KPL
ກອງປະຊຸມປຶກສາຫາລື ແລະ ປະກອບຄຳເຫັນໃສ່ຮ່າງແຜນຍຸດທະສາດພັດທະນາລະບົບສະຖິຕິແຫ່ງຊາດ 2026-2035 ແລະ ວິໄສທັດຮອດປີ 2040 ຈັດຂຶ້ນໃນວັນທີ 8 ກັນຍາ 2026 ໂດຍການເປັນປະທານຂອງ ທ່ານ ນາງ ເພັດສະໝອນ ສອນ ຮອງລັດຖະມົນຕີກະຊວງການເງິນ, ຜູ້ຊີ້ນຳວຽກງານສູນສະຖິຕິແຫ່ງຊາດ, ມີຮອງຫົວໜ້າສູນສະຖິຕິແຫ່ງຊາດ ພ້ອມດ້ວຍຄະນະກົມ, ຄະນະພະແນກ ແລະ ພະນັກງານວິຊາການພາຍໃນສູນສະຖິຕິແຫ່ງຊາດ ເຂົ້າຮ່ວມ.
ທ່ານ ນາງ ເພັດສະໝອນ ສອນ ໄດ້ກ່າວວ່າ: ລະບົບສະຖິຕິແຫ່ງຊາດ ມີບົດບາດເປັນເສົາຄ້ຳສຳຄັນ ໃນການສະໜອງຂໍ້ມູນສະຖິຕິທີ່ຖືກຕ້ອງ, ຄົບຖ້ວນ, ຊັດເຈນ ແລະ ເຊື່ອຖືໄດ້ ເພື່ອເປັນບ່ອນອີງໃຫ້ແກ່ການວາງແຜນພັດທະນາເສດຖະກິດ-ສັງຄົມແຫ່ງຊາດ, ການຕິດຕາມ ແລະ ຕີລາຄາຜົນໄດ້ຮັບໃນແຕ່ລະໄລຍະ ຊຶ່ງການຮ່ວມມືຄົ້ນຄວ້າຢ່າງເລິກເຊິ່ງຄັ້ງນີ້ ຈະຊ່ວຍໃຫ້ແຜນຍຸດທະສາດ ມີລັກສະນະວິທະຍາສາດ, ສອດຄ່ອງກັບສະພາບຄວາມເປັນຈິງ ແລະ ເຊື່ອມໂຍງກັບສາກົນ ໂດຍສະເພາະຄົ້ນຄວ້າ 3 ເນື້ອໃນຕົ້ນຕໍ ຄື: ພິຈາລະນາເນື້ອໃນຮ່າງຍຸດທະສາດ ໂດຍການປຶກສາຫາລື ແລະ ປະກອບຄຳເຫັນໃສ່ຮ່າງແຜນຍຸດທະສາດພັດທະນາລະບົບສະຖິຕິແຫ່ງຊາດ 2026-2035 ແລະ ວິໄສທັດຮອດປີ 2040 ໃຫ້ມີຄວາມຮັດກຸມ ແລະ ຄົບຖ້ວນສົມບູນ; ສ້າງແຜນດຳເນີນງານ ຊຶ່ງກຳນົດທິດທາງ ແລະ ແຜນງານທີ່ຊັດເຈນ ເພື່ອຈັດຕັ້ງປະຕິບັດການປັບປຸງແຜນຍຸດທະສາດໃຫ້ມີຜົນສຳເລັດ; ກຳນົດແຜນງົບປະມານ ໂດຍການວາງແຜນດ້ານງົບປະມານໃຫ້ສອດຄ່ອງ ເພື່ອຮັບປະກັນຄວາມເປັນໄປໄດ້ໃນການຈັດຕັ້ງປະຕິບັດບັນດາກິດຈະກຳຕ່າງໆ ໃຫ້ບັນລຸຕາມຄາດໝາຍທີ່ວາງໄວ້.
ໂອກາດນີ້, ທ່ານ ນາງ ເພັດສະໝອນ ສອນ ໄດ້ຮຽກຮ້ອງໃຫ້ຜູ້ເຂົ້າຮ່ວມ ເພີ່ມທະວີຄວາມຮັບຜິດຊອບ, ເປັນເຈົ້າການ ໃນການປຶກສາຫາລືຢ່າງກົງໄປກົງມາ ແລະ ປະກອບຄຳເຫັນ ເພື່ອເຮັດໃຫ້ຮ່າງແຜນຍຸດທະສາດສະບັບນີ້ມີຄວາມສົມບູນ ແລະ ສາມາດນຳໄປຈັດຕັ້ງປະຕິບັດໃຫ້ເກີດຜົນເປັນຈິງຢ່າງມີປະສິດທິພາບສູງສຸດ.
KPL
