KPL
ຂປລ. ກະຊວງການເງິນ ແຫ່ງ ສປປ ລາວ ກໍຄື ກົມສ່ວຍສາອາກອນ ໄດ້ເປັນເຈົ້າພາບຈັດກອງປະຊຸມ ວຽກງານສ່ວຍສາອາກອນອາຊຽນ (WG-AFT) ຄັ້ງທີ 19 ແລະ ກອງປະຊຸມວຽກງານ ອາກອນຊົມໃຊ້ອາຊຽນ (SF-ET) ຄັ້ງທີ 16 ລະຫວ່າງວັນທີ 14-16 ຕຸລາ 2024 ຢູ່ແຂວງຫລວງພະບາງ ສປປ ລາວ
ຂປລ. ກະຊວງການເງິນ ແຫ່ງ ສປປ ລາວ ກໍຄື ກົມສ່ວຍສາອາກອນ ໄດ້ເປັນເຈົ້າພາບຈັດກອງປະຊຸມ ວຽກງານສ່ວຍສາອາກອນອາຊຽນ (WG-AFT) ຄັ້ງທີ 19 ແລະ ກອງປະຊຸມວຽກງານ ອາກອນຊົມໃຊ້ອາຊຽນ (SF-ET) ຄັ້ງທີ 16 ລະຫວ່າງວັນທີ 14-16 ຕຸລາ 2024 ຢູ່ແຂວງຫລວງພະບາງ ສປປ ລາວ ໂດຍການເປັນປະທານກ່າວເປີດຂອງ ທ່ານ ບຸນປະເສີດ ສີກຸນລະບຸດ ຫົວໜ້າກົມສ່ວຍສາອາກອນກະຊວງການເງິນ, ມີ ທ່ານ ສາຍມະໂນລິນ ສິນບັນດິດ ຮອງຫົວໜ້າກົມສ່ວຍສາອາກອນ, ມີຄະ ນະຜູ້ແທນບັນດາປະເທດສະມາຊິກອາຊຽນ, ກອງເລຂາອາຊຽນ, ອົງການ OECD, ADB, WHO ເຂົ້າຮ່ວມ.
ກອງປະຊຸມຄັ້ງນີ້, ເປັນຂີດໝາຍທີ່ສໍາຄັນຂອງ ບັນດາປະເທດສະມາຊິກອາຊຽນ ໂດຍສະເພາະຜູ້ຊ່ຽວຊານ ວຽກງານສ່ວຍສາອາກອນ ໄດ້ແລກປ່ຽນດ້ານການແຂ່ງຂັນ ວຽກສ່ວຍສາອາກອນ, ນະໂຍບາຍດ້ານວຽກງານສ່ວຍສາອາກອນ ພາຍຫລັງການຈັດຕັ້ງປະຕິບັດເສົາຄໍ້າທີ່ສອງ, ການຄຸ້ມຄອງການຈັດເກັບລາຍຮັບ ອາກອນແບບດີຈິຕອນ ແລະ ປັນຍາປະດິດ(AI), ຄວາມຄືບໜ້າໃນການປັບປຸງສົນທິສັນ ຍາສ່ວຍສາອາກອນ DTA ໃນອາຊຽນ, ອາກອນຫັກໄວ້ຈ່າຍ, ການຄຸ້ມຄອງອາກອນມູນຄ່າເພີ່ມ ໃນການສະໜອງສິນຄ້າ, ການບໍລິການລະຫວ່າງປະເທດ, ລວມທັງທິດທາງ ແຜນການໃນຕໍ່ໜ້າ ກ່ຽວກັບນະໂຍບາຍທາງກົງ ດ້ານສ່ວຍສາອາກອນ ໃນຂົງເຂດອາຊຽນ, ພ້ອມທັງໄດ້ທົບທວນຄືນບຸລິມະສິດປະຈຳປີ 2024 ຂອງກອງປະຊຸມ AFT ແລະ SF-ET ອີກດ້ວຍ.
ພ້ອມກັນນີ້, ບັນດາຜູ້ແທນກອງປະຊຸມໄດ້ປະສາຫາລື, ແລກປ່ຽນບາງບັນຫາກ່ຽວກັບ ຄວາມຄືບໜ້າຂອງ ບັນດາກອງປະຊຸມລະດັບສູງ ທີ່ຕິດພັນກັບປະຊາຄົມ ເສດຖະກິດອາຊຽນ ຫລັງປີ 2025, ແຜນຍຸດທະສາດປະຊາຄົມ ເສດຖະກິດອາຊຽນແຕ່ປີ 2026-2030 ແລະ ບັນດາບັນຫາປິ່ນອ້ອມ ຈາກກອງປະຊຸມລະດັບສູງ, ການຈັດຕັ້ງປະຕິບັດກົນໄກ ນະໂຍບາຍທາງດ້ານສ່ວຍສາອາກອນ, ຜົນກະທົບການລົງທຶນ ໂດຍກົງຈາກຕ່າງປະເທດ (FDI) ແລະ ບົດບາດຂອງຂະແໜງສ່ວຍສາອາກອນ ຂອງແຕ່ລະປະເທດ ທີ່ຈະຕ້ອງປະຕິບັດໃນການແຂ່ງຂັນ ພາຍຫລັງນໍາໃຊ້ເສົາຄໍ້າທີສອງ.
ນອກນີ້, ຍັງໄດ້ສົນທະນາແລກປ່ຽນ ບົດຮຽນກ່ຽວກັບສົນທິສັນຍາ, ນະໂຍບາຍອາກອນ, ການອອກໃບແຈ້ງໜີ້, ການປະຕິບັດພັນທະອາກອນ ຫັກໄວ້ຢູ່ບ່ອນຈ່າຍ, ການເກັບອາກອນຊັບສິນຄຣິບໂຕ crypto, ການຄຸ້ມຄອງອາກອນດິຈິຕອນ. ທັງນີ້, ກໍເພື່ອແນໃສ່ສ້າງລະບົບຂະແໜງ ສ່ວຍສາອາກອນອາຊຽນ ໃຫ້ມີຄວາມເປັນອັນໜຶ່ງອັນດຽວ ແລະ ສະເໝີພາບຢ່າງມີ ປະສິດທິພາບປະສິດທິຜົນສູງຂຶ້ນ. ທັງເປັນການເສີມຂະຫຍາຍ ສ້າງສາຍພົວພັນ, ທີ່ເປັນພື້ນຖານໃຫ້ແກ່ການຮ່ວມມື ປະສານສົມທົບກັນໃນອະນາຄົດ, ເພື່ອກໍານົດທິດທາງເພື່ອກ້າວໄປ ສູ່ການຄຸ້ມຄອງສ່ວຍ ສາອາກອນ ທີ່ສະເໝີພາບ, ມີປະສິດທິພາບ ແລະ ຍືນຍົງຍິ່ງຂຶ້ນ ເພື່ອກ້າວເຂົ້າສູ່ການເຊື່ອມຈອດ ແລະ ມີຄວາມເຂັ້ມແຂງຍິ່ງຂຶ້ນ ໃນຂົງເຂດອາຊຽນ ແລະ ພາກພື້ນສາກົນ.
KPL
