ຂປລ.ສຳນັກ​ຂ່າວ ​ເອ​ເອຟພີ, ກະຊວງ​ສາທາລະນະ​ສຸກ ​ແຮງ​ງານ ​ແລະ ສະ​ຫວັດ​ດີກາ​ນຂອງ ຍີ່ປຸ່ນ ຈະ​ຊຸກຍູ້ການການຈັດຫາບຸກຄະລາກອນດ້ານພະຍາບານ ຈາກ​ອາຊີ​ຕາ​ເວັນ​ອອກສຽງ​ໃຕ້(ອາຊຽນ) ​ຢ່າງຕັ້ງໜ້າ ນັບ​ແຕ່​ປີ​ 2025 ​ເປັນ​ຕົ້ນ​ໄປ ​ເພື່ອ​ຮັບ​ມື​ກັບ​ບັນຫາ​ຂາດ​ແຄນ​ແຮງ​ງານ.

​          ປັດຈຸບັນ ​ປະຊາກອນ ຍີ່ປຸ່ນ ປະມານ 1 ​ໃນ 5 ຈະ​ມີ​ອາຍຸ​ຫລາຍ​ກວ່າ 75ປີ ​ໃນ​ປີ 2025, ຂະນະ​ທີ່ ພະນັກງານ​ ເບິ່ງແຍງ​ຜູ້​ສູງ​ອາຍຸ ​ໃນ​ປະ​ເທດ​ປະມານ 2,15 ລ້ານ​ຄົນ, ຊຶ່ງ​ສັງຄົມ​ຜູ້​ສູງ​ອາຍຸ ທີ່​ຂະຫຍາຍຕົວ​ຂຶ້ນ​ເລື້ອຍໆ ອາດ​ເຮັດ​ໃຫ້​ຍີ່ປຸ່ນ ຂາດ​ແຄນ​ພະນັກງານ ປະມານ 250.000 ຄົນ ​ໃນ​ປີ​ງົບປະມານ 2026 ​ແລະ ປະມານ 570.000 ​ໃນ​ປີ​ງົບປະມານ 2070.

ຕາມ​ຂໍ້​ມູນ​ຂອງ​ສຳນັກງານ​ ກວດ​ຄົນ​ເຂົ້າ​ເມືອງ ​ໃນ​ທ້າຍ​ປີ 2023 ມີ​ຊາວ​ຕ່າງປະ​ເທດ ​ເດີນທາງ​ເຂົ້າ​ຍີ່ປຸ່ນ ດ້ວຍ​ວິຊາ ຜູ້​ມີຄວາມຊຳນິ ຊຳນານ ​​ຕາມ​ກຳນົດ 28.400 ຄົນ ​ເພື່ອ​ເຮັດ​ວຽກ​ໃນອຸດສາຫະກຳ ພະຍາບານ ຊຶ່ງ​ເປັນ​ຕົວ​ເລກ ​ພຽງ​ຄຶ່ງ​ໜຶ່ງຂອງ​ເປົ້າ​ໝາຍ ຂອງ​ລັດຖະບານ.ຂະນະທີ່ ກະຊວງ ຈະອຸດໜູນຄ່າໃຊ້ຈ່າຍ ສຳລັບບໍລິສັດ ທີ່ດຳເນີນການ ເຮືອນພັກຜູ້ສູງອາຍຸ ຫລື ໂທຄຸໂຍ ແລະ ໂຮງຮຽນຝຶກອົບຮົມພະນັກງານ ເບິ່ງແຍງຜູ້ສູງອາຍຸ.ນອກຈາກນັ້ນ ເງິນດັ່ງກ່າວ ຈະຖືກກະຈາ ຍໄປທີ່ການຝຶກອົບຮົມ ໂດຍໂຮງຮຽນ ສອນພາສາ ຍີ່ປຸ່ນ ແລະ ໜ່ວຍງານໃນພາກພື້ນ ເຊັ່ນ: ສສ ຫວຽດນາມ ແລະ ມຽນມາ. ດ້ານເຍົາວະຊົນ ໃນພື້ນທີ່ ຈະໄດ້ຮັບຂໍ້ມູນ ທີ່ກ່ຽວຂ້ອງກັບປະໂຫຍດ ຂອງການເຮັດວຽກ ໃນຍີ່ປຸ່ນ ແລະ ເງື່ອນໄຂການ ຈ້າງງານ ລວມທັງການ ສະໜັບສະໜູນ ທາງການເງິນສຳລັບ ການສຳພາດ ແລະ ກິດຈະກຳ ຮັບສະໝັກບຸກ ຄະລາກອນ. ລັດຖະບານກາງ ໃນນະຄອນຫລວງໂຕກ່ຽວ ແລະ ລັດຖະບານ ທ້ອງຖິ່ນ ຈະຈັດສັນເງິນ 1 ລ້ານເຢນຕໍ່ບໍລິສັດ ແລະ ຄາດວ່າ ຈະມີທຸລະກິດຫລາຍກວ່າ 100 ແຫ່ງ ເຂົ້າຮ່ວມໃນປີງົບປະມານ 2025. ຂະນະດຽວກັນ ອິນໂດເນເຊຍ ຈະຈັດຕັ້ງ ໂຄງການ ໄລຍະ 3ປີ ຊຶ່ງມີຊື່ວ່າ  ໄຄໂກະ ເພື່ອຝຶກອົບຮົມຜູ້ຄົນທີ່ກ່ຽວກັບ ເຕັກນິກ ການເບິ່ງແຍງຜູ້ສູງອາຍຸ ໂດຍກະຊວງ ແລະ ອົງການຮ່ວມມືສາກົນຂອງຍີ່ປຸ່ນ ຫລື ໄຈກາ ເປັນຜູ້ຮັບຜິດຊອບ ການຈັດຫາຜູ້ຊ່ຽວຊານ ຈາກລະບົບປະກັນສຸຂະພາບ ແລລະ ການເບິ່ງແຍງຜູ້ສູງອາຍຸ./.

KPL