ຂປລ. ສະຫະພັນແມ່ຍິງ ຫ້ອງສຶກສາ ໂຮງຮຽນວັດທະນະທຳຊົນເຜົ່າກອງທັບ ຈັດກອງປະຊຸມສະຫລຸບ ວຽກງານຮອບດ້ານປະຈຳປີ 2024 ແລະ ວາງທິດທາງແຜນການປະຈຳປີ 2025 ​ໃນວັນທີ 25 ທັນວາ 2024 ໂດຍການເປັນປະທານຂອງ ສະຫາຍ ພັນໂທ ນາງ ດາວັນ ສິມໃບມະນີ ຮອງຫົວໜ້າຫ້ອງສຶກສາ, ມີພະແນກສະຫະພັນແມ່ຍິງຂອງໂຮງຮຽນ, ຄະນະບໍລິ ຫານງານຊາວໜຸ່ມ, ເລຂາໜ່ວຍສະຫະພັນແມ່ຍິງ ຕະຫລອດຮອດ ເອື້ອຍນ້ອງສະຫະພັນແມ່ຍິງທົ່ວຫ້ອງສຶກສາ ເຂົ້າຮ່ວມ.

ສະຫາຍ ພັນໂທ ນາງ ຄຳບາງ ອ້ວນເລືອງສີ ເລຂາໜ່ວຍສະຫະພັນ ແມ່ຍິງຫ້ອງສຶກສາ ໄດ້ສະຫລຸບຕີລາຄາຄືນ ເຖິງການເຄື່ອນໄຫວຈັດຕັ້ງປະຕິບັດວຽກງານໃນຫລາຍດ້ານທີ່ພົ້ນເດັ່ນ ຂອງພະ ນັກງານ-ສະມາຊິກສະຫະພັນແມ່ຍິງຫ້ອງສຶກສາ ທີ່ຍາດມາໄດ້ໃນໄລຍະ 1 ປີທີ່ຜ່ານມາ ເປັນຕົ້ນ ໄດ້ຖືເອົາວຽກງານການເມືອງ ນຳພາແນວຄິດເປັນກົກ ໃຫ້ເອື້ອຍນ້ອງສະມາຊິກ ສະຫະພັນແມ່ຍິງ ຮັບຮູ້ເຊື່ອມຊຶມ ​ແລະ ກໍາແໜ້ນແນວທາງ ນະໂຍບາຍຂອງພັກ, ກົດໝາຍຂອງລັດ, ຂໍ້ກໍານົດ 7 ລະບອບ 18 ຂອງກອງທັບ ແລະ ເນື້ອໃນຂໍ້ແຂ່ງຂັນ 3 ດີຂອງສູນກາງ ສະຫະພັນ ແມ່ຍິງລາວວາງອອກ. ໃນນີ້, ໄດ້ເປັນເຈົ້າການຊີ້ນໍາເອື້ອຍນ້ອງ ສະມາຊິກສະຫະພັນແມ່ຍິງ ດໍາເນີນຊີວິດການເມືອງຂັ້ນຈຸ, ໜ່ວຍ ເປັນປົກກະ ຕິ; ເຂົ້າຮ່ວມຮັບຟັງ ປາຖະກະຖາ ມູນເຊື້ອວັນສໍາຄັນຕ່າງໆ ຂອງຊາດ, ຂອງພັກ, ຂອງກອງທັບ, ຂອງກົມກອງ ກໍຄື ຂອງແມ່ຍິງລາວ ຢ່າງເປັນຂະບວກການຟົດຟື້ນ. ນອກນີ້, ສະຫະພັນແມ່ຍິງຫ້ອງສຶກສາ ຍັງໄດ້ປະຕິບັດ ນະໂຍບາຍຊ່ວຍເຫລືອ ເອື້ອຍນ້ອງແມ່ຍິງ ຜູ້ທີ່ເຈັບເປັນ, ເກີດລູກ, ຫາລາຍໄດ້ເຂົ້າຈຸ-ໜ່ວຍ ຈາກການຂາຍຊີ້ນໝູ, ເຄື່ອງດື່ມ, ປູກຜັກ ແລະ ອື່ນໆ ສາມາດສ້າງລາຍ ໄດ້ເຂົ້າຄັງໜ່ວຍ ລວມເປັນເງິນ 12 ລ້ານ​ກວ່າກີບ; ຈັດຕັ້ງເຜີຍແຜ່ເອກະສານ ກ່ຽວກັບປະຕິບັດຂໍ້ແຂ່ງຂັນ 3 ດີ ຕາມທິດຊີ້ນຳຂອງພະແນກ ສະຫະພັນແມ່ຍິງໂຮງຮຽນວາງອອກ, ສະເໜີແມ່ຍິງ 3 ດີ ປະເພດ 1 ຈຳນວນ 25 ສະ ຫາຍ ແລະ ປະເພດ 2 ຈຳນວນ 5 ສະຫາຍ. ຈາກນັ້ນ, ບັນດາສະຫາຍ ສະມາຊິກສະຫະພັນແມ່ຍິງ ພາຍໃນຫ້ອງສຶກສາ ຍັງໄດ້ປະກອບ ຄຳຄິດເຫັນໃສ່ບົດສະຫລຸບ ແລະ ທິດທາງແຜນການໃນຕໍ່ໜ້າຢ່າງກົງໄປກົງມາ.

ໂອກາດນີ້, ສະຫາຍ ພັນໂທ ນາງ ດາວັນ ສິມໃບມະນີ ກໍໄດ້ສະແດງຄວາມຍ້ອງຍໍຊົມເຊີຍຕໍ່ ຜົນງານ ທີ່ເອື້ອຍນ້ອງສະມາຊິກສະຫະພັນແມ່ຍິງ ຫ້ອງສຶກສາຍາດມາໄດ້ໃນ 1 ປີທີ່ຜ່ານມາ, ພ້ອມທັງຮຽກຮ້ອງໃຫ້ ສະມາຊິກສະຫະພັນແມ່ຍິງທຸກສະຫາຍ ຈົ່ງສືບຕໍ່ສຶກສາອົບຮົມ ການເມືອງແນວຄິດ, ມີຄວາມຮັບຮູ້ເຊື່ອມຊຶມ, ກໍາແໜ້ນຕໍ່ແນວທາງ ນະໂຍບາຍຂອງພັກ, ກົດໝາຍ ຂອງລັດ, ຂໍ້ກໍານົດກົດລະ ບຽບຂອງກອງທັບ, ເນື້ອໃນຂໍ້ແຂ່ງຂັນ 3 ດີ ຂອງແມ່ຍິງລາວວາງອອກ, ພ້ອມກັນຈັດຕັ້ງຜັນຂະຫາຍເຂົ້າໃນ ການເຄື່ອນໄຫວວຽກງານ ຕາມພາລະບົດບາດ ໜ້າທີ່ ການເມືອງຂອງຕົນ ໃຫ້ມີ​ປະສິດທິ ​ຜົນຂຶ້ນ​ໄປເລື້ອຍໆ.

ຂ່າວ: ໂອລິນ ມິ່ງມີໄຊ

KPL