KPL
ສຳນັກງານສະຖິຕິ ແຫ່ງຊາດ ມຽນມາ ລາຍງານຜົນສຳຫລວດ ສຳມະໂນຄົວ ປະຊາກອນແຫ່ງຊາດ ເປັນຄັ້ງທຳອິດ ໃນຮອບ 10 ປີ, ເມື່ອເດືອນຕຸລາປີກາຍ ຢືນຢັນມີຈຳນວນ ປະຊາກອນ 51,3 ລ້ານຄົນ, ຫລຸດລົງປະມານ 200.000 ຄົນ
ຂປລ.ສຳນັກຂ່າວ ຕ່າງປະເທດ, ວັນທີ 1 ມັງກອນ 2025, ສຳນັກງານສະຖິຕິ ແຫ່ງຊາດ ມຽນມາ ລາຍງານຜົນສຳຫລວດ ສຳມະໂນຄົວ ປະຊາກອນແຫ່ງຊາດ ເປັນຄັ້ງທຳອິດ ໃນຮອບ 10 ປີ, ເມື່ອເດືອນຕຸລາປີກາຍ ຢືນຢັນມີຈຳນວນ ປະຊາກອນ 51,3 ລ້ານຄົນ, ຫລຸດລົງປະມານ 200.000 ຄົນ ເມື່ອທຽບກັບສະຖິຕິ ຈາກການສຳຫລວດ ເມື່ອປີ 2014 ລວມມີ 51,5 ລ້ານຄົນ.
ໃນການສຳຫລວດ ດັ່ງກ່າວ, ເຈົ້າໜ້າທີ່ ສາມາດເຂົ້າເຖິງ ປະຊາກອນຈໍານວນ 32,19 ລ້ານຄົນ ແລະ ອີກ 19,12 ລ້ານຄົນ ຢູ່ໃນເຂດທີ່ມີຄວາມຫຍຸ້ງຍາກຕໍ່ການເຂົ້າໄປ ສໍາຫລວດ. ການສໍາຫລວດສຳມະໂນຄົວ ປະຊາກອນຂອງ ມຽນມາ ບໍ່ລວມຊາວ ໂຣຮິງຢາ ຊຶ່ງສ່ວນໃຫຍ່ ອາໄສຢູ່ໃນ ລັດຍະໄຂ່ ທາງພາກຕາເວັນຕົກຂອງປະເທດ.
ການສຳຫລວດ ສຳມະໂນຄົວ ປະຊາກອນ ຊຶ່ງຈັດຂຶ້ນໂດຍ ລັດຖະບານ ທະຫານ ມຽນມາ ໃນຄັ້ງນີ້ ໜ້ອຍກວ່າຜົນການສຳຫລວດ ຂອງທະນາຄານໂລກ (ເວີດແບງ) ທີ່ລະບຸວ່າ ມຽນມາ ມີປະຊາກອນ 54,5 ລ້ານຄົນ ເມື່ອປີ 2024 ເພີ່ມຂຶ້ນຈາກ 50,7 ລ້ານຄົນ ເມື່ອປີ 2014./
KPL
