KPL
ສຳນັກງານ ພາສີ ຂອງ ເນປານ ລາຍງານວ່າ: ມູນຄ່າ ການຄ້າຊາຍແດນ ລະຫວ່າງ ເນປານ ແລະ ສປຈີນ ເພີ່ມຂຶ້ນ ຫລາຍກວ່າ 2 ເທົ່າ ໃນໄລຍະ 11 ເດືອນທຳອິດ ຂອງ ສົກປີ ງົບປະມານ ປັດຈຸບັນ, ຊຶ່ງຈະສິ້ນສຸດ ກາງເດືອນ ກໍລະກົດນີ້ ບັນລຸ 9,42 ໝື່ນລ້ານຣູປີ ເນປານ
ຂປລ. ສຳນັກຂ່າວ ຊິນຮວາ ຂອງ ສປຈີນ, ເມື່ອບໍ່ດົນມານີ້, ສຳນັກງານ ພາສີ ຂອງ ເນປານ ລາຍງານວ່າ: ມູນຄ່າ ການຄ້າຊາຍແດນ ລະຫວ່າງ ເນປານ ແລະ ສປຈີນ ເພີ່ມຂຶ້ນ ຫລາຍກວ່າ 2 ເທົ່າ ໃນໄລຍະ 11 ເດືອນທຳອິດ ຂອງ ສົກປີ ງົບປະມານ ປັດຈຸບັນ, ຊຶ່ງຈະສິ້ນສຸດ ກາງເດືອນ ກໍລະກົດນີ້ ບັນລຸ 9,42 ໝື່ນລ້ານຣູປີ ເນປານ, ເພີ່ມຂຶ້ນ ຈາກ 4 ໝື່ນລ້ານຣູປີເນປານ ເມື່ອທຽບໃສ່ ໃນໄລຍະດຽວກັນ ຂອງ ສົກປີງົບປະມານ 2022-2023. ໂດຍການສົ່ງອອກຂອງ ເນປານ ໄປຍັງຈີນ ລວມມີ 1,63 ຕື້ຣູປີເນປານ ແລະ ການນໍາເຂົ້າຈາກ ຈີນ ຈຳນວນ 9,26 ໝື່ນລ້ານຣູປີ ເນປານ. ນອກນັ້ນ ໜ່ວຍງານ ດ້ານພາສີ ທ້ອງຖິ່ນ ເນປານ ໄດ້ລະບຸວ່າ: ການກັບຄືນມາ ເປີດດ່ານ ຊາຍແດນ ຣາສຸວະຄານທິ-ຈີ້ຫລົງ ແລະ ດ່ານຕາໂຕປານີ-ຈາງມູ່ ເມື່ອທ້າຍປີ 2022 ແລະ ເດືອນ ພືດສະພາ ປີ 2023 ໄດ້ຊຸກຍູ້ໃຫ້ ການຄ້າ ທະວີພາຄີ ເສັ້ນທາງບົກ ຢ່າງຫລວງຫລາຍ ແລະ ອື່ນໆ. /
KPL
