KPL
ດັ່ງທີ່ຮູ້ນໍາກັນພວກເຮົາມາເຮັດທຸລະກິດຢູ່ທີ່ນີ້ ເພື່ອຕັ້ງໃຈປະກອບສວນເຂົ້າໃນການພັດທະນາເສດຖະກິດ-ສັງຄົມລາວ.
...ຕໍ່ຈາກສະບັບກ່ອນ... ດັ່ງທີ່ຮູ້ນໍາກັນພວກເຮົາມາເຮັດທຸລະກິດຢູ່ທີ່ນີ້ ເພື່ອຕັ້ງໃຈປະກອບສວນເຂົ້າໃນການພັດທະນາເສດຖະກິດ-ສັງຄົມລາວ, ສ້າງວຽກເຮັດງານທໍາໃຫ້ຄົນລາວ, ສ້າງໂອກາດດີເຮັດໃຫ້ຄົນລາວໄດ້ເຂົ້າ ເຖິງການສຶກສາ, ສ້າງທັກສະວິຊາອາຊີບໃຫ້ຄົນລາວມີຄວາມຊໍານິຊໍານານ ແລະ ອື່ນໆ ເພື່ອສ້າງຄວາມເຂັ້ມແຂງທີ່ຍືນຍົງ.
ຜ່ານມາເຖິງແມ່ນວ່າມີຂ່າວເສດຖະກິດຂອງລາວພົບບັນຫາຫຍຸ້ງຍາກເງິນເຟີ້ ແລະ ຄ່າຄອງຊີບແພງແຕ່ພວກເຮົາເຊື່ອໝັ້ນວ່າເສດຖະກິດຂອງລາວຍັງມີທ່າແຮງບົ່ມຊ້ອນສູງ ແລະ ຈະຟື້ນຕົວຢ່າງວ່ອງໄວ ແຕ່ສິ່ງສຳຄັນຄົນລາວມີຈິດໃຈດີງາມເອື້ອເຜື້ອເພື່ອແຜ່, ມີນ້ຳໃຈອົດທົນ ແລະ ຍີ້ມແຍ້ມແຈມໃສດີຍົກຕົວຢ່າງນ້ອຍໆມີພະນັກງານເປັນຄົນລາວທີ່ເຂົ້າມາເຮັດວຽກຢູ່ຮ້ານສະດວກຊື້ 7-Eleven ຕາມສາຂາຕ່າງໆ ເຊິ່ງເຂົາເຈົ້າມີຄວາມເອົາໃຈໃສ່ ຫ້າວ ຫັນ ເຊື່ອຟັງ ແລະ ອົດທົນຫລາຍ, ສ່ວນຜູ້ໄດ້ຮັບທຶນການສຶກສາມາຮຽນຢູ່ໄທກໍລ້ວນແຕ່ເປັນຄົນມີຄວາມຕັ້ງໃຈຮໍ່າຮຽນ,ຮຽນດີຮຽນເກ່ັງຈົນກາຍເປັນນັກຮຽນໄດ້ຮັບກຽດນິຍົມອັນດັບທີ 1 ຢູ່ສະຖານບນັ້ນ, ລອງວາດພາບເບິ່ງວ່າມີນັກຮຽນຫລາຍພັນຄົນຈາກຕ່າງປະເທດມາຮຽນທີ່ນີ້, ບໍ່ແມ່ນເລື່ອງງ່າຍ ແຕ່ນັກຮຽນຈາກລາວຍາດໄດ້ນັກຮຽນດີຮຽນເກັ່ງ ຖືວ່າສຸດຍອດແລ້ວ. ປັດຈຸບັນນີ້, ຮ້ານສະດວກ 7-Eleven ເປັນສ່ວນໜຶ່ງທຸລະກິດຂອງພວກເຮົາກຳລັງດໍາເນີນຢູ່ ສປປ ລາວ ເຊິ່ງເຕີບໃຫຍ່ຂະຫຍາຍຕົວດ້ວຍຄຸນນະພາບ ແລະ ຄວາມເຊື່ອໝັ້ນສູງພໍສົມຄວນຈາກຈຸດເລີ່ມຕົ້ນພຽງ 1 ສາຂາແລ້ວ ສືບຕໍ່ຂະຫຍາຍຂຶ້ນຕື່ມ ເຖິງ 6-7 ຮ້ານ ຫລື ສາຂາ ແລະ ຈະສືບຕໍ່ຂະຫຍາຍໄປບັນດາແຂວງຕ່າງໆ ທີ່ມີທ່າແຮງບົ່ມຊ້ອນເພື່ອຮັບປະກັນວ່າປະຊາຊົນລາວບັນດາເຜົ່າ, ນັກທ່ອງທ່ຽວພາຍໃນ ແລະ ຕ່າງປະເທດຈະໄດ້ຮັບໂອກາດການເຂົ້າເຖິງສິນຄ້າທີ່ມີຄຸນນະພາບສູງມາດຕະຖານສາກົນ ແລະ ຄາລາສົມເຫດສົມຜົນ.
ດ້ວຍເຫດນັ້ນພວກເຮົາກໍ ມີຄວາມຈໍາເປັນຕ້ອງຜະລິດ ແລະ ສ້າງບຸກຄະລາກອນທີ່ມີຄຸນນະພາບໄປຄວບຄວບຄູ່ກັນ ເພື່ອຮອງຮັບການຂະຫຍາຍຕົວຢ່າງມີໄລຍະສໍາຄັນ. ໃນອະນາຄົດ ສປປ ລາວ ມີເສັ້ນທາງລົດໄຟລາວ-ຈີນ, ມີຂົວຂ້າມແມ່ນ້ຳຂອງຫລາຍແຫ່ງ, ມີເສັ້ນທາງສາຍການບິນຫລາຍສາຍ ແລະ ມີການລົງທຶນກັບສາກົນ ເພີ່ມຂຶ້ນເລື້ອຍໆນັ້ນ ຈະຊ່ວຍສ້າງໂອກາດດີຢ່າງແນ່ນອນ ແລະ ເສດຖະກິດຂອງລາວຈະຄ່ອຍໆເຂັ້ມແຂງ.
ໂດຍ: ເກີດຂວັນໃຈ ມາລີຈັນສີ
KPL
