​ດ້ວຍ​ບັນດາ​ການ​ນໍາ​ແຂວງ ​ແລະ ​ເດີນທາງ​ໄປຢ້ຽມຢາມ, ຊຸກຍູ້ສົ່ງເສີມ ພໍ່ແມ່ປະຊາຊົນບ້ານຫໍກາງ ເມືອງຜາໄຊ ກ່ຽວ​ກັບ​ການ​ປູກ​ເຂົ້າ​ໄກ່​ນ້ອຍ.

ທ່ານ ສົມສະໝອນ ຜະລິຈັນ ຫົວໜ້າພະແນກກະສິກຳ ແລະ ປ່າໄມ້ແຂວງ ໄດ້​ໃຫ້​ຮູ້​ກ່ຽວ​ກັບການປູກຝັງ-ລ້ຽງສັດ ​ເຊິ່ງເປັນທ່າແຮງ ໃນການພັດທະນາ ຂອງປະຊາຊົນພາຍ​ໃນຊຽງຂວາງ ພົ້ນເດັ່ນກວ່າໝູ່ແມ່ນ ການປູກເຂົ້າໄກ່ນ້ອຍ, ການລ້ຽງງົວ, ຄວາຍ, ມ້າ, ຜັກ, ປູກສາລີ, ໝາກເພັດນ້ອຍ, ກາເຟແລະ ຜັກທຽມ ເຊິ່ງສາມາດສະໜອງ ພາຍໃນແຂວງ ແລະ ສົ່ງອອກໄປຕ່າງແຂວງ ເປັນຕົ້ນ ແມ່ນນະຄອນຫລວງວຽງຈັນ. ນອກນີ້, ຍັງສົ່ງອອກໄປຕ່າງປະເທດ ຕື່ມ​ອີກ. ສໍາລັບເຂົ້າໄກນ້ອຍ ແມ່ນສາ ມາດປູກໄດ້ຢູ່ 5 ເມືອງ ມີ  7 ສາຍພັນຄື: ເຂົ້າໄກ່ນ້ອຍດຳ, ລາຍ, ເຫລືອງ, ແດງດໍ, ແດງປີ, ແດງລາຍແຊກ ແລະ ແດງເມັດໃຫຍ່. ທົ່ວແຂວງມີເນື້ອທີ່ປູກເຂົ້າໄກ່ນ້ອຍ 12.500 ເຮັກຕາ, ສາມາດຜະລິດໄດ້55.000 ໂຕນ, ສົ່ງອອກ ສສ ຫວຽດນາມ 5.000 ໂຕນ. ນອກນັ້ນ, ແມ່ນບໍລິໂພກພາຍໃນແຂວງແລະ ສົ່ງອອກສູ່ນະຄອນຫລວງວຽງຈັນ.

ທ່ານ ສີວັນ ຫົວໜ້າກຸ່ມປູກເຂົ້າໄກ່ນ້ອຍ ບ້ານຫໍກາງ ໄດ້​ໃຫ້​ຮູ້​ວ່າ: ການປູກເຂົ້າໄກ່ນ້ອຍຢູ່ພາຍໃນບ້ານ ​ແມ່ນໄດ້ຈັດຕັ້ງເປັນກຸ່ມ ​ໂດຍໄດ້ຕິດຕາມ ແລະ ເອົາໃຈໃສ່ແຕ່ມື້ເລີ່ມຕົ້ນ ຈົນເຖິງເກັບກ່ຽວ, ຕິດຕາມປະລິມານນ້ຳ, ຝຸ່ນ (ຝຸ່ນຄອກ), ສັດຕູພືດ, ອາກາດ ແລະ ການເກັບແນວພັນ ເຊິ່ງປະຊາຊົນບ້ານຫໍກາງ ປູກເຂົ້າໄກ່ນ້ອຍມີ 4 ສາຍພັນຄື: ເຂົ້າໄກ່ນ້ອຍດຳ, ເຫລືອງ, ລາຍ ແລະ ເຂົ້າໄກ່ນ້ອຍແດງ, 1 ເຮັກຕາສາມາດຜະລິດໄດ້ 3,8-4 ໂຕນ, ຜະລິດໄດ້ແຕ່ລະດູດຽວ ເນື່ອງຈາກບ້ານບໍ່ມີນ້ຳພຽງພໍໃນລະ ດູແລ້ງ.

ໂອກາດນີ້, ທ່ານ ນາງ ປານີ ຢາທໍ່ຕູ້ ໄດ້ມີຄຳຄິດເຫັນໂອ້ລົມ ​ໂດຍເນັ້ນໃຫ້ເອົາໃຈໃສ່ຮັກສາ ແນວພັນເຂົ້າໄກ່ນ້ອຍ, ສັບຊ່າວຂະຫຍາຍເນື້ອທີ່, ຮັກສາຄຸນນະພາບ, ຄຸນລັກຊະນະຂອງເຂົ້າ, ສົ່ງເຂົ້າແຕ່ລະສາຍພັນ ເພື່ອວິໄຈຢູ່ຕ່າງປະເທດ, ຖອດຖອນບົດຮຽນເຕັກນິກການປູກ, ກົນຈັກ ແລະ ການເກັບແນວພັນ ນຳຊ່ຽວຊານຫວຽດນາມ, ເຂົ້າໄກ່ນ້ອຍ ແມ່ນໄດ້ຮັບຄວາມນິຍົມຈາກທົ່ວໂລກ. ສະ​ນັ້ນ, ຈົ່ງສົ່ງເສີມຊຸກຍູ້ການປູກໃຫ້ຫລາຍຂຶ້ນ.

​ໃນໂອກາດດຽວ​ກັນ, ທ່ານ​ຮອງ​ປະທານ​ປະ​ເທດ ຍັງ​ໄດ້ຮ່ວມພິທີເປີດ ບຸນປະເພນີກິນຈຽງເຜົ່າມົ້ງ ປະຈຳປີ 2024 ຢູ່ເດີ່ນສະມາຄົມກິລາ-ວັນນະຄະດີພື້ນເມືອງ ແລະ ອະນຸລັກຮີດຄອງບຸນປະເພນີກິນຈຽງ ແຂວງຊຽງຂວາງ, ເຮັດພິທີສາສະໜາຢູ່ສຸສານ ທ່ານ ຕູ້ຢ່າໄຊຈູ ແລະ ພີ່ນ້ອງຢູ່ເມືອງໜອງແຮດ, ກວດກາເບິ່ງການກໍ່ສ້າງ ວັດສາມັກຄີໄຊຍະຣາມ ບ້ານຖ້ຳໄຊ ເມືອງໜອງແຮດ ​ແລະ ຮ່ວມພິທີສວດມົນຂ້າມປີ ຢູ່ວັດສັນຕິພາບເມືອງແປກ ຕື່ມ​ອີກ.

ຂ່າວ: ບຸນມີ ແສງທຸມມີ

KPL