ຂປລ. ຫລາຍຄົນມັກຄິດວ່າ ຫລັງຈາກພົ້ນອາຍຸການ ຫລື ບຳນານແລ້ວ ແມ່ນຊ່ວງເວລາແຫ່ງການພັກຜ່ອນຢູ່ເຮືອນຊື່ໆ,  ແຕ່ສຳລັບ ທ່ານ ໄຊຍະແສງ ອິນທະວົງສາ ຢູ່ບ້ານໂມ, ເມືອງລະມາມ, ແຂວງເຊກອງ ກັບເລືອກເສັ້ນທາງທີ່ແຕກຕ່າງ ປ່ຽນມືຈັບປາກກາ ມາຈັບຈົກຈັບຊ້ວມບຸກເບີກເນື້ອທີ່ຂຸດໜອງລ້ຽງປາ ຈົນກາຍເປັນ "ຄອບ ຄົວຕົວແບບ" ທີ່ສ້າງລາຍຮັບເນັ້ນໆ ເຖິງ 272 ລ້ານກີບຕໍ່ປີ!

ທ່ານ ໄຊຍະແສງ ອິນທະວົງສາ ເລົ່າສູ່ຟັງວ່າ: ຈາກທຶນ 5 ລ້ານ ສູ່ອານາຈັກກະສິກຳວົງຈອນປິດ ເສັ້ນທາງສາຍເສດຖະກິດນີ້ ບໍ່ໄດ້ມາແບບສຸ່ມ. ຫລັງຈາກຮັບເງິນບຳນານແລ້ວ, ມາໃນປີ 2007 ດ້ວຍຄວາມມັກຮັກໃນການກະສິກຳ ບວກກັບຄວາມດຸໝັ່ນອົດທົນ ຄອບຄົວໄດ້ເລີ່ມຕົ້ນລົງທຶນພຽງ 5 ລ້ານກີບ ໃນເນື້ອທີ່ 2 ເຮັກຕາ, ສ້າງ 8 ໜອງປາ. ຈາກຈຸດເລີ່ມຕົ້ນອັນນ້ອຍໆ ທຸລະກິດຄ່ອຍໆຂະຫຍາຍຕົວໂດຍມີຈຸດປ່ຽນຄັ້ງສຳຄັນເກີດຂຶ້ນໃນປີ 2010 ເມື່ອໄດ້ຮັບການສະໜັບສະໜູນຈາກພັກ-ລັດ ແລະ ໂຄງການ ADB ລວມທັງທຶນກູ້ຢືມຈາກທະນາຄານນະໂຍບາຍ ເຮັດໃຫ້ທຸລະກິດເຕີບໃຫຍ່ຂະຫຍາຍຕົວຂຶ້ນຢ່າງກ້າວກະໂດດ. ສຳລັບປາທີ່ລ້ຽງ ກໍມີປາຫລາກຫລາຍຊະນິດ. ໃນນັ້ນ, ລ້ຽງທັງປາດຸກ, ປານິນ, ປາປາກ ແລະ ປາເຂັງ. ຂະນະທີ່ລ້ຽງສັດ ແລະ ເຮັດທຸລະກິດເສີມນັ້ນ, ຄອບຄົວບໍ່ພຽງແຕ່ລ້ຽງປາ ຍັງລ້ຽງໄກ່ລາດ, ໝູລາດ ແລະ ເປີດຮ້ານອາຫານຢູ່ແຄມໜອງປາຕື່ມອີກ. ຕົວເລກທີ່ໜ້າຕົກໃຈ ປັດຈຸບັນສາມາດສ້າງຍອດຂາຍລວມທັງໝົດ 912 ລ້ານກີບຕໍ່ປີ, ເມື່ອຫັກຕົ້ນທຶນແລ້ວ ເຫລືອຜົນກຳໄລເນັ້ນໆ 272 ລ້ານກີບ/ປີ ບວກກັບລາຍຮັບຈາກຮ້ານອາຫານອີກ 54 ລ້ານກີບ/ປີ. ບົດຮຽນຈາກຄວາມສຳເລັດ ບໍ່ມີຄວາມສຳເລັດໃດໄດ້ມາໂດຍບໍ່ລົງເຫື່ອລົງແຮງ. ເຖິງວ່າຜົນກຳໄລຈະງົດງາມ, ແຕ່ເບື້ອງຫລັງຄວາມສຳເລັດແມ່ນເຕັມໄປດ້ວຍສິ່ງທ້າທາຍ.

ທ່ານ ໄຊຍະແສງ ກ່າວຕື່ມວ່າ: ການລ້ຽງປາຂະໜາດໃຫຍ່ຕ້ອງໃຊ້ທຶນສູງ ເພາະຫົວອາຫານ ແລະ ແນວພັນຕ້ອງນຳເຂົ້າຈາກຕ່າງແຂວງ. ນອກຈາກນີ້, ການຄວບຄຸມລະບົບນ້ຳ ແລະ ການບຳລຸງວິຕາມິນ ຕາມອາຍຸຂອງປາກໍຕ້ອງເອົາໃຈໃສ່ຢ່າງໃກ້ຊິດ ໂດຍອາໄສແຮງງານໃນຄອບຄົວ 6 ຄົນ ແລະ ຈ້າງເພີ່ມອີກ 1 ຄົນ ເພື່ອຊ່ວຍວຽກ. ແນວໃດກໍຕາມ, ດ້ວຍຄວາມພາກພຽນ, ຄວາມດຸໝັ່ນ ແລະ ການຮູ້ຈັກຕໍ່ຍອດອາຊີບ, ປັດຈຸບັນຄອບຄົວ ໄຊຍະແສງ ອິນທະວົງສາ  ບໍ່ໄດ້ມີພຽງແຕ່ ມີຢູ່ມີກິນ,​ມີຊັບສິນ ແລະ ຖານະຄວາມເປັນຢູ່ດີຂຶ້ນ, ດ້ວຍຜົນງານດັ່ງກ່າວ ຄອບຄົວ ໄຊຍະແສງ ໄດ້ໃບຢັ້ງຢືນຄອບ ຄົວຕົວແບບຈາກເມືອງ ແລະ ແຂວງ. ນອກຈາກນີ້, ຍັງສາມາດຊື້ລົດໃຫຍ່ 2 ຄັນ ແລະ ລົດຈັກ 3 ຄັນ, ສ້າງເຮືອນຢູ່ເຮືອນຖາວອນ 2 ຫລັງ, ດິນປຸກສ້າງ 2 ຕອນ ແລະ ດິນກະສິກຳ 1 ຕອນ.

ເສັ້ນທາງຈາກທຶນເລີ່ມຕົ້ນພຽງ 5 ລ້ານກີບ ສູ່ການສ້າງລາຍຮັບຫລາຍຮ້ອຍລ້ານກີບຕໍ່ປີ ອັນສະແດງໃຫ້ເຫັນເຖິງບົດບາດຂອງຄວາມດຸໝ່ັ່ນ, ການຮູ້ຈັກວາງແຜນ, ການຕໍ່ຍອດອາຊີບ ແລະ ການນຳໃຊ້ໂອກາດຈາກແຫລ່ງສະໜັບສະໜູນຕ່າງໆ ເພື່ອພັດທະນາອາຊີບ ແລະ ສ້າງຖານະຄວາມເປັນຢູ່ໃຫ້ດີຂຶ້ນເລື້ອຍໆ.

KPL