KPL
ຂປລ. ໃນວັນທີ 19 ທັນວາ 2024 ນີ້, ສະຫາຍ ພົນໂທ ຄຳລຽງ ອຸທະໄກສອນ ລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ ພ້ອມຄະນະ ໄດ້ເດີນທາງເຂົ້າຮ່ວມພິທີ ເປີດງານວາງສະແດງສິນຄ້າອຸດສາຫະກຳ ປ້ອງກັນຊາດສາກົນຫວຽດນາມ ປະຈຳປີ 2024 ເຊິ່ງໄດ້ຈັດຂື້ນຢູ່ທີ່ສະໜາມບິນຍາເລິມ ນະຄອນຫລວງໂຮ່ຈີ່ມິງ ສສ ຫວຽດນາມ, ເຂົ້າຮ່ວມໃນພິທີມີ ສະຫາຍ ຟ້າມ ມິງ ຈິງ ນາຍົກລັດຖະມົນຕີແຫ່ງ ສສ ຫວຽດນາມ, ມີລັດຖະມົນຕີ ກະຊວງປ້ອງກັນປະເທດ ບັນດາປະເທດ ແລະ ບັນດາບໍລິສັດລັດວິສາຫະກິດ ເຂົ້າຮ່ວມ.
ຂປລ. ໃນວັນທີ 19 ທັນວາ 2024 ນີ້, ສະຫາຍ ພົນໂທ ຄຳລຽງ ອຸທະໄກສອນ ລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ ພ້ອມຄະນະ ໄດ້ເດີນທາງເຂົ້າຮ່ວມພິທີ ເປີດງານວາງສະແດງສິນຄ້າອຸດສາຫະກຳ ປ້ອງກັນຊາດສາກົນຫວຽດນາມ ປະຈຳປີ 2024 ເຊິ່ງໄດ້ຈັດຂື້ນຢູ່ທີ່ສະໜາມບິນຍາເລິມ ນະຄອນຫລວງໂຮ່ຈີ່ມິງ ສສ ຫວຽດນາມ, ເຂົ້າຮ່ວມໃນພິທີມີ ສະຫາຍ ຟ້າມ ມິງ ຈິງ ນາຍົກລັດຖະມົນຕີແຫ່ງ ສສ ຫວຽດນາມ, ມີລັດຖະມົນຕີ ກະຊວງປ້ອງກັນປະເທດ ບັນດາປະເທດ ແລະ ບັນດາບໍລິສັດລັດວິສາຫະກິດ ເຂົ້າຮ່ວມ.
ງານວາງສະແດງສິນຄ້າອຸດສາຫະກຳ ປ້ອງກັນຊາດສາກົນຫວຽດນາມ ປະຈຳປີ 2024 ໄດ້ໄຂຂຶ້ນດ້ວຍການສະແດງ ສິລະປະພິເສດຂອງນາຍ ແລະ ພົນທະຫານຂອງກອງທັບ ປະຊາຊົນຫວຽດນາມ ຫລາຍກວ່າ 2.400 ຄົນ ໂດຍສະເພາະ ກິດຈະກໍາການບິນຕ້ອນຮັບຂອງ ກອງທັບອາກາດຫວຽດນາມ, ການສາທິດການສູ້ຮົບ ຂອງກອງທັບບັງຄັບ ແລະ ການສະແດງຄວາມຊໍານິຊຳນານ ທາງດ້ານຍຸດທະວິທີ ຂອງກອງທັບທະຫານຊາຍແດນ ແລະ ການສະແດງອື່ນໆ ຊຶ່ງມີຄວາມໝາຍພິເສດ ເປັນງານສະແດງສາກົນທີ່ໂດດເດັ່ນທີ່ສຸດ.
ໂອກາດດັ່ງກ່າວ, ທ່ານ ຟ້າມ ມິງ ຈິງ ນາຍົກລັດຖະມົນແຫ່ງ ສສ ຫວຽດນາມ ໄດ້ສະແດງຄວາມເຊື່ອໝັ້ນວ່າ: ງານວາງສະແດງອຸດສາຫະກຳ ປ້ອງກັນຊາດສາກົນຫວຽດນາມ 2024 ໃນຄັ້ງນີ້, ຈະປະສົບຜົນສໍາເລັດຢ່າງຍິ່ງ, ນໍາເອົາໂອກາດຫລາຍຢ່າງ ໃນການແລກປ່ຽນ, ແບ່ງປັນປະສົບການ, ແລກປ່ຽນຄວາມກ້າວໜ້າ ທາງດ້ານວິທະຍາສາດ ແລະ ເຕັກໂນໂລຊີ, ການພັດທະນາ, ການປ່ຽນແປງທາງດ້ານຕ່າງໆ ໃຫ້ສອດຄ່ອງກັບນໍ້າໃຈ ຂອງ "ສັນຕິພາບ, ມິດຕະ ພາບ, ການຮ່ວມມື ແລະ ການພັດທະນາ" ແລະ ໃນໂອກາດດຽວກັນ ກໍໄດ້ຈັດຂຶ້ນໃນທ່າມ ກາງບັນຍາກາດທີ່ທົ່ວພັກ, ທົ່ວລັດ ກໍຄື ກອງທັບປະຊາຊົນຫວຽດນາມ ພວມຈັດຕັ້ງ ສະເຫລີມສະຫລອງ ວັນສ້າງຕັ້ງກອງທັບປະຊາຊົນຫວຽດ ນາມຄົບຮອບ 80 ປີ ແລະ ວັນບຸນປ້ອງກັນຊາດ ທົ່ວປວງຊົນຫວຽດນາມ ຄົບຮອບ 35 ປີ, ພ້ອມນີ້, ຍັງໄດ້ເປັນການຢືນຢັນບົດບາດ ແລະ ການປະກອບສ່ວນຂອງຫວຽດນາມ ໃນການຮ່ວມມືດ້ານການປ້ອງກັນຊາດສາກົນ, ເປັນສັນຍະລັກ ຂອງຄວາມໄວ້ວາງໃຈ, ຄວາມນັບຖື ແລະ ຄວາມປາຖະໜາດີ ຕໍ່ການຮ່ວມມືລະຫວ່າງປະເທດຕ່າງໆ ເພື່ອໂລກທີ່ສະຫງົບສຸກ, ໝັ້ນຄົງ ແລະ ຈະເລີນຮຸ່ງເຮືອງ, ເປັນຫລັກຖານທີ່ແຈ່ມແຈ້ງເຖິງການສະຫນັບສະໜູນ ແລະ ຄວາມຈິງໃຈທີ່ມີຄວາມໝາຍ ຂອງໝູ່ເພື່ອນນາໆຊາດ ທີ່ມີຕໍ່ປະເທດຊາດຂອງຕົນ, ປະຊາຊົນ ແລະ ກອງທັບປະຊາ ຊົນຫວຽດນາມ, ສະແດງຄວາມຈິງໃຈ, ຄວາມໄວ້ວາງໃຈ ແລະ ຄວາມຮັບຜິດຊອບຕໍ່ເພື່ອນຕ່າງປະເທດສະເໝີ.
ໂອກາດເຂົ້າຮ່ວມໃນງານດັ່ງກ່າວ, ສະຫາຍ ພົນໂທ ຄຳລຽງ ອຸທະໄກສອນ ພ້ອມຄະນະ ຍັງໄດ້ຢ້ຽມຊົມພາຍໃນງານ ໂດຍມີຜູ້ແທນສາກົນເຂົ້າຮ່ວມ 66 ທ່ານ ແລະ ມີບໍລິສັດວິສາຫະກິດອຸດສາຫະກໍາ ປ້ອງກັນຊາດຫລາຍກວ່າ 240 ບໍລິສັດ ຈາກ 49 ປະເທດ.
ຂ່າວ: ທອງມາ
KPL
