ຂປລ. ທະນາຄານ​ພັດທະນາ​ລາວ  ກຽມ​ເປີດ​ນຳ​ໃຊ້​ແອັບ​ໃໝ່​ LDB Trust  ທີ່​ເພີ່ມ​ຄວາມ​ສະດວກສະບາຍ​,  ງ່າຍ ແລະ ວ່ອງໄວກວ່າ​ເກົ່າ  ໃຫ້ແກ່ລູກຄ້າ ​ແລະ ຜູ້​ໃຊ້​ບໍລິການ,  ທ່ານ ອາຄົມ ປຣະ​ເສີດ ຜູ້ອຳນວຍການ  ທະນາຄານ​ພັດທະນາ​ລາວ ​ໄດ້​ໃຫ້​ສຳພາດ​​  ຕໍ່​ນັກ​ຂ່າວໃນ​ພິທີ​​ເປີດ​ງານ​ວາງສະ​ແດງ​ຜົນງານ  ຂອງທະນາຄານ​ແຫ່ງ ສປປ ລາວ ຄົບຮອບ 50 ປີ  ​ທີ່ຫໍ​ປະຊຸມ​ແຫ່ງ​ຊາດ ໃນ​ວັນ​ທີ 4 ຕຸລາ 2018 ຜ່ານ​ມາ​.

ທ່ານ ອາຄົມ ປຣະ​ເສີດ ​ກ່າວ​ວ່າ: ​ແອັບ LDB Trust  ມີ​ຄວາມ​ປອດ​ໄພສູງ ​ໄດ້​ຮັບ​ມາດຕະຖານ​ຈາກ​ສາກົນ  ​ແລະ ​​ ເປັນຜະລິດຕະພັນໃໝ່ທີ່​ປັບປຸງ​ມາ​ຈາກ  ​ແອັບ mobile banking  ແລະ ​ໄດ້​ທົດ​ລອງ​ນຳ​ໃຊ້​ມາ​ແຕ່​ຕົ້ນ​ເດືອນ​ກັນຍາ  2018 ຜ່ານ​ມາ,  ​ເຊິ່ງ​ຈະ​ເປີດ​ນຳ​ໃຊ້​ຢ່າງ​ເປັນ​ທາງ​ການ ​ໃນ​ທ້າຍ​ເດືອນ​ຕຸລາ 2018 ທີ່​ຈະ​ມາ ​ເຖິງ​ນີ້. ນອກຈາກ​ນີ້,  ​ແອັບ​ດັ່ງກ່າວ ​ພວກ​ເຮົາ​ໄດ້​ເພີ່ມ​ຄິວ​ອາ​ໂຄດ  ​ເຂົ້າ​ຕື່ມ​ເພື່ອ​ສ້າງ​ຄວາມ​ສະດວກ​ ​ ໃຫ້​ແກ່​ລູກ​ຄ້າ ​ແລະ ຜູ້​ໃຊ້​ບໍລິການ  ສາມາດ​ນຳ​ໃຊ້​ງ່າຍ​ຂຶ້ນ,  ສະດວກ ​ແລະ ​ໄວ​ຂຶ້ນ​ກວ່າ​ເກົ່າ,  ​ເຊິ່ງພວກ​ເຮົາ​ກໍ​ໄດ້​ໃຊ້​ຄວາມ​ພະຍາຍາມ​  ພັດທະນາ​ຜະລິດ​ຕະພັນ  ການ​ຊຳລະ​ສະ​ສາງ​ທີ່​ທັນ​ສະ​ໄໝ ​ ເພື່ອ​ສ້າງ​ຄວາມ​ສະດວກ​ໃຫ້​ແກ່​ລູກ​ຄ້າ​ທີ່​ມາ​ບໍລິການ  ຂອງ​ທະນາຄາ​ນພັດທະນາລາວ ​ເປັນ​ຕົ້ນ  ເຮັດໃຫ້ຫລຸດຄ່າໃຊ້ຈ່າຍ, ບໍ່ເສຍເວລາ ໃນການເດີນທາງໄປຫາທະນາຄານ,  ເຮັດທຸລະກໍາທາງການເງິນໄດ້ ເຊັ່ນ:  ການກວດສອບການເຄື່ອນໄຫວບັນຊີກວດຍອດເງິນເຫລືອ  (ໂອນເງິນໄປຊໍາລະຄ່າໂທລະສັບ,  ນໍ້າປະປາ,ໄຟຟ້າ ແລະ ຄ່າສິນຄ້າຕ່າງໆໄດ້ຢ່າງສະບາຍ).

​ໃນໄລຍະທີ່ຜ່ານມາ  ທະນາຄານພັດທະນາລາວ  ໄດ້ມີການປັບປ່ຽນ ແລະ ພັດທະນາລະບົບຂໍ້ມູນຂ່າວສານ  ຈາກການນໍາໃຊ້ລະບົບ BANK 2000 ທີ່ນໍາໃຊ້ມາແຕ່ປີ 2003  ມາເປັນລະບົບ CORE BANKING ທີ່ເອີ້ນວ່າ:  T 24 ໃນວັນທີ 01/03/2010.  ປັດຈຸບັນແມ່ນໄດ້ Online ຢູ່ທົ່ວລະບົບ.  ໄດ້ເປີດນໍາໃຊ້ການດໍາເນີນທຸລະກໍາ ທາງດ້ານການເງິນຜ່ານລະບົບຕູ້ ATM  ແລະ ເປັນທະນາຄານແຫ່ງທໍາອິດ ທີ່ນໍາໃຊ້ລະບົບ  Mobile Banking ໃນຮູບແບບ M-Commerce  ຢ່າງເຕັມຮູບແບບ.

ທ່ານ​ ອາຄົມ ປຣະ​ເສີດ ກ່າວ​ຕື່ມ​ວ່າ:  ໃນ​ອະນາ​ຄົດ​ອັນ​ໃກ້​ນີ້ ​​ທະນາຄານພັດທະນາ​ລາວ​ ຈະ​ໄດ້​ຮ່ວມ​ກັບ​ບັນດາ​ທະນາຄານ​ທຸລະ​ກິດ​  ​ແລະ ທະນາຄານ​ແຫ່ງ ສປປ ລາວ  ​ເພື່ອ​ຮ່ວມ​ກັນ​ພັດທະນາລະບົບການ​ທະນາຄານ​  ​ໂດຍ​ນຳ​ໃຊ້​ເຕັກ​ໂນ​ໂລ​ຊີທີ່​ທັນ​ສະ​ໄໝ  ​​ເປັນ​ຕົ້ນສາມາດ​ໂອນ​ເງິນ​ຂ້າມ​ທະນາຄານ​  ​ແລະ ​ໂອນ​ຜ່ານ​ທາງ​ໂທລະສັບ​ມື​ຖືໄດ້  ການ​ບໍລິການ​ດັ່ງກ່າວ​,  ​ກໍ​ເພື່ອ​ສ້າງ​ຄວາມ​ສະດວກ​ໃຫ້​ແກ່​ຜູ້​ທີ່​ໃຊ້​ບໍລິການ,  ​ປັດຈຸ​ບັນ​ ບັນດາທະນາຄານ​ ຢູ່ ສປປ ລາວ  ມີ​ພຽງ​ແຕ່ສາມາດ​ຖອນ​ເງິນ​ຈາກ​ຕູ້​ເອທີ​ເອັມນຳ​ກັນ​ເທົ່າ​ນັ້ນ.  ຂ່າວ-ພາບ: ມະນີ​ທອນ

KPL