*ການພັດທະນາສີຂຽວຍືນຍົງ ແມ່ນຄວາມມຸ່ງມາດປາຖະໜາຂອງສອງພັກສອງລັດລາວ-ຈີນ ພາຍໃຕ້ຄູ່ຮ່ວມຊາຕາກໍາດຽວກັນລາວ-ຈີນໂດຍຕິດພັນກັບການປະກອບສ່ວນເຂົ້າໃນການພັດທະນາເສດຖະກິດ-ສັງຄົມ, ການສ້າງວຽກເຮັດງານທໍາ, ການແກ້ໄຂຄວາມທຸກຍາກ, ການສ້າງພື້ນຖານໂຄງລ່າງທີ່ມີຄຸນນະພາບ ເຊື່ອມໂຍງເຊື່ອມຈອດກັບພາກພື້ນ-ສາກົນ, ການປົກປັກຮັກສາສິ່ງແວດລ້ອມ ແລະ ໄປຕາມທິດຍືນຍົງຢ່າງຕັ້ງໜ້າ.
ຜູ້ຂຽນຂໍຢ້ອນເວລາໄປໃນເມື່ອກ່ອນປີ 1975 ສປປ ລາວ ມີເຂື່ອນໄຟຟ້າພຽງ 2 ແຫ່ງຄື: ເຂື່ອນໄຟຟ້າເຊລະບໍາ ແລະ ເຂື່ອນໄຟຟ້ານໍ້າງື່ມເຮັດໃຫ້ປະຊາຊົນພົບ ຄວາມທຸກຍາກລໍາບາກຫລາຍໃນການສ້າງເສດຖະກິດອຸດສາຫະກໍາ, ການຜະລິດກະສິກໍາເປັນສິນຄ້າ, ການປະກອບອາຊີບເສດຖະກິດແບບຄອບຄົວ ເພື່ອແກ້ໄຂຊີວິດການເປັນຢູ່ຂອງເຂົາເຈົ້າເພາະ ບໍ່ສາມາດເຂົ້າເຖິງແຫລ່ງພະລັງງານໄດ້ຢ່າງທົ່ວເຖິງ ແຕ່ປັດຈຸບັນປະເທດລາວໄດ້ມີແຫລ່ງພະລັງງານໄຟຟ້າບໍ່ຕໍ່າກວ່າ 80 ແຫ່ງທົ່ວປະເທດ ເຮັດໃຫ້ປະຊາຊົນລາວບັນດາເຜົ່າເກືອບ 98% ທົ່ວປະເທດເຂົ້າເຖິງໄຟຟ້າໃຊ້ແລ້ວ ນອກຈາກນັ້ນປະຊາຊົນລາວທຸກຊັ້ນຄົນ ບໍ່ວ່າຈະເປັນຄົນມີລາຍໄດ້ໜ້ອຍ, ມີລາຍໄດ້ປານກໍໄດ້ມີໂອກາດ ແລະ ສາມາດເຂົ້າເຖິງສິນຄ້າທຸກປະເພດໄດ້ດ້ວຍຄຸນນະພາບແຕກຕ່າງກັນ, ຄາລາສົມເຫດສົມຜົນ ແລະ ຖືກກວ່າເກົ່າເຊັ່ນ: (ລົດເກງ, ລົດຈັກ, ລົດໄຖນາ, ເຄື່ອງກົນຈັກ ແລະ ອື່ນໆ)ທີ່ຜະລິດຈາກ ສປ ຈີນ ເມື່ອສົມທຽບກັບເມື່ອກ່ອນມີປະຊາຊົນລາວຈໍານວນ ບໍ່ໜ້ອຍບໍ່ມີໂອກາດ ແລະ ບໍ່ສາມາດຊື້ໄດ້ສິນຄ້າທີ່ຜະລິດຈາກປະເທດພັດທະນາແລ້ວ ຫລື ປະເທດຕາເວັນຕົກ ຍ້ອນສິນຄ້າທີ່ຜະລິດໃນປະເທດເຫລົ່ານັ້ນຂ້ອນຂ້າງແພງຈັບຕ້ອງໄດ້ຍາກ ເຊິ່ງເຮັດໃຫ້ປະຊາຊົນຫາເຊົ້າກິນຄໍ່າ ຫລື ຜູ້ມີລາຍໜ້ອຍບໍ່ມີໂອກາດໄດ້ຊົມໃຊ້ ແລະ ບໍ່ສາມາດເຂົ້າເຖິງສິນຄ້າດັ່ງກ່າວ.
ຍ້ອນແນວນັ້ນ ມື້ນີ້ຜູ້ຂຽນຈະຍົກເອົາບາງເນື້ອໃນຈິດໃຈທີ່ໄດ້ເຫັນໄດ້ສໍາຜັດມາຈາກການໄປຊອກຄົ້ນ, ສຶກສາມາຈາກປື້ມ, ການສໍາພາດ, ອ່ານຈາກອິນເນັດ ເຊິ່ງແນ່ນອນວ່າການພັດທະນາ ແຕ່ລະໄລຍະອາດບໍ່ຄືກັນໃນຫລາຍຊຸມປີຜ່ານມາ,ພັກ-ລັດຖະບານກໍໃຫ້ຄວາມສໍາຄັນ ຢ່າງໜັກແໜ້ນໃນການເປີດກວ້າງການຮ່ວມມືກັບເພື່ອນມິດບ້ານໄກ້ເຮືອນຄຽງ ແລະ ວົງຄະນະຍາດສາກົນໂດຍບໍ່ຈໍາແນກບົນພື້ນຖານຖືກຕ້ອງ ສອດຄ່ອງກັບແນວທາງນະໂຍບາຍຂອງພັກ-ລັດຖະບານ ແລະ ບໍ່ຂັດກັບລະບຽບກົດໝາຍອື່ນໆ. ອັນພົ້ນເດັ່ນຜ່ານມາພັກ-ລັດຖະບານໄດ້ເອົາໃຈໃສ່ ແລະ ໃຫ້ຄວາມສໍາຄັນຢ່າງໃຈຈົດໃຈຈໍ່ ໂດຍສະເພາະການຫັນເປັນອຸດສາຫະກໍາທັນສະໄໝ, ການຫັນເປັນເສດຖະກິດຕະຫລາດ, ການພັດທະນາສີຂຽວຍືນຍົງ, ເພີ່ມທະວີການຮ່ວມມືເຊື່ອມໂຍງເຊື່ອມຈອດກັບພາກພື້ນ-ສາກົນ ແລະ ອື່ນໆ.
ດັ່ງທີ່ຮູ້ນໍາກັນ, ຂະແໜງພະລັງງານສະອາດ ແລະ ເປັນມິດຕໍ່ສິ່ງແວດລ້ອມແມ່ນບຸລິມະສິດສໍາຄັນໜຶ່ງຂອງພັກ-ລັດຖະບານລາວ ຖືເອົາການພັດທະນາສີຂຽວຍືນຍົງໃນຕໍ່ໜ້າ. ຫວ່າງບໍ່ດົນມານີ້,ຈີນຍັງໄດ້ດຳເນີນການຮ່ວມມືກັບລາວໃນຂົງເຂດພະລັງງານສະອາດຕ່າງໆ ເຊັ່ນ: ການຜະລິດໄຟຟ້າດ້ວຍພະລັງງານແສງຕາເວັນ, ການຜະລິດໄຟຟ້າດ້ວຍພະລັງງານລົມ ເຊິ່ງພວມຈັດຕັ້ງປະຕິບັດດໍາເນີນການກໍ່ສ້າງຢູ່ 3 ແຂວງທາງພາກເໜືອຂອງລາວ. ໃນນັ້ນ, ໂຄງການຜະລິດໄຟຟ້າດ້ວຍພະລັງງານແສງຕາເວັນໄລຍະ 1 ທີ່ຕັ້ງຢູ່ແຂວງອຸດົມໄຊ ທາງພາກເໜືອລາວໄດ້ເຂົ້າສູ່ໄລຍະກະກຽມ, ພາຍຫຼັງໂຄງການສ້າງສຳເລັດແລ້ວ, ຈະກາຍເປັນໂຄງການຜະລິດໄຟຟ້າດ້ວຍແສງຕາເວັນໃຫຍ່ທີ່ສຸດໃນປະເທດລາວ, ສາມາດຜະລິດໄຟຟ້າໄດ້ປະມານ 1,7 ຕື້ກິໂລວັດໂມງ ເຊິ່ງໄດ້ຊ່ວຍຫລຸດການລະບາຍກາກບອນເຖິງ 1,41 ລ້ານໂຕນ, ໄດ້ສະໜອງໄຟຟ້າໃຫ້ແກ່ປະຊາຊົນ 3 ລ້ານຄອບຄົວນອາຊີ ແລະ ໄດ້ນຳພາການຫັນມານຳໃຊ້ພະລັງງານສີຂຽວ ແລະ ການພັດທະນາເສດຖະກິດສັງຄົມຂອງທ້ອງຖິ່ນ; ໂຄງການຜະລິດໄຟຟ້າດ້ວຍພະລັງງານລົມ ທີ່ວິສາຫະກິດຈີນຮັບເໝົາກໍ່ສ້າງເປັນໂຄງການຜະລິດໄຟຟ້າດ້ວຍພະລັງງານລົມທີ່ໃຫຍ່ທີ່ສຸດ ໃນພາກພື້ນອາຊີຕາເວັນອອກສຽງໃຕ້ ແລະ ກໍແມ່ນໂຄງການຜະລິດໄຟຟ້າດ້ວຍພະລັງງານລົມແຫ່ງທຳອິດພາຍໃນປະເທດລາວ ເຊິ່ງໂຄງການດັ່ງກ່າວຕັ້ງຢູ່ແຂວງເຊກອງ ແລະ ແຂວງອັດຕາປື ທາງພາກໃຕ້ຂອງລາວ.
ພາຍຫລັງໂຄງການດັ່ງກ່າວສ້າງສຳເລັດແລ້ວ ຈະສົ່ງພະລັງງານໄຟຟ້າໄປສູ່ຫວຽດນາມ. ໃນອະນາຄົດອັນໄກ້ນີ້, ເຫັນວ່າລາວຈະສາມາດສົ່ງໄຟຟ້າທີ່ຜະລິດດ້ວຍພະລັງງານລົມ (ສີຂຽວ) ໄປຕ່າງປະເທດເປັນຄັ້ງທຳອິດ ແລະ ຊ່ວຍເຮັດໃຫ້ລາວບັນລຸວິໄສທັດ “ໝໍ້ໄຟອາຊີຕາເວັນອອກສຽງໃຕ້” ຕື່ມອີກ. ເວລານັ້ນໝາຍວ່າປະເທດລາວຕັ້ງເປົ້າໄວ້ໃນການພັດທະນາ “ໝໍ້ໄຟອາຊີຕາເວັນອອກສຽງໃຕ້” ໄດ້ບັນລຸການສະໜອງພະລັງງານໄຟຟ້າໃຫ້ເທດສະບານແຂວງ 100%, ບ້ານ 94% ແລະ ຄອບຄົວຕ່າງໆ 95% ພ້ອມທັງໄດ້ສົ່ງອອກພະລັງງານໄຟຟ້າໃຫ້ຈີນ, ໄທ, ຫວຽດນາມ ແລະ ກຳປູເຈຍ ເຊິ່ງຈະສາມາດສ້າງລາຍຮັບທີ່ເປັນເງິນຕາຕ່າງປະເທດໃຫ້ແກ່ລາວເປັນຈຳນວນຫລວງຫຼາຍ.
ເຖິງແນວໃດກໍດີ, ການພັດທະນາພະລັງງານໄຟຟ້າສະອາດນັ້ນ ບໍ່ພຽງຕິດພັນໃນອຸດສາຫະກໍາໂຮງຈັກໂຮງງານ ແລະ ຜະລິດກະສິກໍາຢ່າງຕັ້ງໜ້າເທົ່ານັ້ນ ຫາກຍັງຕິດພັນພາກການບໍລິການຂົນສົ່ງສິນຄ້າ, ຜູ້ໂດຍສານ ແລະ ການຊົມໃຊ້ພາຫະນະໃນຄົວເຮືອນອີກດ້ວຍ. ຕົວຢ່າງ ລົດພາຫະນະຂັບຂີ່ທີ່ໃຊ້ພະລັງງານໄຟຟ້າທີ່ກວມເອົາຈັກ, ລົດໃຫຍ່ ແລະ ລົດໄຟ ເຊິ່ງລ້ວນແຕ່ເປັນຫົວໃຈສໍາຄັນໃນການຂັບເຄື່ອນເສດຖະກິດ, ສ້າງວຽກເຮັດງານທໍາ ແລະ ແກ້ໄຂຄວາມທຸກຍາກຂອງປະຊາຊົນລາວບັນເຜົ່າທຸກຊັ້ນຄົນ. ປັດຈຸບັນຄົນລາວໃຊ້ລົດໄຟຟ້າ 5.500 ຄັນແລ້ວ, ຄາດວ່າພາຍໃນຕົ້ນປີ 2025 ຕົວເລກຈະເພີ່ມຂຶ້ນເຖິງ 10.000 ຄັນ. ມັນເປັນໂອກາດດີ, ທີ່ໄດ້ຍິນຂ່າວ ສປປ ລາວ ປະກາດວ່າປະເທດເຮົາຈະເປັນໝ້ໍໄຟແຫ່ງອາຊຽນ ແລະ ປັດຈຸບັນນ້ີພວກເຮົາກໍມີເຂ່ືອນໄຟຟ້າພະລັງງານລົມ, ແສງຕາເວັນ ແລະ ຄວາມຮ້ອນບໍ່ຕໍ່າກວ່າ 80 ແຫ່ງ ເຊິ່ງທັງໝົດຈະກາຍເປັນໄມ້ງັດເສດຖະກິດແຫ່ງຊາດຢ່າງແຂງແຮງ ທັງຈະຊ່ວຍສ້າງວຽກເຮັດງານທໍາ ແລະ ແກ້ໄຂຄວາມທຸກຍາກຢ່າງສົມເຫດສົມຜົນ.
ທ່ານ ສຸລິໂຍ ວົງດາລາ ອໍານວຍການບໍລິສັດໂລກ້າ (LOCA) ໄດ້ເປີດເຜີຍຫວ່າງບໍ່ດົນມານີ້ວ່າ: ທຸລະກິດໃຫ້ບໍລິການຂົນສົ່ງ ໂດຍສານຜ່ານລະບົບອອນລາຍ ຫລື ແອບຟລິເຄຊັນພວມໄດ້ຮັບຄວາມນິຍົມຢ່າງກວ້າງທົ່ວໂລກ ຍ້ອນຄວາມສະດວກສະບາຍ, ວ່ອງໄວ, ປະຢັດເວລາ, ລາຄາຖືກກວ່າ, ມີຄວາມປອດໄພ, ແລະ ສັ່ງໄດ້ຕາມໃຈທີ່ລູກຄ້າຕ້ອງການ ຂະນະທີ່ບໍລິສັດໂລກ້າ (LOCA) ທຸລະກິດໃຫ້ບໍລິການຂົນສົ່ງໂດຍສານໄຟຟ້າຜ່ານອອນລາຍ ແລະ ຕູ້ສາກໄຟຟ້າພວມໄດ້ຮັບຄວາມນິຍົມແບບກ້າວກະໂດດ ແລະ ມີການຂະຫຍາຍຕົວວ່ອງໄວທີ່ສຸດໃນລາວ ເຊິ່ງມັນພວມໄດ້ຮັບສົນໃຈ ແລະ ເຊື່ອໝັ້ນຈາກຄົນລາວລວມທັງຊາວຕ່າງປະເທດຢ່າງຫລວງຫລາຍ. ປັດຈຸບັນ, ການບໍລິການຂົນສົ່ງໂດຍສານຢູ່ໃນຕົວເມືອງໃຫຍ່ ແມ່ນມີຫລາກຫລາຍຮູບແບບເຊັ່ນ: ລົດເມ, ຕັກຊີ, ຕຸກໆ, ຈໍາໂບ້, ລົດຈັກ ແລະ ອື່ນໆ ເຊິ່ງມີລັກສະນະສະເພາະໃນເປົ້າໝາຍ ລູກຄ້າທີ່ແຕກຕ່າງກັນ. ແນວໃດກໍດີ, ໃນໄລຍະ 6 ປີມານີ້ການບໍລິການຕັກຊີຂອງບໍລິສັດໂລກ້າ (LOCA) ໄດ້ເປັນທາງເລືອກໃໝ່ທີ່ຖືກຍອມຮັບຢ່າງກວ້າງຂວາງໃນສັງຄົມ.
ພ້ອມດຽວກັນນີ້,ທ່ານ ສຸລິໂຍ ວົງດາລາ ຍັງແນມເບິ່ງອະນາຄົດຕໍ່ໜ້າວ່າ: ລົດໄຟຟ້າຈາກຈີນຄືທາງເລືອກທີ່ດີ ແລະ ເໝາະສົມກັບຄົນລາວເຮົາທຸກຊັ້ນຄົນສາມາດເຂົ້າເຖິງໄດ້ຢ່າງສະບາຍດ້ວຍຄຸນນະພາບ ແລະ ລາຄາສົມເຫດ ສົມຜົນ ປັດຈຸບັນນີ້ ລົດໄຟຟ້າໃນລາວມີລວມກັນແລ້ວອາດປະມານ 5.000 ກວ່າຄັນ ແລະ ຈະຮອດ 10.000 ຄັນພາຍໃນປີ 2025, ສະຖານີສາກລົດໄຟຟ້າໂລກ້າຈະມີ 40 ສະຖານີພາຍໃນ 2024 ແລະ ຈະມີ 80 ສະຖານີພາຍໃນປີ 2025 ແລະ 120 ສະຖານີພາຍໃນ ປີ 2026 ເວລານັ້ນ ບໍ່ແມ່ນຜູ້ໃດຜູ້ໜຶ່ງແຕ່ຫາກແມ່ນພວກເຮົາເຈົ້າລະມາຊ່ວຍປະເທດຊາດ ຫລຸດການເພີ່ງພານໍ້າມັນຈາກຕ່າງປະເທດ ແລະ ຈະຊ່ວຍໃຫ້ປະເທດຊາດຈະເລີນຮັ່ງມີເຂັ້ມແຂງ.
ຫວ່າງບໍ່ດົນມານີ້, ທ່ານ ສຸລິໂຍ ວົງດາລາ ໄດ້ຮັບລາງວັນນັກທຸລະກິດດີເດັ່ນຂອງອາຊຽນ (ASEAN Business Award) “ການຮັບລາງວັນຄັ້ງນີ້ເປັນການຢືນຢັນເຖິງຄວາມມຸ່ງໝັ້ນຂອງ LOCA ທີ່ຈະສະໜອງປະສົບການອັນດີເລີດໃຫ້ແກ່ລູກຄ້າ, ພວກເຮົາບໍ່ພຽງແຕ່ເປັນບໍລິສັດທຸລະກິດເທົ່ານັ້ນ, ແຕ່ພວກເຮົາໄດ້ສືບຕໍ່ອຸທິດຕົນເອງເພື່ອຫັນປ່ຽນວິທີການເດີນທາງ ແລະ ການຈ່າຍເງິນຂອງນັກທ່ອງທ່ຽວໃຫ້ມີມາດຕະຖານໃໝ່ຂອງຄວາມຍືນຍົງ ແລະ ມີນະວັດຕະກໍາຢູ່ໃນນັ້ນ.”
ສໍາລັບ LOCA, ຄວາມສໍາເລັດຄັ້ງນີ້ແມ່ນເປັນຫຼາຍກວ່າການຍ້ອງຍໍຊົມເຊີຍ ເພາະ LOCA ໄດ້ສ້າງວຽກເຮັດງານທຳໃຫ້ກັບຜູ້ຄົນຫລາຍກວ່າ 900 ຄົນ, ສ້າງຊີວິດການເປັນຢູ່ທີ່ດີຂຶ້ນໃຫ້ແກ່ຄອບຄົວຄົນລາວຫລາຍຄອບຄົວ. ຍິ່ງໄປກວ່ານັ້ນ, ມີເຖິງ 250 ຄົນທີ່ເປັນຄົນຂັບໂລກ້າດີເດັ່ນ ທີ່ໄດ້ຫັນມາເປັນຍານພາຫະນະໄຟຟ້າ (EVs) ສໍາລັບການບໍລິການແທັກຊີໃນແອັບໂລກ້າ ເຊິ່ງນີ້ໄດ້ສະແດງໃຫ້ເຫັນເຖິງການອຸທິດຕົນຂອງບໍລິສັດເພື່ອສ້າງຄວາມຍືນຍົງທາງດ້ານສິ່ງແວດລ້ອມ. ລົດໄຟຟ້າ EV ເຫລົ່ານີ້ໄດ້ໃຫ້ບໍລິການແທັກຊີໃນແອັບໂລກ້າ ແລະ ໄດ້ສົ່ງລູກຄ້າທັງໝົດລວມ 1,000,000 ກິໂລແມັດ ເປັນຈຸດເລີ່ມຕົ້ນຂອງເສັ້ນທາງໄປສູ່ການສ້າງລະບົບນິເວດການເດີນທາງທີ່ເປັນສີຂຽວ, ມີຄວາມຮັບຜິດຊອບຕໍ່ສັງຄົມ ແລະ ສິ່ງແວດລ້ອມຫລາຍຂຶ້ນ. ໃນດ້ານຂອງການອະນຸລັກສິ່ງແວດລ້ອມ, ໄລຍະທີ່ຜ່ານມາ LOCA ໄດ້ສ້າງໄດ້ຜົນງານທີ່ເປັນທີ່ປະຈັກໄວ້ ດ້ວຍການຫລຸດຜ່ອນການເພິ່ງພານ້ຳມັນໄດ້ຫລາຍກວ່າ 350,000 ລິດ, ຫລຸດຜ່ອນການປ່ອຍອາຍພິດ CO2 ປະມານ 600,000 ກິໂລກຣາມ. ສະຖິຕິເຫລົ່ານີ້ຊີ້ໃຫ້ເຫັນເຖິງການອຸທິດຕົນເອງເພື່ອຮັກສາໂລກຂອງເຮົາໃຫ້ກັບຄົນລຸ້ນຕໍ່ໆໄປ.
ຕໍ່ກັບການພັດທະນາພະລັງງານສະອາດຍືນຍົງໃນຕໍ່ໜ້ານັ້ນ, ທ່ານ ທອງພັດ ອິນທະວົງ ຮອງລັດຖະມົນຕີ ກະຊວງພະລັງງານ ແລະ ບໍ່ແຮ່ (ພບ) ໄດ້ລາຍງານຕໍ່ກອງປະຊຸມສະຫລຸບແຜນພັດທະນາ ພະລັງງານ ແລະ ບໍ່ແຮ່ (ພບ) ປະຈໍາປີ 2022-2023 ຜ່ານມາວ່າ: ການຈັດຕັ້ງປະຕິບັດວຽກຈຸດສຸມຂອງວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກ ດ້ານເສດຖະກິດ-ການເງິນ ໄດ້ມີຫລາຍວຽກຈຸດສຸມ ແລະ ຫຼາຍແຜນງານມີຄວາມຄືບໜ້າ. ໃນນີ້ ກໍແມ່ນວຽກງານຈຸດສຸມທີ 3 ກໍຄື ການນໍາໃຊ້ລົດໄຟຟ້າ (Electric Vehicle, EV) ໃຫ້ຫລາຍຂຶ້ນເພື່ອຫລຸດຜ່ອນການນໍາເຂົ້ານ້ໍາມັນເຊື້ອໄຟທີ່ບໍ່ຈໍາເປັນວ່າ: ພາຍຫລັງທີ່ມີຄວາມຫຍຸ້ງຍາກການນໍາເຂົ້ານໍ້າມັນເຊື້ອໄຟ ແລະ ລາຄານໍ້າມັນແພງຂຶ້ນ ປະຊາຊົນໃນເຂດຊົນນະບົດ ແລະ ຕົວເມືອງໄດ້ຫັນມານໍາໃຊ້ລົດຈັກໄຟຟ້າຫລາຍຂຶ້ນເພື່ອຫລຸດຜ່ອນຄ່າໃຊ້ຈ່າຍພາຍໃນຄອບຄົວ. ໃນປັດຈຸບັນ ສປປ ລາວ ມີລົດໄຟຟ້າທັງໝົດປະມານ 5.000 ກວ່າຄັນ. ໃນນີ້, ລົດໃຫຍ່ ຈໍານວນ 2.000 ກວ່າຄັນ ແລະ ລົດຈັກໄຟຟ້າ 2.000 ກວ່າຄັນ. ສໍາລັບສະຖານີສາກລົດໄຟຟ້າໃນຂອບເຂດທົ່ວປະເທດແມ່ນມີ 40 ກວ່າຈຸດ ແລະ ເຊື່ອວ່າ, ສປປ ລາວ ມີທ່າອ່ຽງນໍາໃຊ້ລົດໄຟຟ້າເພີ່ມຂຶ້ນຢ່າງຫລວງຫລາຍ. ຂະນະທີ່ລັດວິສາຫະກິດໄຟຟ້າລາວ (ຟຟລ) ຍັງກະກຽມຕິດຕັ້ງສະຖານີສາກໄຟໃຫ້ໄດ້ 30 ຈຸດໃນປີ 2024 ໃນຂອບເຂດທົ່ວປະເທດ ແລະ ຮ່ວມກັບຄູ່ຮ່ວມທີ່ມີທ່າແຮງ ເພື່ອດໍາເນີນກິດຈະການອໍານວຍຄວາມສະດວກປິ່ນອ້ອມ ລວມທັງການສ້າງສູນສ້ອມແປງລົດໄຟຟ້າ (ລົດຈັກ-ລົດໃຫຍ່) ເພື່ອຮອງຮັບ ແລະ ສ້າງຄວາມເຊື່ອໝັ້ນໃຫ້ຜູ້ຊົມໃຊ້ຫລາຍຂຶ້ນ.
ໂດຍ:ເກີດຂວັນໃຈ ມາລີຈັນສີ
