ຂປລ.ວິທະຍຸ ກະຈາຍສຽງ ຫວຽດນາມ, ໃນຂອບເຂດ ສັບປະດາ ສຸດຍອດ ເວທີປາໄສ ການຮ່ວມມື ເສດຖະກິດ ອາຊີ - ປາຊີຟິກ (APEC) 2024 ຈັດຂຶ້ນຢູ່ ນະຄອນຫລວງ ລີມາ ຂອງ ເປຣູ, ກອງປະຊຸມ ສຸດຍອດ ວິສາຫະກິດ APEC 2024 ພາຍໃຕ້ຫົວຂໍ້ “ມະນຸດ, ວິສາຫະກິດ, ວັດທະນາຖາວອນ” ໄດ້ຈັດຂຶ້ນ ໃນວັນທີ 14 ພະຈິກ. ໃນໂອກາດ ນີ້ ທ່ານ ເລືອງ ເກື່ອງ, ປະທານ ປະເທດ ຫວຽດນາມ ໄດ້ຂຶ້ນກ່າວປາໄສ ສຳຄັນວ່າ: ສສ ຫວຽດນາມ ສະໜັບ ສະໜູນ ລະບົບການຄ້າ ຫລາຍຝ່າຍ ແລະ ບົດບາດໃຈກາງ ຂອງອົງການ ການຄ້າໂລກ; ສສ ຫວຽດນາມ ຈະເຂົ້າຮ່ວມ ຢ່າງມີຄວາມຮັບຜິດຊອບ ແລະ ປະກອບສ່ວນ ຢ່າງຕັ້ງໜ້າ ເຂົ້າໃນພື້ນຖານ ການເມືອງໂລກ, ເສດຖະກິດທົ່ວໂລກ ແລະ ຄວາມສີວິໄລ ຂອງມວນມະນຸດ, ບົນຈິດໃຈ ເປັນເພື່ອນມິດ, ເປັນຄູ່ຮ່ວມມື ທີ່ມີຄວາມໄວ້ເນື້ອເຊື່ອໃຈ ແລະ ເປັນສະມາຊິກ ທີ່ຕັ້ງໜ້າ, ມີຄວາມຮັບຜິດຊອບໃຈ ປະຊາຄົມສາກົນ. ພ້ອມທັງ ໄດ້ຊີ້ແຈ້ງ ບັນດາຜົນປະໂຫຍດ ສຳຄັນ ຂອງເສດຖະກິດ ຫວຽດນາມ. ພ້ອມກັນນັ້ນ, ສສ ຫວຽດນາມ ກໍ່ມີຕະຫລາດໃຫຍ່, ມີຄວາມສາມາດ ບົ່ມຊ້ອນ ຫລາຍຢ່າງ; ແມ່ນແຫ່ງສະດວກໃຫ້ແກ່ ວິວັດທະນາການ ຫັນປ່ຽນ ລະບົບ ສະໜອງ ຢູ່ພາກພື້ນ. ທ່ານ ເລືອງເກື່ອງ ໄດ້ກ່າວເນັ້ນໜັກຕື່ມວ່າ: ບັນດາຜົນສຳເລັດ ອັນໃຫຍ່ຫລວງ ເຊິ່ງເສດຖະກິດ ຫວຽດນາມ ບັນລຸໄດ້ ກໍຍ້ອນ ມີການປະກອບສ່ວນສຳຄັນ ທີ່ບັນດາວິສາຫະກິດ ແລະ ນັກລົງທຶນສາກົນ ມີຄວາມເຊື່ອໝັ້ນ ຕໍ່ປະເທດ ຫວຽດນາມ ແລະ ຈະສືບຕໍ່ ຮ່ວມເດີນທາງພ້ອມກັບ ຫວຽດນາມ ໃນໄລຍະທາງ ທີ່ຈະມາເຖິງ. ຂະນະທີ່, ການພັດທະນາ ຢ່າງແຮງຂອງ ສສ ຫວຽດນາມ ຈະເປິດໂອກາດໃໝ່ຫລາຍຢ່າງ ໃຫ້ແກ່ ບັນດາວິສາຫະກິດ ຢູ່ພາຍໃນປະເທດ ແລະ ສາກົນ ໃນບັນດາ ຂົງເຂດຄື: ການຄ້າ, ອຸດສາຫະກຳ, ກະສິກຳ, ການທ່ອງທ່ຽວ, ບັນດາຂະແໜງ ເຕັກໂນໂລຊີສູງ./.

(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ

KPL