*ໃນວັນທີ 19 ທັນວາ 2024,ຄະນະພົວພັນຕ່າງປະເທດສູນກາງພັກ (ຄຕພ) ໄດ້ຈັດປາຖະກະຖາ ຫວນຄືນມູນເຊື້ອ ວັນສະຖາປະນາ ສປປ ລາວ ຄົບຮອບ 49 ປີ (2/ 12/1975-2/12/2024) ແລະ ວັນເກີດປະທານ ໄກສອນ ພົມວິຫານ ຄົບຮອບ 104 ປີ (13/12/1920- 13/12/2024) ເພ່ືອເຮັດໃຫ້ສະມາຊິກພັກ ແລະ ພະນັກງານ ຄະນະພົວພັນຕ່າງປະເທດສູນກາງພັກ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງເຖິງມູນເຊື້ອປະຫວັດສາດ ແຫ່ງການກຳເນີດ ແລະ ເຕີບໃຫຍ່ຂະຫຍາຍຕົວຂອງພັກ, ຂອງຊາດລາວ ໃນການສ້າງສາພັດທະນາປະເທດຊາດ ໃນຕະຫລອດ 49 ປີ ຜ່ານມາ, ພ້ອມທັງໄດ້ສຶກສາຮໍ່າຮຽນ ເອົາເປັນແບບຢ່າງດ້ານຄຸນທາດການເມືອງ, ຄຸນສົມບັດສິນທຳປະຕິວັດ, ການດໍາລົງຊີວິດແບບລຽບງ່າຍ ແລະ ນໍ້າໃຈຮັກເຊື້ອແພງຊາດຂອງປະທານ ໄກສອນ ພົມວິຫານ ເພື່ອຝຶກຝົນຫລໍ່ຫລອມຕົນເອງ ໃຫ້ກາຍເປັນພະນັກງານມີຄຸນສົມບັດສິນທຳປະຕິວັດ, ມີນ້ຳໃຈເສຍສະຫລະ, ຄວາມສາມັກຄີ, ມີຄວາມຮູ້ກວ້າງຂວາງ, ສາມາດຕອບສະໜອງໄດ້ຄວາມຮຽກຮ້ອງຕ້ອງການຂອງໜ້າທີ່ການເມືອງ ທີ່ໄດ້ຮັບມອບໝາຍໃນໄລຍະໃໝ່.

     ການປາຖະກະຖາຄັ້ງນີ້ໂດຍ ສະຫາຍ ບຸນເຫລືອ ພັນດານຸວົງ ຮັກສາການເລຂາຄະນະບໍລິຫານງານພັກ, ຮັກສາການຫົວໜ້າຄະນະພົວພັນຕ່າງປະເທດສູນກາງພັກ, ເຊິ່ງໄດ້ຍົກໃຫ້ເຫັນເຖິງມູນເຊື້ອ ແລະ ຄວາມໝາຍສໍາຄັນຂອງວັນ ຊາດທີ 2 ທັນວາ ເຊິ່ງແມ່ນວັນແຫ່ງໄຊຊະນະອັນຍິ່ງໃຫຍ່ ໃນປະຫວັດສາດ ຂອງຊາດລາວ, ແມ່ນວັນທີ່ ປະເທດລາວ ໄດ້ມີເອກະລາດຢ່າງສົມບູນ ແລະ ມີອະທິປະໄຕຢ່າງຄົບຖ້ວນ ແລະ ມີຖານະເທົ່າທຽມກັບປະເທດອື່ນໆ ໃນເວທີປະຊາຄົມໂລກ. ພ້ອມນັ້ນ, ຍັງໄດ້ຍົກໃຫ້ເຫັນ ເຖິງຜົນສໍາເລັດ ແລະ ຄວາມກ້າວໜ້າ ໃນການປົກປັກຮັກສາ ແລະ ສ້າງສາພັດທະນາປະເທດຊາດຂອງພັກ, ລັດຖະບານຂອງ ສປປ ລາວ ຕະຫລອດໄລຍະ 49 ປີ ທີ່ຜ່ານ ມາທີ່ໄດ້ມີການເຕີບໃຫຍ່ ແລະ ຂະຫຍາຍຕົວຢ່າງຕໍ່ເນື່ອງ. ພ້ອມນີ້, ສະຫາຍ ບຸນເຫລືອ ພັນດານຸວົງ ຍັງໄດ້ຫວນຄືນຊີວິດ ແລະ ມູນເຊື້ອການເຄື່ອນໄຫວປະ ຕິວັດ ແລະ ຜົນງານການຊີ້ນໍາຂອງ ປະທານ ໄກສອນ ພົມວິຫານ, ຍົກໃຫ້ເຫັນມູນເຊື້ອອັນອົງອາດກ້າ ຫານ, ຄວາມປີຊາສາມາດ, ເພິ່ນ ແມ່ນນັກຮົບປະຕິວັດທີ່ດີເດັ່ນທັງ ເປັນຜູ້ນໍາສູງສຸດ ຂອງການປະຕິ ວັດ ເຊິ່ງລູກຫລານ, ຊາວໜຸ່ມຮຸ່ນສືບທອດຈະຕ້ອງຕັ້ງໜ້າຮໍ່າຮຽນເອົາແບບຢ່າງອັນດີງາມ, ຄຸນສົມບັດສິນທຳປະຕິວັດ ຂອງປະທານ ໄກສອນ ພົມວິຫານ.

ພາບ: ຂັນໄຊ

KPL