KPL
ກະຊວງ ການຕ່າງປະເທດ ອີຣານ ລະບຸວ່າ: ອີຣານ ແລະ ບາເຣນ ໄດ້ຕົກລົງ ຈະເລີ່ມ ການເຈລະຈາ ກ່ຽວກັບ ການຟື້ນຟູ ຄວາມສຳພັນ ທາງການທູດ ລະຫວ່າງ ສອງປະເທດ ທີ່ ຖືດຕັດຂາດ ເປັນເວລາ ເກືອບ 8 ປີ ເມື່ອປີ 2016.
ຂປລ. ສຳນັກຂ່າວ ເອເອຟພີ ລາຍງານ ຈາກ ນະຄອນຫລວງ ເຕເຮຣັງ ປະເທດ ອີຣານ ເມື່ອວັນທີ 25 ມິຖຸນາ, ກະຊວງ ການຕ່າງປະເທດ ອີຣານ ລະບຸວ່າ: ອີຣານ ແລະ ບາເຣນ ໄດ້ຕົກລົງ ຈະເລີ່ມ ການເຈລະຈາ ກ່ຽວກັບ ການຟື້ນຟູ ຄວາມສຳພັນ ທາງການທູດ ລະຫວ່າງ ສອງປະເທດ ທີ່ ຖືດຕັດຂາດ ເປັນເວລາ ເກືອບ 8 ປີ ເມື່ອປີ 2016. ຢ່າງໃດກໍ່ຕາມ ການເຄື່ອນໄຫວ ຫລ້າສຸດ ຕາມຖະແຫລງການ ຂອງ ກະຊວງ ການຕ່າງປະເທດ ອີຣານ, ທ່ານ ອາລີ ບາເກຣີ ຮັກສາການ ລັດຖະມົນຕີ ການຕ່າງປະເທດ ອີຣານ ໄດ້ເຂົ້າພົບປະກັບ ທ່ານ ອັບດຸລລາທີຟ ບິນ ຣາຊິດ ອັລ-ຊາຢານີ ລັດຖະມົນຕີ ການຕ່າງປະເທດ ບາເຣນ ນອກກອບ ກອງປະຊຸມ ສຸດຍອດ ຄວາມຮ່ວມມື ອາຊີ (ເອຊີດີ) ໃນນະຄອນຫລວງ ເຕເຮຣັງ ປະເທດ ອີຣານ. ກອງປະຊຸມ ໃນຄັ້ງນີ້ ທັງ ສອງຝ່າຍ ໄດ້ເຫັນດີ ໃນການສ້າງ ກົນໄກ ທີ່ຈຳເປັນ ກ່ຽວກັບ ການເຈລະຈາ ລະຫວ່າງ ສອງປະເທດ ແລະ ກວດກາວ່າ ຈະຟື້ນຟູ ຄວາມສຳພັນ ທາງການເມືອງ ແລະ ອື່ນໆ./
KPL
